Assalamu'alaikum warahmatullahi wabarakaatuh,
Manolah adidunsanak di lapau..
Iko adolah pangalaman ambo kutiko partamo kali masuak ka rimbo Bukik
Barisan. Dek urang kampuang rimbo tun dinamoan Rimbo Manduang. Mulai bajalan
dari rumah nenek nan talatak di tapi bukik sonsang..mangitari bukik taruih
bajalan ka arah matoari tabanam..mulai banyak tanaman pandan utan nan daunno
panjang panjang disabalah kida jalan satapak tu, di sabalah suok sampai mato
dipandangkan sapai tatumbuak di bukik durian, sawah nan sudah baru
basabik..banyak urang nan sadang mairiak padi..bajua bareh untuak pambali
bareh..lho kok gitu? Ya iyalah..bareh yg di jua sakaruang bisa dibalian
bareh duo karuang..dek kwalitas yang jauah babeda..
Taruih bajalan mulailah jalan naiak turun mulai masuak ka dalam rimbo,
ditapi jalan tabiang maampang. Kadang ado jurang kadang lanyah tampek aia
lalu. Di dalam rimbo sabana sambuang aia tabik dari dindiang tabiang, banyak
mato aia nan taandok, dek urang kampuang di agiah paralon dari batuang aia
tun dialiakan dari dindiang-dindiang tabiang tun sampai ka musajik di tangah
kampuang. Sadono urang buliah maambiak aia tu..gretong..alias ra sah
mbayar..Jadi ingek jo aia di rumah nan mati taruih tiok hari iduikpun duo
kali sahari padohal perusahaan yang mengelola adolah kerjasama technology
jerman jo singapur. Satali tigo uang PLN, dek alas an Gas Negara ndak
dipasok, mako sadonyo kawasan di batam ko kini byar pet 2 kali sahari..cando
makan ubek galigato sen..antahlah..ka jadi apo batam ko..
Samakin ka dalam rimbo, batambah labek batang kayu nan nampak, banyak lo
bungo-bungo lia nan rancak-rancak, jajak binatang cando tapak kabau banyak
mambakeh di satapak nan agak lanyah lambok banyak tumbuah lumuik taba..
Sadang bajalan kami ado nampak binatang rimbo ketek nan pas ambo tanyo ka
Papa apo namonyo, Laka-laka namonyo, bantuaknyo sarupo kaki saribu tapi
labiah pendek gapuak, pas di kaca lansuangnyo mangguluang mambulek cando
kalereang.. ambo main2an sapanjang bajalan di rimbo tun.
Banyak batang kayu nan nampak, ndak tantu apo namonyo doh..tapi nan ambo
ingek ado batang kayu gadang nan daun no laweh laweh cando daun jati..nan
iko ko namonyo jilatang. Takanai daunno mati kagataran kato Papa manarangan.
Ado lo mode rumpun langkueh tapi dek suburnyo mungkin, batangnyo
tinggi-tinggi ado kuncup bungonyo kalua dari dalam tanah nan kudian ambo tau
itu adolah bumbu masak yang lezat banamo kincuang. Ambo ambiak lo untuak
baalek-alek.
Oiyo..lupo maagiah tau baso kami ukatu tu masuak rimbo ado 6 urang, 3 urang
abang kanduang ambo, Papa trus surang lain nan punyo tanah kabun yang
kabunnyo ditanami cengkeh dek Papa jo system bagi hasil. Eh tantunyo ambo
nan paliang kenek..memang kenek..barek ambo ukatu tu baru 17 kg dan usia
ambo sangkek tu 6 tahun, baru sakolah TK Nol Besar TK Tunas Mekar.Bekal kami
ukatu tu ado nasi tungkuih jo daun pisang, lauaknyo talua balado campua maco
arai.Di masuak an Mama di rumah ka tas masiang2 nan harus diangkuik
sorang-sorang.supayo adia kato Mama..
