KISAH SI MONEN (7) "SUREK HANYUIK"
Oleh : Jepe Sarupo carito nan lalu (Kisah Si Monen 1) samanjak si Monen indak tapiliah duduak manjadi anggota Dewan di Sinayan mambuek hatinyo amba sajo, tibo raso stress jo frustasi nan bakalabihan inggok di diri, apolai dek lah bahabih-bahabih arato, tanago jo pikiran dimaso kampanye yo sabana tandek kureh bin kandas aratonyo. Oto sedannyo lah dicilok urang lo, diperusahaan tampek inyo karajo lah kanai PHK lo dek acok indak masuak katiko sibuk-sibuknyo kampanye. Si Monen sabananyo untuak manjadi caleg ko yo lah banyak pengorbanan, inyo tahu bana baa kecek kutiang setiker oto prah nan tatulih "NO PAIN NO GAIN" atau kecek pituah urang gaek kito "Marugi makonyo ka Balabo" "Pain" si Monen ko lah cukuik lo rasonyo untuak sosialisasi dirinyo ka masyarakat badarai tarutamo pitih jo haratonyo lah tandeh untuak mambuek sepanduk, setiker, baliho, poster jo embel-embel-embel jo umbul umbul partai, alun lai inyo manyetor kepeang ka partainyo kok kamaju manjadi caleg. Si Monen tahu bana jaman kini ko indak ado nan ka gratis do baa kecek pepatah nan pernah dibaconyo " Ikan asin (keju) nan perai hanyo ado di parangkok mancik" sudah tu basuo lo kato-kato bijak dek nyo " indak ado makan siang nan perai " Paritungan si Monen indak batele-tele "marugi mako ka balaboko atau no pain no gain" jampang abih tandeh bana aratonyo dimaso sosialisasi jo kampanye paliang saketek 500 juta, kok ka duduak bisuak di sanayan dalam hituangan 5 tahun lah balabiah-labiah mah baliak kepeangnyo nan untuak modal katiko maju manjadi caleg. Sabab inyo pernah bakonsultasi jo kawannyo nan lah pernah duduak saperiode di Sanayan. Kecek kawannyo "Jaan waang pijayo lo Monen urang nan duduak manjadi anggota Dewan tu mangabdi , dek mangabdi tu inyo jatuah bansaik namuah inyo maninggakan sabalun manjadi Dewan iduiknyo nan mapan, itu carito ambuih-ambuih sajo tu mah, nan batua Monen bantuak waden nan lah duduak saperiode manjadi anggota Dewan yo mangabdi buek rakyaik jo Negara tapi yo tarimo gaji dan sagalo tunjangan nan gadang-gadang tu, indak beda bagai do manjadi anggota Dewan ko baa urang-urang bakarajo di swasta jo pegawai nan tiok bulan tarimo gaji syukur-syukur kok diswasta kok balabo ado reward jo bonus tahunan sudah tu syukur-syukur juo salamo manjadi anggota Dewan tu ado juo "bonus-bonus" dapek mah, baa bonus tu indak usah lah waden bacarito, bajuang sajolah waang dulu kok jampang duduak bisuak waang tahu sorang mah" baitu kawan si Monen maagiah samangaik. Lah salasai pemilu, suaro lah dihituang, iyo nan dilua dugaan si Monen ndak bara urang masyarakat nan manyontreng badan dirinyo, jauh bana panggang dari api, jauh bana ituang-ituangan diateh karate si Monen jo sagalo analisanyo bara suaro nan dipakirokannyo ka dapek, jampang kok indak cukuik suaro nan alah ditantukan ka Sinayan, paliang indak di partai jo dapilnyo inyo nomor satu nan banyak dapek suaro tantunyo paluang ciek kursi dari Dapilnyo agak gadang inyo nan ka malenggang ka Sinayan bantuak itu itungan diateh karateh.Mangana indak lolos manjadi anggota Dewan, si Monen tabayang sakali aratonyo nan lah tandeh, iyo agak sadiah jo tarumuak atinyo kok maingek apo kini nan tajadi di dirinyo, ibaraiknyo si Monen kini lah jatuah tapai bana. Baa kecek anak gaul kini si Monen samanjak gagal lolos manjadi anggota Dewan yo agak "sensi", labil jiwanyo lah mulai manjurus-jurus ka diopor ka gaduik , tapi nampaknyo alun parah bana masih suko bamanuang sajo baru, kok lah bosan bamanuang inyo irik badannyo kama kaki malangkah, biasonyo pasinggahannyo lapau Mak Aciak di Simpang Haru duduak manyanda dipalanta lapau sambia minum teh talua tu malamun