KISAH SI MONEN (3) Nan si Monen ko wakatu mudo di Padang yo suko malala lo, indak sanang ikua e tingga di rumah kos-kosannyo di Padang, kok ndak dilapau duduak mangopi maota jo kawan-kawannyo pai baalan-jalan ndak tantu arah, pokoknyo kami kaki malangkah inyo ikuik i sajo. Katiko inyo bajalan-jalan pagi abih minum teh talua Mak Aciak di Simpang Haru mandanga paluit kureta api Mak Itam ka barangkek ka Padang Panjang, timbua sakali pangananyo.
“Paruik lah kanyang jo katupek gulai paku Mak Aciak, utak lah tarang lo kanai tampa dek teh talua Mak Aciak nan kamek, haa..yo rancak waden bajalan-jalan jo Mak Itam ko” Si Monen mambatin. Lah maloncek sajo si Monen ka gerbong Mak Itam nan ka barangkek ko, puta-kaputa didalam gerbong yo la panuh dek umaik nan ka barangkek ka Padang Panjang jo Mak Itam, tumpah ruah urang di gerbong sampai duduak dilantai bagai ado gai nan tagak basigantuang sambia mamacik pintu jandela garebong Mak Itam. Pandangan si Monen tatumbuak di kuris gerbong Mak Itam ado apak paro baya sadang duduak, tapi disubalahnyo dilatakan tas jo karuang tampek barang-barang Apak ko “Ndak iyo apak tu mah, lah jaleh bantuak iko umaik dalam gerbong Mak Itam, lamak sajo tas jo barang tu dilatakan dikurisi, bia lah waden duduak disinan “ si Monen mambathin sambia ka kurisi Apak tu Tibo dikurisi tu…inyo caliak apak ko salayang tangguang nan sadang taakuak-akuak mangantuak dek lamaknyo tasanda (mungkin Apak ko ndak lalok samalamam mah). “Oppsss..pam..pam..”Apak Rano Karno ..Kok Nggak Mirip Ya.”.ruponyo nan duduak dikurisi ko..onde mandeh..sobok waden baliak jo Apak ko, ahhh..bia lah…nan pantiang waden dapek duduak” si Monen mangecek ka dirinyo sorang sambia manurunkan tas jo barang “Apak Rano Karno tapi Kok Nggak Mirip ya” ini Lah bajalan Mak Itam ko, manjalang masuak Lubuak Aluang tajago Apak ko, inyo caliaknyo disampiangnyo lah ado si Monen, sambia malengong tangguang inyo layangkan suduik matonyo ka Si Monen, sudah tu Apak ko lansuang sajo mambaliak badan, inyo agiah bana ikua jo pungguangnyo ka si Monen. Nan si Monen lah tibo lo gata muluiknyo manggaduah apak ko Monen : Pak..Pak…jaan lo co itu bana lupokan sajo lah Rano Karno tu maota lamak awak lah, kan batambah sero awak bajalan jo mak Itam ko, siapo tahu banyak ulemu nan den dapek dari Apak Nan Apak ko samakin inyo pesong ikuanyo, yo madok ka dindiang Mak Itam bananyo, indak inyo horaukan si Monen maajak untuak ma Ota, lah diculiak lo pinggang apak ko dek si Monen Monen : Pak..dima Apak ka Turun…apo nan Apak baok ko dalam karuang, dima Apak tingga, dima kampuang Apak siapo tahu sakampuang awak, apo suku Apak., bara urang anak Apak, Apak hobi baburu ndak, Bara ikua Apak punyo anjiang, ado sisamuik ndak namo anjiang paburu Apak. Si Monen mulai agak malunak mangecek smbia mamanciang-manciang Apak ko untuak kawan maota, nan si Monen pailang suntuak ko yo maota ubeknyo , tapi nan Apak ko yo anok sajo saribu bahaso indak paduli si Monen nan gigiah maajak inyo maota. Si Monen yo paneh hatinyo di baok malengong sajo dek “Apak Rano Karno tapi kok nggak mirip ya” ko, lah ka sampai lo Mak Itam di Padang Panjang. Monen : Apak yo sombong bananyo jadi