Waalaikumsalam w.w. Sanak Zulkarnain Kahar dan para sanak sa palanta, Ambo iyo acok mandanga dan mambaco tantang kehebatan urang awak ko. Dan sabagai bukti hebatnyo urang awak, biasonyo ditunjuakkan tokoh-tokoh saisuak, saparati pak Hatta, Sjahrir, Haji Agus Salim, atau Muhammad Yamin. Atau babarapo tokoh urang awak nan jadi pimpinan babarapo BUMN maso kini. Tantu ado urang awak maso kini nan hebat, sarupo juo ado para sanak kito dari suku lain nan hebat-hebat. Hanyo sasakali iyo paralu juo diranuangkan, apo iyo sabana baitu hebatnyo 'kasado alahe' urang awak ko ? Babakat jadi pamimpin jo analis ? Antahlah. kalau manjadi 'pamimpin' dan 'analis' a la kadarnyo tantu bisa. Nan jaleh, urang awak ko sabana babakat batangka dan indak amuah mangakui kehebatan urang lain.[Hampia samo jo urang Arab.].Jan lupo silang sangketo di nagari kito sabana banyak, mungkin paliang banyak di Indonesia ko, khususnya tantang sangketo soal tanah pusako. Indak amuah dipimpin ? Tantang indak amuah dipimpin, rasonyo memang iyo, sampai bateh tatantu pulo, yaitu sampai nan mamimpin tu mamakai tangan basi.. Kenyataan ko diparatikan bana dek urang Ulando dahulu, tautamo pimpinan tentara KNIL. Indak amuah dipimpin, tapi kalau kalah parang, kurun keoknyo lamo bana. Iko kan juo kito alami pasca PRRI, nan sampai kini masih disabuik-sabuik juo, bahkan diadokan seminar bagai di Padang baru-baru ko. Urang Batak dan Menado nan juo talibaik jo PRRI indak maacuahkan bana soal kalah manang ko doh. Mereka ko, tautamo urang Batak, kini ado di tiok kalipik Republik ko, dari tingkek tinggi sampai tingkek randah, dalam hampia sagalo bidang. Baa urang awak ? Kan alah tagusur hampia di tiok bidang nan dahulu panah kito kuasoi. Jan kan nan gadang-gadang, dari Pasar Senen jo Pasar Tanah Abang di Jakarta sajo alah susah urang awak mancari hiduik, walaupun Sutiyoso sabagai gubernur alah baagiah gala 'mamak' bagai ! Karano itu, apo indak bakalabiahan bana kito ko 'mangapik daun kunyik' ? Baa kok kito adokan 'studi pabandiangan' antar etnik, mamakai ukuran nan samo, antaro lain manggunokan apo nan disabuik ki sabagai Millenium Development Goals (MDG) 2015 ? Rasonyo indak sa gumilang itu bana kito-kito doh. Urang Minang jadi Presiden ? Rasonyo alun ka tawujuik lai dalam wakatu dakek ko doh. Rancak kito segehi dulu Ranah kampuang halaman kito tu. Sacaro baketek-ketek sapanjang nan tajangkau di ambo, lai ambo paratikan juo, antaro lain bidang pariwisata. Baa kualitas pananganannyo ? Mintak ampuuuuun. Ado ciek lai, kalau kito alah maanggap diri paliang hebat, kan alah hilang motivasi dan indak ado dorongan lai untuk 'baguru ka alam takambang' ?