juo mangana untuang. Katiko si Monen sadang duduak di lapau Mak Aciak, nan teh talua "syahdu" Mak Aciak lah talatak dimeja dimanyo duduak,lah inyo iruik teh talua nan syahdu lakek tangan Mak Aciak ko, pas ituangan iruik ka ampek datang Pak Rano Karno "kok nggak mirip" (Pak RK) masuak lapau Mak Aciak. Pak RK duduak dimuko si Monen sambia mamasan teh talua ka Mak Aciak sagaleh, Pak RK manyapo si Monen nan sadang mairuik teh talua jo wajah malamun saketek agak kusuik. Pak RK : Oii Monen den caliak kurang bana gairah waang mairuik teh talua Mak Aciak na syahdu tu rasonyo, wajah waang suntuak sajo den paratian salamo ko, waden tahu waang iyo ndak jadi malenggang ka Sinayan, baa juo lai lah baitu lo paruntungan nasib waang nan ditatapkan nan Kuaso Si Monen nan sadang manakua bamaleh-maleh mairuik teh talua ko jo pipet tesentak disapo Pak RK Monen : Eee..Pak RK...nggg..ambo yo suntuak bana pikiran kini Pak, sudah lah ndak tapiliah manjadi anggota Dewan, Harato lah tandeh, bini dibaok lari urang, ambo di PHK oto sedan nan tasiso lah dimaliang urang pulo..antah lah Pak RK lah galok se dunia ko den caliak kadang-kadang Pak RK : Waang salah ndak ? mamiliah biduak untuak mangantakan waang ka Sinayan.biduak tirih nan tatumpang dek waang ndak Monen : Dari sabanyak biduak nan ado Pak, lai den piliah Biduak nan santiang, cogah dan gagah indak kama ka dicari lai biduak saruman ko. Biduak pincalang tuo nan santiang bamain katiko ombak gadang jo badai, kok dapek angin jaan ditanyo mandorek sajo tu mah larinyo Pak RK : Apo biduak atau partai nan waang tumpang tu namonyo Monen Partai waden tu banamo Partai ASOKA banomor 45 tu Pak , waden piliah partai ASOKA ko dek waden iyo raso ka lai duduak di Sanayan kalau biduak ko den tumpang, namonyo sajo Partai ASOKA nan kapanjangannyo ASO ASO KA LAI Pak RK : Hi..hi..hi (sabanyo tabasuik galak Pak RK tapi inyo tahan dek manenggang perasaan si Monen kini ko agak Sensi Monen : Bato Pren..eh bato Pak bagalakan yo partai den Pak RK He..he..he sori Monen ..sori..sori..waang yo agak sensi kini mah, yo ibo lo waden mancaliak nasib malang waang mah, tapi nan waden baharok jaan sampai ka gaduik lo waang Monen : Kok dipikia-pikia lamo-lamo waden dek mangana untuang taruih Pak, bisa jadi sabulan ka muko waden lah tibo di gaduik mah, tapi caliak ko ha Koran Singgalang hari ko ado Gurindam nan baitnyo babunyi bantuak iko dek Apak "Dari pado pindah ka gaduik Bantuak urang gilo buntuik Elok dimintak surek hanyuik Ka muaro bia nak lucuik.." Pak RK : Apo lo hubungan bait Gurindan ko jo nasib malang waag Monen Monen : Nan waden yo takuik juo taganggu pikiran den, kini lai masih normal juo Pak alun tantu lai bisuak-bisuak, dari pado waden ka Gaduik baa kecek gurindam tu labiah rancak waden minta Surek Hanyuik, tapi nan den pikiakan Pak, dima mandapekan surek hanyuik ko, sia nan mangaluakan jo maneken, bia ndak lucuik parasaian malang den ko ka Muaro. Pak RK : Oooo..Surek Hanyuik nan waang minta ruponyo, ndak usah dipikia bana waden bisa mah manguluakan Surek Hanyuik tu, tingga waang baok sajo kakawan waden nan manjadi Kapalo Kampuang Batang Arau, surek ko waang baok sajo ka kawan den tu agiahkan ka inyo beko waang disuruahnyo mah hanyuik dari Ulu Batang Muaro sampai ka Muaro Padang Monen : Iyo bana tu Pak RK, lai balaku surek hanyuik apak tu, kok baitu mintalah waden surek tu dari pado waden ka Gaduik Pak RK yo agak tatagun mandanga jawek si Monen ko, padohal inyo bagarah untuak manghibur si Monen nan sadang suntuak dek indak loloih manjadi anggota Dewan "Paja ko nampaknyo mulai frustasi mah", bia lah den agiah SUREK HANYUIK nan sakti ka si Monen ko, mudah2an inyo bisa sadar saketek