Assalamualaikum w.w. para sanak sapalanta, Alah samo-samo kito baco macam-macam pangalaman pribadi para sanak kito warga RN dalam kontak jo 'dunia lain' tu. Umumnyo kontak tu sasakali sajo, ado nan indak manggaduah -- sarupo pangalaman Sanak Lembang Alam -- dan ado pulo nan manggaduah dan manakuik-nakuiki, dan kalau kito indak suko, jo mambaco ayat-ayat Quran, 'baliau-baliau' tu amuah atau tapaso pai. Kini ambo curitokan pangalaman pribadi ambo nan kaduo, tahun 1955, wakatu ambo baumua 18 tahun, di tampek kos ambo di Jalan Bumijo Lor 18, Yogyakarta. Wakatu ambo masuak ka tampek kos, tuan rumah sadang sakik kareh di RS Bethesda, dan saminggu susudah tu, baliau meninggal dunia. Kami anak-anak kos basamo-samo pai maantakan jenazah baliau ka pakuburan. Indak lamo sasudah tu, anak-anak Jawa nan samo-samo in de kos jo ambo, main 'jailangkung', yaitu salah satu pamainan urang Jawa untuk mandatangkan ruh urang mati, nan bisa ditanyoi macam-macam, saroman sia pacar sasaurang atau dima latak barang nan hilang. Hampia saroman jo 'nini towok' nan mamakai galuak batangkai. Alat untuak main jailangkuang ko adolah karanjang rotan batangkai, di ateh tangkai dipasang hio Cino nan ujuangnyo alah dipanggang. Karanjang tu dipasangkan baju kemeja, dan dibuek tangkai untuak mamasang alat tulih sarupo kapua. Di muko karanjang dilatakkan papan tulih ketek, tampek karanjang jailangkung tu manulih untuak manjawab pertanyaan hadirin. Sabagai paja matah nan baru datang dari Sumbar, tantu sajo ambo tacangang-cangang sajo mancaliak permainan ko, hampia-hampia indak picayo. Tapi indak picayo indak pulo mudah, karano nampak karanjang nan alah didoakan dek pawang tu memang manggarik-garik surang, dan manulih untuak manjawab macam-macam pertanyaan hadirin. Dek palak, antaro picayo jo indak, ambo mintak sato mamacik karanjang tu, dan diizinkan dek pawangnyo. Eh, sasudah dibacokan mantera tu, indak ado ruh nan masuak. Wakatu ambo tanyo baa kok indak ado roh nan masuak, dijawabnyo: "Mungkin Saudara tak percaya." Ambo jawab iyo ambo indak picayo, tapi okelah, kalau memang ado ambo picayo. Baru sasudah tu masuaklah ruh tu ka karanjang. Taraso masuaknyo, bareknyo kiro-kiro sabungkuih rokok. Wakatu ditanyo sia nan masuak, kapua di ujuang karanjang tu manulih: "Mugni'. Sasudah tapana sabanta, nyonya rumah marauang, karano namo 'Mugni' tu adolah namo bapak tuan rumah kos nan baru maningga minggu lalu. Ambo nan sadang mamacik karanjang tu indak tahu ojok apo nan ka ambo pabuek. Untuang sasudah tu karanjang manggarik, manulihkan :"Bu, meneng." Karano ambo alun pandai bahaso Jawa, ambo tanyokan apo aratinyo 'meneng' tu, dan dijawab dek pawang, aratinyo 'antoklah'. Sasudah hadirin agak tanang, eh ruh si mati tu minta diantakan ka dapua, sudah tu ka kamarnyo, dan paliang akhir minta dikambangkan koran 'Nasional' kasukaan baliau kutiko iduik. Tapasolah ambo maangkek karanjang tu ka dapua, ka kamar tidua, jo mamacikkan koran 'Nasional'. Sasudah pueh nampaknyo, baru ruh si mati amuah pai. Ambo basyukur bana, karano salamo tu indak tantu parasaan ambo ko, antaro heran jo takuik, karano ado kalonyo si ruh tu mintak diantaan ka pakuburannyo, padohal hari alah malam, hiiiii. Sampai kini ambo taheran-heran juo jo pamainan ruh urang mati ko. Kabanyo di Ambon ado pulo pamainan nan hampia sarupo, banamo -- kalau ambo indak salah -- 'bambu gila'. Bak kato pepatah, dunia memang banyak kiramaiknyo. Indak sadonyo tajangkau jo aka. Baa penjelasan dan hukumnyo manuruik agamo, ambo serahkan ka nan ahli, sarupo Buya Mas'oed atau Sanak Ahmad Ridha. Nan pasti, jo mangucap ayat-ayat Quran, insya Allah kito salamaik dari 'oknum dunia lain' nan manggaduah tu..
Wassalam, Saafroedin Bahar (L, masuk 72 th, Jakarta) --~--~---------~--~----~------------~-------~--~----~ . Posting yg berasal dari Palanta RantauNet ini, jika dipublikasikan ditempat lain harap mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi/dibanned: - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama - DILARANG: 1. Email attachment, tawarkan disini & kirim melalui jalur pribadi; 2. Posting email besar dari 200KB; 3. One Liner =========================================================== Berhenti, kirim email kosong ke: [email protected] Untuk melakukan konfigurasi keanggotaan di: http://groups.google.com/group/RantauNet/subscribe -~----------~----~----~----~------~----~------~--~---