Wassalam, Saafroedin Bahar (L, masuk 72 th, Jakarta; Tanjuang, Soetan Madjolelo; Lagan, Kampuang Dalam, Pariaman.) "Basuku ka Ibu; banasab ka Bapak; basako ka Mamak" Alternate e-mail address: [email protected]; [email protected] --- On Fri, 4/10/09, Zulkarnain Kahar <[email protected]> wrote: From: Zulkarnain Kahar <[email protected]> Subject: [...@ntau-net] Re: SERI NAN DI LUA TAMPURUANG 63: APA MAKNA HASIL PEMILU 2009 BAGI KITA ? To: [email protected] Date: Friday, April 10, 2009, 10:36 AM Assalamualaikum pak Saaf, Nan nampak dimabo salamo ko urang awak sadonyo berbakat jadi Pemimpin dan Analis, dan tidak mau dipimpin.., kayaknya kalau Presiden Urang Minang Indoesia ini mungkin akan selangkah lebih maju. Bagaiman kalau urang tapanuli dijadiakan mentri penddidikan biar semua guru dari TK sampai PT semua seragam dari tapanuli. mungkin pendidikan akan lebih baik. ha ha Wassalam Zulkarnain Kahar 50+th barumah di JKT, bakampuang ka Maninjau, basuku Malayu, babako ka Pikumbuah, bakureh dima diparalukan urang. --- On Thu, 4/9/09, Dr.Saafroedin BAHAR <[email protected]> wrote: From: Dr.Saafroedin BAHAR <[email protected]> Subject: [...@ntau-net] Re: SERI NAN DI LUA TAMPURUANG 63: APA MAKNA HASIL PEMILU 2009 BAGI KITA ? To: [email protected] Cc: "Drs Sjafnir Aboe NAIN" <[email protected]>, "Warni DARWIS" <[email protected]>, "Ir. Raja Ermansyah YAMIN" <[email protected]> Date: Thursday, April 9, 2009, 10:16 PM Waalaikumsalam w.w. Sanak Lembang Alam dan para sanak sa palanta, Ambo marasokan apo nan Sanak Lembang Alam rasokan, sambia batanyo-tanyo dalam hati dima koh lataknyo masalah, mako sulik bana mampasatukan partai-partai nan badasar Islam ko. Mau indak mau tantu tapaso kito mambukak sejarah lamo, dari sejarah pacahnyo partai Masyumi dan tagaknyo partai NU, sampai pacahnyo PKB maso kini. Ujuang-ujuangnyo kan iyo masalah kurisi jo rasaki juo, bukannyo masalah Rukun Iman dan Rukun Islam. Tapi ado juo sisi positifnyo nampak dek ambo, yaitu pacah balahnyo partai-partai Islam indak sandirinyo baarti pacah balahnyo umat Islam. Partai kan indak persis samo jo umat. Hal itu nampak dari kenyataan mulai dakeknyo pimpinan dan kaum mudo NU jo Muhammadiyah. Jadi, mirip bak kato Nurcholish Madjid dalam tahun 1970-an dahulu : 'Islam yes, partai Islam no'. Dalam ukuran ketek,rasonyo masalah tu juo kito hadapi jo Minangkabau. Ambo sandiri alah lamo batanyo dalam hati, baa mako sulik bana mampasatukan urang awak, Minangkabau ko ? Tiok diajak bapikia pado tataran Minangkabau 'nan sabatang panjang', babaliak juo kaji ka nagari surang-surang.Akibaiknyo, mungkin indak banyak di antaro kito nan biasa manarangkan baa bana nan Minangkabau tu sacaro manyaluruah. Bahkan marumuskan apo nan kito mukasuik jo ABS SBK -- sabagai jati diri Minangkabau -- sajo alun juo bisa dituntaskan sampai kini.Alah balapia-lapia kito adokan pembahasan manganai ABS SBK ko, akhirnyo kan tasakek di masalah hukum kekerabatan jo hukum waris, nan ujuang-ujuangnyo kan soal harato pusako, hampia saroman jo panyabab masalah suliknyo mampasatukan partai Islam di ateh. Syukur Alhamdulillah, buku Christine Dobbin tantang kaik-bakaiknyo masalah ekonomi, Islam, jo gerakan Paderi, sarato buku pak Sjafnir Aboe Nain, alah maagiah pencerahan tantang asa muasa timbuanyo doktrin ABS SBK tu. Tapi baa juo, iduik bajalan taruih, parubahan tatap tajadi, baiak kito suko atau indak suko. Kanyataan hiduik punyo dinamikanyo sandiri. Susahnyo, sulik bana maajak urang awak ko untuak mancaliak kanyataan tasabuik , tamasuak untuak maadokan panalitian tantang baa sabananyo kanyataan di nagari kito tu, khususnyo parubahan sikap dari nan mudo-mudo. Tiok kito ajak mancaliak 'das Sein', diirik juo ka 'das Sollen', sahinggo ambo dapek kesan bahaso kito nikmat bana ba-'wishful thinking'. Wassalam, Saafroedin Bahar (L, masuk 72 th, Jakarta; Tanjuang, Soetan Madjolelo; Lagan, Kampuang Dalam, Pariaman.) "Basuku ka Ibu; banasab ka Bapak; basako ka Mamak" Alternate e-mail address: [email protected]; [email protected] --~--~---------~--~----~------------~-------~--~----~ =============================================================== UNTUK DIPERHATIKAN, melanggar akan dimoderasi/dibanned: - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi di setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama - DILARANG: 1. Email attachment, tawarkan disini & kirim melalui jalur pribadi; 2. Posting email besar dari 200KB; 3. One Liner =============================================================== Berhenti, kirim email kosong ke: [email protected] Daftarkan email anda yg terdaftar disini pada Google Account di: https://www.google.com/accounts/NewAccount?hl=id Untuk melakukan konfigurasi keanggotaan di: http://groups.google.com/group/RantauNet/subscribe =============================================================== -~----------~----~----~----~------~----~------~--~---
