Assallamualikum Pak Abraham Ilyas, tarimo kasih, carito ko lah ambo baco sabagian, mungkin nan di solo an Basi Panggiriak paralu dikunyah kunyah saketek :)
wassallam, AZDRA,37+, bpn ============ Intelektual Minang Kabau Dikarang oleh : Wisran Hadi INTELEKTUAL MINANGKABAU Tasabuik maso daulu, datanglah Buluah Kuriang jo Basi Panggiriak manamui Sabai Nan Aluih. Nak mangklarifikasikan parsoalan tukang kaba nan nyo tuduah dek Sabai Nan Aluih sebagai dalang dalam tragedi pembunuhan Rajo Babandiang. Sagalo tukang kaba lah kanai tuduah sebagai pembunuh kejam, mambunuah urang sambia badendang! “Ha, kan alah tu Ciak. Jadi, kami kamari ko iyo nak manjaleh kan pulo sakali, baa mangko sagalo tukang dendang, indak malibatkan Mangkutak Alam dalam pambunuhan rajo-rajo tu,” kato Buluah Kuriang, sasudah Sabai nan Aluih baranti berang-berang. “Baa nyo Mangkutak tu? Urang nan suko balayang-layang, indak namuah manuntuik baleh, padohal ayah lah dibunuah urang,” tanyo si Sabai. “Kok tantangan adiak aciak nantun, itulah urang nan patuik disabuik intelektual Minangkabau,” jawek Buluah Kuriang. “Ha? Lah intelektual Minang pulo adiak den tu? Baa duduaknyo tu?” “Urang nan dapek disabuik intelektual Minang tu ado sambilan macam saratnyo. Kasambilanan nyo alah nyo panuhi dek Mangkutak Alam,” solo Basi Panggiriak. “Apo-apo sajo tu saratnyo?” tanyo si Sabai tasasak. “Partamo, Mangkutak suko bamain layang-layang. Itu maknanyo, inyo urang nan suko maukua tengginyo langik, bara karehnyo angin, dari ma datang angin, bilo angin bakisa. Urang nan saroman tu adolah sifat seorang ilmuwan.” “Nan kaduo?” “Kaduo, Mangkutak indak namuah terlibat jo kematian bapaknyo walau dibunuah dek Rajo Nan Panjang. Urang nan basipat saroman tu, maknanyo, adolah urang nan indak suko terlibat jo masalah kriminil, bunuah mambunuah atau baleh dandam. Baitu juo Mangkutak terhadok Rajo Nan Panjang, inyo indak namuah malawan. Itu maknanyo bana, inyo indak suko malakukan makar, kudeta, oposisi, atau mambunuah pamarentahan nan sadang bajalan. Nan katigo, inyo indak namuah lai bapikie caro kampuang, sabateh dapua jo rumah gadang. Aratino bana, inyo tu ba alam laweh ba padang data. Orientasinyo luas, hubungan jo urang lain dijago elok-elok. Pandai bamain dinan rami, indak namuah bamain dinan kalam. Aratino bana, inyo lai pandai bapolitik pulo saketek. Nan kaampek, Mangkutak tu lah kanai hati ka padusi, tapi padusi antah sia. Itu maknanyo, inyo dapek mancintoi sesuatu nan alun pasti. Mancintoi nan alun wujud. Mancintoi sesuatu nan indak pasti itulah hakekat dari ilmu pengetahuan. Kalimo, inyo urang Minang. Jaleh kaumnyo. Basuku, bakorong bakampuang, basawah baladang jo banagari. Nan ka anam, bapaknyo pangulu, rajo pulo lai. Itu aratino bana, inyo urang tanamo sajak saisuak. Bapak kayo mande batuah. Nan katujuah, inyo indak namuah kawin jo urang kampuangnyo sandiri. Itu aratino bana, inyo labiah suko tingga di nagari urang daripada di kampuang. Labiah suko inyo di rantau daripado di kampuang. Nan ka salapan, inyo indak namuah jadi anak buah Rajo Nan Panjang. Itu aratino bana, inyo indak namuah manjadi urang pamarentahan, apolai jadi pak turuik, tukang anggauk-angguak. Dek karano Mangkutak Alam mamanuhi salapan dari sambilan katagori sia nan disabuik intelektual Minang tu, patuik bana inyo diimbaukan, propesor dotor Mangkutak Alam. Inyolah jadi caminan intelektual Minangkabau sampai nantik,” kato Buluah Kuriang manutuik uraiannyo. “Lai ba ugamo atau indak tamasuak sarat indak?” tanyo si Sabai. “Itulah nan paliang penting. Lai mah takana dek Aciak. Ugamo. Itulah syarat nan kasambilan,” solo Basi Panggiriak. “Apaknyo kan lai Islam. Tiok Jumahaik lai pai ka musajik. Kalau apaknyo lai Islam, tantu anaknyo lai Islam pulo,” sambuang Buluah Kuriang. Sabai Nan Aluih maangguak-angguak. Kini baru inyo tahu, baa mangko Mangkutak Alam indak nyo libatkan dek tukang kaba dalam babagai pambunuhan. Supayo intelektual Minang tu indak nyo bunuah dek pamarentahan Rajo Nan Panjang nan sadang bajalan wakatu itu. --~--~---------~--~----~------------~-------~--~----~ =============================================================== UNTUK DIPERHATIKAN, melanggar akan dimoderasi/dibanned: - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi di setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama - DILARANG: 1. Email attachment, tawarkan disini & kirim melalui jalur pribadi; 2. Posting email besar dari 200KB; 3. One Liner =============================================================== Berhenti, kirim email kosong ke: [email protected] Daftarkan email anda yg terdaftar disini pada Google Account di: https://www.google.com/accounts/NewAccount?hl=id Untuk melakukan konfigurasi keanggotaan di: http://groups.google.com/group/RantauNet/subscribe =============================================================== -~----------~----~----~----~------~----~------~--~---