kalai iduik dunia ko banyak nan berarti jo bamanfaat dikarajokan, bunuah diri bukan jalan kalua nan elok. Pak RK : Kok bantuak itu kandak waang iyolah den agiah waang Surek Hanyuik, Aciak..ciak ....!!! minta karate salai jo pena lah Mak Aciak lah inyo unjuakan karate sahalai jo pena ka Pak RK, sampai ditangan Pak RK karate jo pena ko, inyo tulih diateh karate ko buek si Monen surek hanyuik ko, nan si Monen jo pandangan sarius malihek Pak RK manulih diateh karate ko. Surek Hanyui ko lah diteken dek Pak RK lalu inyo lipek elok-elok surek ko sudah tu inyo unjuakan ka tangan si Monen Pak RK : Iko surek hanyuik nan waang minta tu Monen, tapi jaan dibuka dimuko Waden Monen, lah pai waden dari kadai si Aciak ko baru waang buka, kok bantuak itu waden permisi dulu yo Monen : Jadi molah Pak, tarimo kasih surek hanyuik dari Pak RK, nan waden yo baharok kok lah basihanyuik di Batang Arau ko tibo di Muaro Padang hanyuik lucuik sagala baban susah nan tatimpo didiri den kini Pak RK lah indak ado di lapau si Aciak, samantaro si Monen sambia mamainkan pipet di teh taluanyo nan tingga satangah galeh, inyo buka "Surek Hanyuik" dari Pak RK, satalah dikambangkan karateh ko si Monen mulai mambaco "Surek Hanyuik" dari Pak RK nan babunyi "SUREK HANYUIK' buat Ananda Monen "Manusia memang boleh berharap dan berencana tentang apa saja, tetapi Allah jualah yang menentukan hasil akhirnya, Ananda Monen, seorang Mukmin yang meyakini Allah sebagai Tuhannya, juga harus meyakini bahwa Dia pula yang menentukan usia, jodoh dan rezeki dan segala ketetapan atas dirinya, termasuk datangnya musibah dan kekecewaan. Ananda Monen, Yang kita harus yakini adalah Allah tak akan membebankani seseorang diluar batas kesanggupannya" Ananda Monen DON'T GIVE UP..KEEP FIGHT ...!!!!!!!! Tertanda Bapak Rano Karno yang Ananda bilang "Kok Nggak mirip Salasai si Monen mambaco "Surek Hanyuik" untuaknyo nan dibuek Pak RK, si Monen tatagun jo wajah sadiah, mukonyo inyo layangkan ka langik-langik kadai Mak Aciak marabak aia matonyo lalu pacah mailia lambek aia mato ko ka pipinyo dari suduik palupuak matonyo ...antah apo nan inyo ingek dan bayangkan den si Monen. *** Pekanbaru, 2 Mei 2009 Catatan Mohon ijin kepada Dunsanak Yanto Jambak saya mengutip salah satu bait Gurindamnya yang berjudul MANGANA UNTUANG PS Pak Doktor Emi, kok buliah bakandak ambo untuak Kisah Si Monen no 8 tolong Pak Emi lain an malanjuikan, kaluakan Tauziyah mutiara hikmah saketek tantang "mangana untuang" nasib si Monen tokoh fiktif awak ko...ditunggu yo Pak Salamaik mambaco buek sanak2 RN tarutamo buek sanak-sanak nan sadang bakumpua di Rumah Da Rainal siang ko sambia manikmati makan siang jo Gulai Hitam sudah tu Badomino, ambo lai diundang dek sanak Miko tapi nan badan kito yo bajauhan nan dihhati lai raso kaduduak lo jo sanak-sanak di rumah Da Rainal, ambo hanyo titip salam sajo buek Uda Rainal dan Uni Yul, Insya Allah panjang umua dan ado razaki ambo tantu ka tajalang juo rumah Uda Rainal dan Uni Yul di JARKARTA he..he Wass-Jepe --~--~---------~--~----~------------~-------~--~----~ . Posting yg berasal dari Palanta RantauNet ini, jika dipublikasikan ditempat lain harap mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi/dibanned: - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama - DILARANG: 1. Email attachment, tawarkan disini & kirim melalui jalur pribadi; 2. Posting email besar dari 200KB; 3. One Liner =========================================================== Berhenti, kirim email kosong ke: [email protected] Untuk melakukan konfigurasi keanggotaan di: http://groups.google.com/group/RantauNet/subscribe -~----------~----~----~----~------~----~------~--~---