urang, ongeh bananyo nan waden ka lah elok-elok manyapo Apaknyo, ndak baitu do batanyo lah waden Pak elok-elok ka bakeh Apak, Mak Itam kasampai lai di Stasiun Padang Panjang lah pukua bara hari kini ko. Nan Apak samanjak kanai dek si Monen masalah Rano Karno ko, yo agak panjang pamikirannyo kamuko kok basuo jo urang nan alun dikenal apolai bantuak si Monen, ado-ado sajo kajinyo ka muko kok jampang maota jo urang nan alun dikenal. Tapi yo agak paneh hati Apak ko dek si Monen mangecek badan dirinyo sombong bin ongeh. Baputa lah badannyo dikurisi sambia mancaliak si Monen nan duduak disampiangnyo Apak : Oiii yuang sabalun den jawek pukua bara kini, nan waden bukan sombong jo ongeh do, kok den ladeni waang maota beko waang suko lo ka waden Monen : Ka de a bananyo Pak..kan rancak tu, awak iduik didunia ko kan yo untuak saliang kenal mangenal Apak : Beko waden turun di Padang Panjang waang sato lo turun, ang ikuik-an lo waden beko, dek waang suko jo Ota Den Monen : Ndak ado salahnyo kan ambo ikuikan lo Apak..dek awak lah saliang mangenal Apak : Sudah tu.. waang iringan lo langkah den ka rumah Monen : Rancak bana mah Pak, tajalin hubungan silahturahmi kito mah kan jadi bisa bakatawan ambo jo keluarga Apak, apak dima Padang Panjangnyo Apak : Ndak paralu waang tahu dima rumah den di Padang Panjang, beko ikuik lo waang karumah den, waden punyo anak gadih rancak dirumah suko lo waang beko ka anak gadih waden. Monen : Apo juo salah nyo Pak, nan waden kan masih bujang alun babini lai, kok lah co itu jalannyo ambo suko jo anak gadih apak tu baa juo lai, lah jodoh ambo mah diagiah dek nan kuaso ambo bisa batamu jo anak gadih apak tu. Apak : Kok waang sajo nan suko jo anak gadih den ndak baa do, jampang kok tagilo lo anak gadih den nan rancak tu ka Waang yo agak tabedo waden mah salaku urang gaek Monen : Bato Pak kareh bana mah…. Apak : Oiii Yuang kok yo suko anak gadih den ka waang…nan waden yo indak satuju do Monen : Apo nan mabuek Apak ndak satuju Apak : Dek….. Waang indak BA ARLOJI..!!! Monen : Hahhh !!!! *** Salam-Jepe, Pku, 28 Maret 2009 Pak Emi mangutik ambo di oto, Ndi..Ndi..tahu ndak kironyo “Apak Rano Karno kok nggak mirip ya”, arloji nan dipakainyo arloji mati lo..makonyo ndak namuah manjawek katiko si Monen batanyo pukua bara hari di garebong Mak Itam . --~--~---------~--~----~------------~-------~--~----~ =============================================================== UNTUK DIPERHATIKAN, melanggar akan dimoderasi/dibanned: - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi di setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama - DILARANG: 1. Email attachment, tawarkan disini & kirim melalui jalur pribadi; 2. Posting email besar dari 200KB; 3. One Liner =============================================================== Berhenti, kirim email kosong ke: [email protected] Daftarkan email anda yg terdaftar disini pada Google Account di: https://www.google.com/accounts/NewAccount?hl=id Untuk melakukan konfigurasi keanggotaan di: http://groups.google.com/group/RantauNet/subscribe =============================================================== -~----------~----~----~----~------~----~------~--~---