Lah ampia sajam bajalan ambopun ndak talok mangayuahan kaki laih.. dek jalan
nan mandaki..tabik aguik..dek mulai lain kurenah ambo batanyo Papa : Baa
Piak (Piak asalnyo dari kato Upiak panggilan untuak anak kaciak padusi di
MInang, namun Papa ambo tatap maimbau Piak sampai kiniko hehe)..ndak tagarai
dek gau laih doh? Sambia duduak Papa manyuruah ambo naiak ka pungguang
Liau..hehe.. jo malu2 ambo naiak gendong ka papa..caliak2 kalo2 Abang2
mancaliak ka bulakang..eh..ndak lamo yoo mancalaiak si Cudek (Abang paliang
tuo nan kini jadi dokter) Ndee yoo cadiak gau yo Piak..kecek Abang..taranga
lo di si Kenop (Abang No. 2 ) sato lo manggalak an ambo abang No. 3..ndak
ado laih..lansuang ambo turun dari pungguang Papa jalan baliak
dulu-dulu..mandului Abang2 bocet tu.haha..
Tibo di pasawangan nan di tampek tu banyak ditanam urang padi..padinyo
sadang elok ka disabik..ambo tanyo ka Papa..sia nan mananam ko Pa? jalanlah
taruih lai rumah pondok Mak ........ (lupo namo Inyiak Tun) liau tukang
tontong saisuak mah, kato Papa. Mulai banyak batang pisang, mangga kuini,
kalikih, jo cengkeh bagai mulai nampak..tibolah kami di laman Inyiak tu,
kironyo INyiak tu lai kenal jo Papa. Sambia papa sibuk maota-ota jo Inyiak
Tontong tun kami sibuk mancuboan Tontong nan masih rancak tagantuang di muko
burando Pondok Inyiak tun..O iyo nan Tontong ko adolah kayu bulek nan gowong
di tangahnyo. Kalau di tokok bagauang bunino jauah Taranga no.. Carito Papa
tontong ko bajaso banyak kutiko maso parang saisuak.. Buni tontong di
rimbo..tando serangan udara dimulai..masuak ka dalam liang nan dibuek di
dalam parak di dakek rumah, ado jo nan dibuek di dalam kandang rumah
(dibawah rumah, biasono dipagunoan utk bataranak ayam jo itiak) Nah kutiko
serangan udara alah dibunian tontong sado alah urang padusi jo anak2 masuak
ka dalam lubang ditutuik jo kasua taba balampih lampih.. Kalau lah salasai
serangan udara.. giliran anak2 kaciak mambaok kibang mangumpuan salonsong
paluru untuak main alek-alek..mantun carito nenek ambo..
Jadi sabana gadang jaso Inyiak Tontong ko kutiko parang saisuak.. sampai
alah merdeka nagari.. tatap juo Inyiak tu barumah di tangah rimbo
tun.Mungkin dek damainyo di tangah rimbo tu kali.. lah basahabat Inyiak tu
jo Ula gadang, baruak gadang, siamang kah, kundiak dan lain-lain..Dek jajak
mereka tu banyak kami nampak..ado cieklah..Siamang..nan kami imbau
umboh-umboh.sangaiklah banyak bunino dari jauah...
Tujuan kami nak ka lading cengkeh tingga malampaui pasangan tun jo bukik
ciek laih..
Tapi... to be continued.
Wassalam
Rina, 32, batam
--~--~---------~--~----~------------~-------~--~----~
.
Posting yg berasal dari Palanta RantauNet ini, jika dipublikasikan ditempat
lain harap mencantumkan sumbernya: ~dari Palanta r...@ntaunet
http://groups.google.com/group/RantauNet/~
===========================================================
UNTUK DIPERHATIKAN, melanggar akan dimoderasi/dibanned:
- Anggota WAJIB mematuhi peraturan serta mengirim biodata! Lihat di:
http://groups.google.com/group/RantauNet/web/peraturan-rantaunet
- Tulis Nama, Umur & Lokasi pada setiap posting
- Hapus footer & seluruh bagian tdk perlu dalam melakukan reply
- Untuk topik/subjek baru buat email baru, tidak dengan mereply email lama
- DILARANG: 1. Email attachment, tawarkan disini & kirim melalui jalur pribadi;
2. Posting email besar dari 200KB; 3. One Liner
===========================================================
Berhenti, kirim email kosong ke: [email protected]
Untuk melakukan konfigurasi keanggotaan di:
http://groups.google.com/group/RantauNet/subscribe
-~----------~----~----~----~------~----~------~--~---
