Sadang lamak maota, tibo-tibo induak bareh Uwo Pulin malinteh, taruih kalua lapau. Di tangannyo ado panci ketek. Agak tagageh nampaknyo.
"Apo tu, Ni?" Sapo Udin Kuriak. "Iko ha, gulai basi," jawek induak bareh Uwo. "Manga dicampak-an? Rancak diangek-an baliak, bisa juo untuak makan," kecek Udin mambaleh. "Indak doh. Makan gulai baangek-an banyak rasikonyo. Bisa-bisa sakik paruik awak deknyo," jawek Uni tu baliak. "Tapi Kejaksaan Aguang di Jakarta, bisa mamakan gulai basi baangek-an," Udin indak namuah kalah. Tantu sajo tadongak kawan-kawannyo nan lain mandanga kato-kato Udin sabanta tu. Karano, indak munkin pajabaik di Kajaksaan Aguang mamakan gulai basi baangek-an. Ijankan gulai basi, gulai nan lah dingin se barangkali indak ka namuah gai pajabaik-pajabaik tu mamakannyo. "Isu tu nan ka bisa ditarimo aka lah, Din!" Basorak pulo Tan Baro nan memang indak mangarati jo jalan pikiran kawannyo nan surang tu. "Indak bisa ditarimo aka baa pulo ka ha? Lah nyato-nyato ado di barita surek kaba hari ko, Tan Baro mangecek-an indak masuak aka. Atau munkin Tan Baro alun mambaco 'Singgalang' ndak?" kato Udin baliak batanyo. "Dari pagi tadi, lah lanyah surek kaba ko dek ambo mambaco, indak basuo dek ambo pajabaik nan makan gulai basi doh," jawek Tan Baro. "Ha....ha...., mato pambarek kaniang se. Bacolah iko ha, apo indak samo jo gulai basi diangek-an baliak dek Tan Baro?" Kato Udin sambia galak dan manunjuak-an barita nan inyo mukasuik tadi. Di situ tatulih judul 'Kemas Yahya dan M.Salim akan Diaktifkan Kembali'. Tan Baro tamanuang. Barita tu tadi lai dibaco, tapi pangananyo indak sampai sajauah itu. Dalam hati, Tan Baro maakui jangkauan nalar kawannyo nan surang tu. "Kalah ambo. Hebat Udin! Indak talinteh di pikiran ambo nan sarupo itu tadi doh. Dalam pangana ambo, nan dikatokan gulai basi tu, kok iyo sabana makan gulai nan lah basi. Ruponyo iko," kato Tan Baro sambia galak dikulum. Baitulah mode demokrasi di lapau Uwo. Siapo sajo nan mangaluakan pandapek, ide atau istilah, kalau batua pasti diakui. Indak ado istilah basitegang urek lihie apolai sampai bakuhampeh hanyo untuak mampatahankan ego surang-surang. Itu jauah bana dek komunitas lapau Uwo. Udin maistilahkan duo pajabaik di Kajaksaan Agung nan diagiah hukuman indak mamacik jabatan karano ado kaitan jo kasus lain adolah gulai basi. Kalau ado rancana maagiah jabatan atau mamakai baliak, itu samo se jo mamakan gulai nan lah basi. "Nan bantuak itu banyak mah, Din. Manga jauah-jauah ka pusek eh, ka pusat, di kantua-kantua nagari awak ko juo banyak. Ado pajabaik nan lah baranti dari jabatannyo, dijadikan staf ahli, tapi babarapo bulan sudah itu dipakai lo liak," salo Angah Piyan. "Kalau lai dek mutasi biaso, iyo wajar. Tapi kalau karano tasangkuik jo hukum, iko manjadi lain," baleh Udin. Tamanuang Tan Baro dibueknyo baliak. Karano, apo nan dikatokan Udin tu indak bisa dibantah. Espe St.Soeleman <http://www.hariansinggalang.co.id> http://www.hariansinggalang.co.id Selasa, 24 February 2009 --~--~---------~--~----~------------~-------~--~----~ =============================================================== UNTUK DIPERHATIKAN, melanggar akan dimoderasi/dibanned: - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi di setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama - DILARANG: 1. Email attachment, tawarkan disini & kirim melalui jalur pribadi; 2. Posting email besar dari 200KB; 3. One Liner =============================================================== Berhenti, kirim email kosong ke: [email protected] Daftarkan email anda yg terdaftar disini pada Google Account di: https://www.google.com/accounts/NewAccount?hl=id Untuk melakukan konfigurasi keanggotaan di: http://groups.google.com/group/RantauNet/subscribe =============================================================== -~----------~----~----~----~------~----~------~--~---
