Dunsanak di palanta, nan ketek indak disabuik namo, nan gadang indak diimbau gala. Assalamulaikum W.W
Akhia-akhia iko banyak anak-kamanakan ambo nan batanyo tantang pemilu, sia caleg nan ka dipiliah, umumnyo mereka binguang. Salaku urang tuo ambo jawab pertanyaan tsb. yang intinyo sbb. Satuju atau indak satuju jo pandapek ambo, silakan dunsanak mambari komentar. Tulisan iko bukan untuak mamancing polemik politik di palanta, tapi hanya marupokan pandapek urang Tuo, *caro bapikia, baa nan ka salamaek !.* Nan ka dianalisa: 1. Baa caro mamahami kalimat-kalimat janji para caleg nan ditampilkan melalui beragam media (radio, televisi, Koran, majalah) dan maanalisa bantuak wajah caleg. 2. Kamaa urang awak ma agiahkan suaronyo pado pemilu caleg 2009 atau golput sajo nan elok. Manuruik pandapek ambo kalimat-kalimat janji itu indak usah dibahas, nan maa nan sabana janji. Sadonyo itu hanyo rayuan gombal. Sabananyo jauah labiah elok kok caleg tu indak mangecek. Ingek peribaso awak "*ba riak tando tak dalam, ba kuncang tando indak panuah". Banyak kecek, banyak nan sasek, banyak kato banyak nan lato.* Tantang potret para caleg, nan tapampang disuduik-suduik jalan, nan manghiasi koran jo majalah pandapepek ambo sbb: Gaya para caleg tu indak dapek dipadomani untuak mangatahui isi hatinyo (kesetiaan, kesungguhan, keseriusan) karano gaya itu dibuek-buek. Sagalo caro bergaya cuma untuak marayu pemilih. Ado marayu jo mangamek-ngamek, ancai awak dibueknyo....! , Ado gaya takah urang cadiak, seso awak dijuanyo. Ado gaya urang bagak, garik awak basuo jo inyo. Ado gaya urang kayo, kaciak awak dibueknyo. Ado gaya urang andia, indak yakin awak ka inyo, dan ado pulo gaya urang malin, kok lain di lua jo di dalam, tunjuak luruih kalingkiang bakaik. *Jadi gaya tampil bakodak indak paralu dibahas.* Tantangan ka ma suaro diagiahkan, kama pena ka dicontengkan. Manuruik ambo pena dicontengkan ka caleg nan ampek: *1. Piliah dunsanak 2. Piliah famili 3. Piliah nan takaik ripa, besan, urang sumando. 4. Piliah kawan dan tetangga* Baa kok caro itu ?. *Bia kuah talenggang ka nasi. Nasi ka dimakan juo. Kok kuah talenggang ka lantai, kuah tabuang, lantai kumuah basalemak. Kok takanai baragiah, bialah ka nan kanduang. * Golput usah ! Urang Minang indak buliah Golput, sebab golput tu kalah sabalun parang, baliak sabalun pai. Urang Golput bak papatah awak: masuak indak ganok, kalua indak ganjia. Tibo (di TPS) indak manambah (suara), pulang (dari TPS) indak mangurangi (suara). Wallohualam bissawab Demikianlah dari ambo. Wassalam Drs. Noor Indones St. Sati 72 th, 8 bl. suku Tanjuang, dari Sitalang, Lb. Basuang. --~--~---------~--~----~------------~-------~--~----~ =============================================================== UNTUK DIPERHATIKAN, melanggar akan dimoderasi/dibanned: - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi di setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama - DILARANG: 1. Email attachment, tawarkan disini & kirim melalui jalur pribadi; 2. Posting email besar dari 200KB; 3. One Liner =============================================================== Berhenti, kirim email kosong ke: rantaunet-unsubscr...@googlegroups.com Daftarkan email anda yg terdaftar disini pada Google Account di: https://www.google.com/accounts/NewAccount?hl=id Untuk melakukan konfigurasi keanggotaan di: http://groups.google.com/group/RantauNet/subscribe =============================================================== -~----------~----~----~----~------~----~------~--~---
