Ass. Dunsanak palanta, mancogok baliak ambo panyambuang nyambuang nan minggu lalu, bak undang mamak juo.. didulang sadulang lai .pandulang ameh di bangko. di ulang sa ulang lai, panjapuik kaba minggu nan lamo..Kaba kok lai ka basimak, sajuak rasonyo dalam hati, tapi kok isi kurang rancak, toloang dek dunsanak pa elok i..
PASAN MAMAK II Kamanakan kanduang gadih nan jombang Pamenan mato ayah jo bundo Simakkan bana tarang tarang Surek mamak nan kaduo ko Indak ka banyak nan mamak sabuik Untuang kok lai nan baguno Hanyo sakadar pandangan hiduik Pangalaman nan mamak baco Didalam surek nan dahulu Lah mamak cubo manjalehkan Sia bana kamanakantu Babagai contoh di ibaratkan Umpamo tanaman suku Parak babateh bamintalak Cancang latiah urang tuo dahulu Takalo tuga ka dihantak Sabanyak bijo di kandang Di indang di tampi tareh Di piliah ka jadi tampang Di ambiak nan paliang boneh Bijo baiak nan baserakkan Balambuak jo kasiah sayang Kok lai elok ratak tangan Baputiak babungo kambang Buah diambiak katiruan Bungo ka jadi pamenan mato Ba urek balimbago matan Batang gadang badahan gampo Pucuak labek badaun rampak Barantiang barih jo balabeh Tampek basanda malapeh arak Disinan hauih dapek ureh Ureknyo ka tampek baselo Daun ka tampek rang balinduang Umpamo baringin di tanagah koto Pidoman lalu urang dikampuang Dek itu mamak batutua Pandai pandai manjago diri Daun rogek putiak kok layua Sio sio musim baganti Bukannyo ayah ma hituang jariah Kami indak mambilang jaso Kamanakan juo nan ka buliah Santano tumbuah samparono Lah ka nasib dek tanaman Apolai kok sadang babungo Ba bagai bagai macam godaan Indak nan elok ciek juo Umpamo ambacang jo cubadak Tampuak kuniang tando lah mangka Dima sajo urang tagak Baun harum lah manyeba Patuik bana kamanakan pahami Baa jariehnyo rang paladang Sajak limbago muloi jadi Sampai baputiak babungo kambang Nympang talambek hujan turun Tanam basiram patang jo pagi Muloi tumbuah sahalai daun Babagai ubek lah di cari Pupuak urea pupuak kandang Racun hamo lah tasadio Baa nak capek tanaman gadang Panek jo latiah indak di raso Sampai lah tumbuah nan bak kini Lah babuah saparo masak Di lua sanang Allahurabbi Di bathin cameh bagajolak Basangketo lahie jo bathin Babagai bagai gamang di raso Dicaliak parak urang lain Ba macam macam hamo manimpo Ado namonyo kutu lompek Ado nan wereang jo pianggang Baratuih macamnyo ulek Sakian pulo macamnyo kumbang Babagai gaya jo caronyo Dari nan haluih sampai nan kasa Indak nan elok ciek juo Kasadonyo babuah sasa Nan haluih masuak di urek Sampai ka putiaknyo manjala Di lua buah tampak bakilek Didalam busuak lah bata Ado nan kasa tarang tarangan Basayok hamo nan hinggok Indak doh usak dari tandan Tapi lah tandeh kanai cotok Nan paliang buruak kok di kaji Talengah ranggaek samalam sajo Talambek ayah ma awasi Isuak lah tingga sajo tampuaknyo Ayah baparak tapi labuah Iko bana mamak nan bedo Sadang mamajek urang lai namuah Koknon pulo tingga manjambo Usah talalu picayo diri Walau tumbuah kalindungan Sadangkan lai dalam lamari Dek mancik tandehnyo makan Walau parak paga balingkuang Tinggi sulik ka urang awai Sadangkan karambia batampuruang Cempoang dek gigi tupai Itulah ibarat jo umpamo Bukanyo cameh balabiahan Mamak mancaliak lai seso Konon lah ayah nan manggadangkan Walau buah baru manguniang Indak mungkin ka urang makan Kalaulah dendeang mangaja kuciang Basiso bana urang campakkan Kini sadang mangka di tandan Elok elok paliharo diri Usah tadayo dek pinggalan Kana sasa kudian hari Banyak hamo barabuik hinggok Jo ramo ramo nak sato pulo Kok kumbang mabuak manyasok Hamo ulek usah di baco Dek awak tumbuah tapi jalan Indak baragan urang ma hampie Paga kok randah jambo jamboan Alamat ka tandeh kanai gutia Buah gadang putiak talampau Lah mangka mangko ka bedo Ibarat lapeh di muluik harimau Muluik buayo lah mangango Kok siang di agah tupai Malam di intai kalilawa Sadangkan tinggi lai rang gagai Iko pulo tingga manyemba Dek sabab karano itu Elok elok mamacik tampuak Jan tamakan bujuak jo rayu Bara bana urang manjuluak Lah banyak contoh nan jaleh Dek ulah kanai rayuan Tampuak alun suko malapeh Badan lah jatuah dek pinggalan Nak arok capek ka karanjang Tampuak bagatah batinggakan Lai bana dimakan urang Lah bagigik baru rang campakkan Akhianyo jadi antimun bungkuak Manyasa urang mamakan Guno tak labiah ka panukuak Panambah nambah barek timbangan Lah abih dayo jo usaho Asa lai indak lupo jo diri Itulah takdir Nan Kuaso Sasa nan indak ado lai Bamacam macam pituah rang tuo Nan kajadi contoh jo tauladan Banyak ragam jo tambiahannyo Disurek ka tigo mamak jalehkan... Sampai kan salam mamak Kanenek jo anduang Walau dirantau mamak tagak Pangana tatap ka kampuang..............(bersambuang) Untuak dunsanak di palanta Ambo bukanlah urang bijak Lupo sakadar mangana ngana Kamanakan tangguang jawab awak... Kritik dan saran ambo tunggu Ka jadi tukuak jo tambahnyo Insyaallah satiok minggu Di Palantako kito basuo.. Wss Yanto Jambak (Yan Mj Basa). --~--~---------~--~----~------------~-------~--~----~ . Posting yg berasal dari Palanta RantauNet ini, jika dipublikasikan ditempat lain harap mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi/dibanned: - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama - DILARANG: 1. Email attachment, tawarkan disini & kirim melalui jalur pribadi; 2. Posting email besar dari 200KB; 3. One Liner =========================================================== Berhenti, kirim email kosong ke: [email protected] Untuk melakukan konfigurasi keanggotaan di: http://groups.google.com/group/RantauNet/subscribe -~----------~----~----~----~------~----~------~--~---
