SAKIK KAPALO
By : Jepe
Kawan ambo batanyo apo ubek sakik
kapalo Jepe, tu bara lo jenis sakik kapalo ko, nan tanyo tantu harus dijawek
apolai kawan-kawan alumni sakolah ambo ko ndak asiang lai dek ambo yo banyak
suka jo duka kami dulu katiko samo-samo manuntuik ulemu mulai dari sakolah
basirawa pendek sampai pakai sirawa panjang. Tolking abaut Sakik Kapala, dari
duo kato tu bisa kito artikan baik sacaro tersirat maupun tersurat, ambo yo
indak dokter do tapi arti kato Sakik Kapalo dari segi kesehatan tantunyo sebuah
panyakik nan rato-rato awak pernah alami salamo iduik didunia ko apolai
umua-umua lah kapalo ampek ko acok juo kanai sakik kapalo, bisa jadi dek masuak
angin, talambek makan, babaneh-paneh, bahujan-hujan, flu, mamikia barek bana
sampai barasok ubun-ubun, nan baakibat
yo kapalo manjadi sakik nan taraso didalam tangkurak kapalo awak,,..raso
sakiknyo diterjemahkan jo kato-kato untuak manggambarkannyo adolah
Nyut..nyut..nyut..cekot..cekot.
Kok lah nyut cekot cekot ko
manyarang kapalo awak yo raso kapacah kapalo ko rasonyo, panyakik kok indak
bisa dianggap enteng, sepele nampaknyo tapi akibatnyo pacah
kosentrasi awak dalam beraktivitas sehari-hari, urang sadang manyanyi jo suaro
nan rancak dan syahdu dimuko awak raso-raso ka awak ampok jo batu untuak
disruah diam alah banyanyi juo. Sakik Kapalo ko ambo raso adiak kontan nomor
dua dari sakik gigi mah, pokoknyo senewen awak dibuek jo sakik kapalo nan barek
ko, kok diantuakan kapalo ka tembok takuik lo pacah …gamang lo awak takuik
mati, labiah ektrimnyo kok lah barek bana sakik kapalo ndak tertahan ko namuah
lo awak dabiah lihia ko jo pisau maja..aha..tambah barek mah penderitaan dan
sakik nan diraso kok mandabiah lihi jo piasau maja..jaan lai..nikmati sajo
sakik kapalo nan barek ko, jalannyo bali ubek bebas nan dijua mulai dikaki limo
sampai di apotik atau pai ka dotor. Makan ubek tu baok lalok tutuik kapalo job banta beko tadanga lo anjiang
ribuik mamakak tadanga dek awak raso batambah pacah kapalo ko,
Tutuik dan kunci pintu kamar gantuangkan dipintunyo kareteh
nan batulih sarupo di Hotel tu nan batulih Don’t disturb..kok batanyo anak awak
nan baru sakolah satu SD alah pandai
mambaco apo artinyo tu Abak/One ambo, jawek sajo elok-elok ka anak tu artinyo
sayang, “Abak lalok lu yo salayang , sadang sakik kapalo, beko lah cegak baru awak pai ka
mol.”
Lalu sakik kapalo ado juo secara
mekanis mukasuik ambo misalnyo bantuak ambo baru-baru kawin tingga dirumah
mintuo suko mangudok samba dimeja makan nampak dek mintuo inyo ambiak tangkai
sapu kanai lakak kapalo ambo, bangkak tantu sakik..ha,,ha jaan pijayo bana lo
jo ota ambo ko sagan lah ambo mangudok dimuko mintuo, itu contoh nan bagarah
sajo baa sakik kapalo mekanis ko, kok yo lakek tangkai sapu mintuo ka kapalo
ambo sadang mangudok samba tantu pandai lo ambo mailak.pacuma sajo ambo baraja
silek ketek-ketek di surau kampuang dulunyo..opss..ngak..ngak..kena..nggak..kena
mintuo ku..Hua kak..kak ha..ha…alah tu maota lakak tangkai sapu mintuo tadanga
dek si Bolot bin pakak iyo lo keceknyo beko.
Nah sakik kapalo nan tersirat
tantu adolo artinyo, kok ambo defenisikan terminologi Sakik Kapalo tersirat ko
yo indak pandai ambo mauraikan, tapi kok maanalogikannyo kiro-kiro bantuak iko
Sakik kapalo tando kutip ko (“Sakik Kapalo”)
Dalam iduik sahari-hari ko nan
mujua sapanjang hari tantu indak ka basuo dek awak do, pasti ado susah dan dukonyo
nan mambuek awak sadiah baibo ati, lalu kadang-kadang awak sebagai manusia nan
lemah mengeluh “ Sakik Kapalo waden ha..manggaleh dari pagi sampai tangah hari
alun juo urang mambali” nan tabayang rugi hari ko manggaleh.
