Rabu, 28 January 2009
Panonton jo Pamain "Mangecek se!" Kari Garejoh tibo-tibo basorak lantang. Kontan sajo urang-urang nan sadang duduak sambia maota dan minum kopi pagi tu manjadi takajuik. Malah ado nan manyangko, Kari sadang berang, karano satiok pagi sampai patang karajo hanyo mangecek ka mangecek sajo. "Modal awak nan banyak di nagari ko kan cuma mangecek. Jo mangecek tu lah banyak di antaro awak nan manjadi urang hebat. Jo modal mangecek tu ado nan inggok di kantua wakia rakyaik. Jo mangecek tu pulo ado nan mandapek pitih banyak atau fasilitas lain dari negara. Tapi, takana dek ambo, ka sia kato-kato tadi Kari tujukan?" Baleh Angah Piyan sambia batanyo. "Bacolah surek kaba 'Singgalang' nan tabik kini dan paratikan pulo barita-barita televisi. Sajak tadi malam ambo paratikan itu ka itu se isinyo," jawek Kari. "Apo tu?" Tanyo Angah indak saba. "Lah dikatokan pulo Pak Presiden awak sarupo mainan anak-anak, yoyo," jawek Kari baliak sambia mancaritokan barita-barita nan dibaco di surek kaba 'Singgalang' sarato nan ditonton di televisi. Angah tagalak. Nan lain nampak tacangang. "Baa kok galak Angah?" Tanyo Kari. "Iko lawan barek sajak dulu, tantu iyo. Kadang-kadang ambo mancaliak sarupo urang baru carai. Karano hati indak lapeh, nan laki-laki mampaburuak bakeh bini. Baitu pulo sabaliaknyo, nan padusi mampakecek-an bakeh laki. Nan itulah, nan ikolah. Pokoknyo indak ado nan elok. Tujuannyo supayo bakeh bini atau bakeh laki indak dapek jodoh baru. Baitu juo dalam politik. Karano lawan barek, mako antaro nan ciek jo nan lain bausao manjatuahan. Tujuannyo, supayo dalam pamilu beko, lawan politik tu bisa kalah dan awak manang," kato Angah. "Itu kan samo se maambuih lampu togok kawan hanyo untuak maiduik-an lilin awak. Apo memang iyo bantuak itu etika politik di nagari awak nan barado di timur ko? Apo iyo sarupo itu politik nan dituntun dek undang-undang sarato dasar negara awak? Baa dek Tan Baro, cubolah mangecek agak sapatah!" kato Kari sambia mamintak pandapek kawannyo. "Ha....ha...., dalam politik indak ado kawan nan abadi. Nan ado hanyolah kapentiangan. Kadang-kadang ibaraik pacu lari, nan surang bausaho manyimpia nan lain. Kalau nan lamah, kanai simpia tantu bisa tajilapak. Tapi kalau basuo nan tagok, indak ka baa gai tu doh. Yakinlah. Nah, ambo mancaliak presiden es-be-ye adolah nan tagok. Malah, jo caro-caro nan dibuek dek lawan politiknyo sajak dulu sampai kini, popularitasnyo taruih naiak. Samo jo ameh, samakin digosok, samakin bakilek," kato Tan Baro. "Bantuak mancukua bulu katiak lai pulo mah yo? Samakin dicukua, samakin banyak tumbuahnyo!" Tacin lah sato pulo manyalo. "Tapi, takana dek ambo, Mbak Mega tu kan pernah pulo manjadi presiden dan wakia presiden. Apo inyo indak maraso baa bareknyo manjadi pamimpin," kato Uncu Labai. "Kabiasaan awak ko, Ncu kan samo jo main bola. Pamain bola nan lah ka balakang kalua angoknyo dek main, namun dicimeeh malah dimaki juo dek panonton. Giliran urang nan pernah manjadi pamain manjadi panonton, parangainyo samo, pasti ka mangecek ado pamain nan bodoh. Jadi, dalam politik, ambo raso biaso se tu nyo," kecek Angah. "Taragak lo awak nak bantuak Amerika tu ha. Samanjak kampanye sampai palantikan Obama, sanaaaang bana hati awak mancaliaknyo. Nan kalah lansuang maagiah ucapan salamaik. Indak ado pakai dandam sarupo di nagari awak," kecek Uncu baliak. "Tu baa juo lai Ncu. Awak lah ditakdirkan manjadi urang siko," kato Tan Baro mananggapi. Espe St.Soeleman http://www.hariansinggalang.co.id/index.php?mod=detail_berita.php&id=83 The above message is for the intended recipient only and may contain confidential information and/or may be subject to legal privilege. If you are not the intended recipient, you are hereby notified that any dissemination, distribution, or copying of this message, or any attachment, is strictly prohibited. If it has reached you in error please inform us immediately by reply e-mail or telephone, reversing the charge if necessary. Please delete the message and the reply (if it contains the original message) thereafter. Thank you. --~--~---------~--~----~------------~-------~--~----~ =============================================================== UNTUK DIPERHATIKAN, melanggar akan dimoderasi/dibanned: - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi di setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama - DILARANG: 1. Email attachment, tawarkan disini & kirim melalui jalur pribadi; 2. Posting email besar dari 200KB; 3. One Liner =============================================================== Berhenti, kirim email kosong ke: [email protected] Daftarkan email anda yg terdaftar disini pada Google Account di: https://www.google.com/accounts/NewAccount?hl=id Untuk melakukan konfigurasi keanggotaan di: http://groups.google.com/group/RantauNet/subscribe =============================================================== -~----------~----~----~----~------~----~------~--~---
