Ass..
Sabagai panambah nambah topik nan kajadi buah ota di palanta kito ko,
ambo cubo pulo manyampaikan pandangan nan sasuai tantunyo jo kacomato
ambo, tarutamo dengan caro panyampaian dalam bantuak karya tulisan
yang ambo sendiri indak tantu apo namonyo, karano disiko ambo hanyo
barusaho manyampaikan pandangan sarato apo nan ambo rasokan dengan
lebih mengutamokan seni batutua jo bacurito.
Untuak itu, mudah mudahan apo nan ambo sampaikanko lai tatarimo dek
dunsanak dan labiah dari itu, dapek pulo di mangarati dan dipahami
kama arah curitonyo.
Pangalaman hiduik dirantau urang tantunyo bamacam macam sifat manusia
nan pernah kito alami.
Indak ado mukasuik nak manyingguang jo manggisie....iko samato mato
panyambuang carito MANGANA UNTUANG nan pernah ambo sampaikan di
palantako..kok salah tantu samato dari ambo, bana nan datang dari
Illahi....tapi kok ado nan maraso iyo kabaan juo lai ubah silah sifat
nan buruaktu.
Caritoko ambo bari judul SUREK HANYUIK mudah mudahan sekaligus bisa
manjawek pertanyaan dari salah surang dunsanak kito, apo nan
dimukasuik jo surek hanyuikko dan kama kito patuik mintak surekko dan
sia pulo nan manando tanganinyo.......
SUREK HANYUIK
(ratok ikan di kubangan tuhua)
Babagai cobaan lah dirasokan.
Antah kok lalok dalam kubua.
Ratok ikan toloang dangakan
Sadang marauang di tabek tuhua.
Sajak di lubuak sungai dareh.
Hiduik di salo batu gadang.
Di hulu tubo rang lapeh.
Di baruah jalo tarantang.
Katangah tikalak makan.
Di tapi papeh batali.
Ka lubang batu suruakkan badan.
Basilang uriak jo panggali.
Antah tabao elok dek buruak.
Lah sulik badan manjalehkan.
Tapiliah badan di salo tangguak.
Di aquarium urang latakkan.
Rumah bakaco bakuliliang.
Makan basilieh patang pagi.
Ulek cibuak sampai jo caciang.
Barabuik urang nak mambari.
Kroto jo taluak samuik.
Cancilung makanan japang.
Nasi kunyik indak basabuik.
Indak mancubo rimah tabuang.
Sisiek bakilek ka amehan.
Mabuak malayang kian kamari.
Indak maraso kapanehan.
Indak mancaliak matohari.
Bakawan jo bungo joloang kambang.
Talatak di ruang muko.
Pananti tamu nan datang.
Ka kawan duduak di barando.
Tahun abih bulan bajalan.
Badan batambah dimakan umua.
Datang arwana dari irian.
Duduak rang aliah tagak rang ansua.
Dibuekkan tabek dakek sumua.
Ganti panampuang siso mandi.
Hiduiklah dulu jo sarok dapua.
Malakik badan ka kuali.
Tabek salaweh daun kunyik.
Dalamnyo sa jangka bagi duo.
Ma hangok sajo indak talakik.
Usah baranang ka dibaco.
Pagi pagi di daruah itiek.
Malam malam kuciang manjago.
Dagiang abih sisiek lah masiek.
Babaluik litak jo urek banto.
Ado bana rimah tabuang.
Tunggulah dulu siso ayam.
Lai bana urang nan datang.
Kasadonyo bantuak malapeh dandam.
Datang urang barami rami.
Di sangko lai ka ibo.
Nyo rantangkan buayan batali.
Umpan basanggo di ujuangnyo.
Tabek sagadang tapak tangan.
Barabuik papeh nan masuak.
Kurang juo urang rasokan.
Batambah pulo jo tangguak buruak.
Sampai bana hati tuan.
Bak cando dandam tak kunjuang abih.
Jo rimah makan denai ba umpan.
Dalam pujuak bapatangih.
Ka lunau litak den suruakkan.
Jo tuan kanyang raso tak mungkin.
Den lulua bana umpan tuan.
Tampan kajadi ikan asin.
Kok sampai bana ka kuali.
Raso tak mungkin masuak piriang.
Tuan biaso jo tanggiri.
Antah kok jadi umpan kuciang.
Denai lah tau jo laku tuan.
Tuan hanyo dek nafasu.
Kok dapek bana indak bamakan.
Dek tuan ganyuik nan paralu.
Kok tau gambolo jo ambu ambu.
Kamalah malu tuan suruakkan.
Putuih papeh di pulau saribu.
Ka tabek tuhua babalehkan.
Usah lai umpan ka denai makan
Manggutie sajo bialah indak
Tangguang lah doso dek tuan
Sumpah babisiek ikan litak
Kok tau denai dari sa isuak
Cando iko bana nasib hiduik
Katiko dulu masih dilubuak
Elok den mintak SUREK HANYUIK…
Tabek ketek , 10052009.
Y Jambak/Yan Majo Basa
Gurindampusako.blogspot.com
--~--~---------~--~----~------------~-------~--~----~
.
Posting yg berasal dari Palanta RantauNet ini, jika dipublikasikan ditempat
lain harap mencantumkan sumbernya: ~dari Palanta r...@ntaunet
http://groups.google.com/group/RantauNet/~
===========================================================
UNTUK DIPERHATIKAN, melanggar akan dimoderasi/dibanned:
- Anggota WAJIB mematuhi peraturan serta mengirim biodata! Lihat di:
http://groups.google.com/group/RantauNet/web/peraturan-rantaunet
- Tulis Nama, Umur & Lokasi pada setiap posting
- Hapus footer & seluruh bagian tdk perlu dalam melakukan reply
- Untuk topik/subjek baru buat email baru, tidak dengan mereply email lama
- DILARANG: 1. Email attachment, tawarkan disini & kirim melalui jalur pribadi;
2. Posting email besar dari 200KB; 3. One Liner
===========================================================
Berhenti, kirim email kosong ke: [email protected]
Untuk melakukan konfigurasi keanggotaan di:
http://groups.google.com/group/RantauNet/subscribe
-~----------~----~----~----~------~----~------~--~---