Misalnyo bantuak iko, ado urang manggaleh cindua dalam
balango nan gadang tu, cindua ko lah takacau tibo-tibo hari hujan labek dingin
lo cuaca tantu indak laku cindua nan sabalango tadi tukang cindua lah sakik
kapalonyo, bisuak barusaho liak kok ka lai untuang ka diraih, lah bakacau lo cindua duo balango dek mancaliak hari paneh
garang urang rami lo bakumpua dilapangan ado keramaian, tapi datang anak mudo nan ugal2an naik Honda (padohal
merek motornyo Yamaha) kanai lendo
garobak, tateleang akibatnyo balango nan duo panuah barisi cindua balambim
pacah balah-balah cindua tatunggang, anak mudo tangguang ugalan-ugalan lari
kabur, tukang cindua ibo hati takana anak bini dirumah joa kamambali bareh beko
untuak makan,,akhirnyo dek laruik jo sadiah sakik kapalonyo mamikiakan.
Dek tukang cindua hari hujan
sakik kapalonyo, tantu kondisi ko babeda bagi buek urang nan manggaleh aia
sorobat angek, samakin hujan dingin cuaca ko samakin laku kareh sorobaik
angeknyo nan bacampua susu dikocok lo jo
talua ayam kampuang, dingin..dingin samakin dingin cuaca dek hujan samakin
syahdu mairuik aia sarobatko
Bamacam-macam sakik kapalo tando
kutip ko aratinyo, apolai iduik dijaman kini nan susah bagi masayarakat
badarai, kok lah masuak tahun ajaran baru datang sakik kapalonyo mamikiakan
biaya sakolah anak-anaknyo nan maha-maha raso indak tadayuang dek masyarakat
badarai nan penghasilan pas-pasan ko mambiayai pendidilkan anaknyo jaan kan
masuak universitas untuak pendidikan dasar sajo biayanyo mambuek inyo sakik
kapalo mamikiakan baa mancari kepeang. Baitu juo kok sakik , lah sakik kapalo
lo inyo mamikiakan biaya barubek kecek pemerintah biaya pendidikan jo kedehatan
gratis tapi dalam prakteknyo mancabiak saku masyarakat badarai ko nan mambuek
inyo jungkir baliak tunggang tunggik mancari kepeang akibatnyo sakik kapalo
mamikianyo.
Bamacam-macam sakik kapalo mode
iko dialami anak manusia, mulai dari susah iduik, bacakak laki bini, bacarai,
mancaliak kalakuan anak indak sandereh gilo dugem jo mabuak sajo tiok malam
talibaik narkoba, sek bebas, basilingkuah, pengkhiantan cinta, putuih cinto,
musibah, cobaan nan sakiro mambuek sakik kapalo menghadapinyo.
Lalu baa ubeknyo, sabananyo lah
diagiah ubek dek konco ambo nan banamo Syahril atau akrab kami maimbaunyo si
Ing ubeknyo , yo pasrah dan badoa awak ka Illahi nan maha segalanyo salah
satunyo dikeheningan tangah malah nan gelap sunyi jago awak ambiak uduak bawo
shalat malam atau shalat tahajud, kok barek bana cobaan nan awak hadoi nan
mambuek sakik kapalo tumpah ruahkan isi hati tu ka Allah Swt, badoa jo aia mato
agar cobaan iduik nan sakiro indak kuek awak manangguangnyo dapek diagiah jalan
dan dilapangan dek nan Kuaso, lalu tutuik sajo doa ringkas bantuak iko
ALLAHHUMA LAASAHLA ILLAA MAA
JAALLAHU SYAHLANN WA ANTA TAJHALULHAZNAD
“Ya Allah, tidak ada yang mudah kecuali apa yang Engkau mudahkan dan tidak ada
yang sulit jika Engkau menghendakinya kemudahan”
Labiah lanjuik silahkan
sanak-sanak alumni maagiah tauziyah nan dalam baa sakironyo kok awak mangalami
“Sakik Kapalo” dalam kehidupan ko.Sagitu dulu dari ambo nan sadang barado di
camp (hutan) tapi dek lai dapek sinyal bisalah digunokan modem mobile kawan
ambo ko, kok labiah takurang kecek jo garah bin ota talonsong ambo yo minta
mooh sajo..
Wass-Jepe
Hutan Sei Garingging Tapsel Sumut/4 -02-2008
