Ass. dunsanak palanta, babarapo bulan yang lalu katiko bpk Presiden mangumandangkan 100 tahun Indonesia Bangkit waktu itu ambo dapek inspirasi untuak manulih sabuah gurindam dengan tema bangkit itu sandiri.. mudah mudahan apo nan takanduang dalam goresanko cukup inspiratip pulo utk dunsanak agar iyo bana bana bangkik walau sabarek apopun nan ma impik. Salam sajo utkkasadonyo…………………..!! BANGKIK Saratuih tahun Indonesia bangkik Baitu tadanga bunyi pekik Lewat coroang lewat mik Sarato media elektronik
Tapi itu hanyo politik Indak labiah sakadar trick Untuak ma aliahkan topik Dari persoalan nan pelik Ibarat mangapik daun kunyik Kagincu bibia ibarat lipstick Padohal hanyo intrik Manyanangkan hati publik Baliau mangaku urang elit Tapi parangai kurang simpatik Saliang kritik mangiritik Bukan mancari yang terbaik Main sundak main sundik Basirabuik basirigik Mabuak manciringik Saliang ikik ma ikik Kasalahan urang ba utak atik Walau hanyo sagadang rangik Kasalahan awak ba himpik himpik Lah nyato sagadang bukik Awaklah nyato tukang salidik Tapi kini kanai sidik Antah iyo dek golf jo stick Antah batua dek cewek cantik Dek ulah nan sapinjik Maliang indak baparingik Urek tunggang nan ta ungkik Kinilah jungkang jungkik Itulah ciri urang munafik Talunjuak luruih kalingkiang bakaik Di lua lapang di dalam sampik Muluik manih ati paik Katiko di lua BBM malanjik Haragonyo cukuik pantastik Mako untuak tingkek domestik Harus dikurangi subsidi listrik Baitu manuruik statistik Ibarat alah ba uji balistik Minyak tanah solar jo premik Tapaso pulo harus naik Tapi dek pandai main taktik Tarutamo jo urang pabirik Tatap sajo ado nan ingkik Salah satunyo group mak taufik Katiko timbua polemik kasadonyo sibuk ba kelik Kalua hitungan matematik Tambah jo kurang bolak balik Kadang pandainyo mangilik Antar suku antar etnik Nyo adu islam jo katolik Nyo adu Madura jo sampik Dima hati indak ka sakik Timbua banci tibo bingik Kok nan kayo lagunyo tengik Urang nyo ago jo ringgik Awak kayo ceke balapik Pitih banyak tapi sampilik Hari hujan payuang ba kapik Tagageh kereta ba irik Otonyo ba dirik dirik Nan otomatis jo automatik Diawak sepeda ba karidik Tibo mandaki kadang bairik Santano carito kito ungkik Sajak dari matohari tabik Sampai kalua bulan sabik Indak baranti kito manggarik Tatap sajo hiduik tahimpik Suok kida lah tasapik Kasadonyo serba sulik Sahinggo dunia taraso kicik Usah lai nak ka bangkik Duduak sajo pinggang lah rangkik Bajalan lah bangkak tumik Mahangok sajo indak talakik Dicaliak padi abih dek mancik Ikan lah tandeh kanai piarik Kabau jo jawi masuak parik Anak lah bantuak kanai palasik Dicubo baparak sawik Katiko tingga di tanjuang balik Di urang ba hektar bakubik Diawak salaweh daun kunyik Dicubo jadi tukang arik Masuak lurah kalua parik Masin senso nan ba irik Dek lengah ta arik tumik Di bao barubek ka klinik Kok lai dapek ubek generik Salah awai salah pacik Salah ubek salah suntik Salah resep di apotik Dimintak anti biotik Nyo barikan balpirik Akhianyo paluah mangaricik Di aliah rantau ka tasik Dicubo manggaleh bahan kulik Lah naiak sampan turun rakik Nan tabao malah si nyaik Dicubo jadi tukang jaik Konpeksi pakaian batik Lah panek tunggang tunggik Ta hutang juo bayie listrik Di urang kadai lah bakaramik Jaiknyo lah masuak butik Di awak masih ba aleh plastik Bakaki limo di mayestik Dicubo mambuek kripik Lah sampai tangan tasaik Kalah awak jo si encik Nan manjua elektronik Anak jo bini ba si ansik Indak dapek mintak ancik Bakandak pariuak magig Dima awak indak ka panik Jikok dicaliak urang sabalik Kok tabek lah babangkik Kok sawahnyo lah manyabik Lah masuak karuang masuak sumpik Lai awaknyo gabik gabik Lah dakek nyo tuncik tuncik Lah jaleh rumah balancik lancik Sampai lupo karik jo barik Mangaku bagala syekh siddik Tapi batingkah musyrik Pacayo hantu jo mistik Basuo lari tabirik birik Pai ka makah ba tirik tirik Saroban balimpik limpik Nyo kawini paja kicik Iyo bana mariangik Anak gadih indak tapingik Lah main ka bar jo diskotik Sajak muloi wakatu mugarik Sampai matohari tabik Mabuak bagoyang asyik Bajoged ma injak injik Maniru gaya dewi persik Keceknyo itu goyang remix Kain laweh nyo pakicik Baju lapang nyo pa sampik Diateh kapalo balilik Dibawah lah ta singik Jo bujang bakapik kapik Kama paik ba kundak kundik Mato lia malirak lirik Bantuak kuciang nampak mancik Jakun manggarik garik Muncuang manggaribik Abuak gaya si jabrik Keceknyo itu nan nyentrik Lah bantuak kalamai jo ajik Sarupo gatah di palik Antah gendak antah gundik Cando basi kanai magnik Sarawa rancak ba saik saik Talingo jo hiduang nan batindik Keceknyo itu identik Tandonyo anak musik Abuak sirah bantuak wig Basorak basuik –suik Galak mangakak ngikik Bantuak urang dipantak listrik Lah abih gali dek galitik Labah gilo basangko rangik Akhianyo paruik mambuncik Dek ulah kanai pantik Kadang ekstasi nan nyo racik Putauw nan ba suntik Sampai ma angok indak talakik Akhianyo pindah ka kamar mayik Awak lah nyato buruang pipik Main sahinggo langik langik Tabang ndak jauah dari parik Makanan alang nan bagigik Bak cando buruang silindik Balari satiok minik Disangko awak lah ikik Tanyato sangka lah urang kaik Cito cito satinggi langik Harapan sagadang bukik Makan banyak mancari sarik Karengkang gadang badan kicik Suko balega di nan sampik Suko bakandak di nan sarik Dima urang tapidik Disitu badan manyalingkik Incek mato tabulancik Kalau maliek nan takalipik Parangai mantiko cirik Samo sajo jo gacik Ingua sajo indak talacik Sadonyo urang ka balandik Main pisau main badik Main ladiang main clurik Mangaku tamat islamic Pandai mangaji jo tajuwik Mangarati makna jo tasadik Fasiah pidato jo tablig Kini ndak lai pandai wirik Lah lupo imam jo katik Indak lai tantu jo ratik Lah tingga surau jo musajik Iko dek kurang asuah jo didik Ayah lah sibuk ba politik Mandeh arisan barang antik Kok mamak lidah lah tagigik Akhianyo anak bak kato bibik Kadang marasai kanai cubik Tiok hari makan sayua dalidik Akhianyo mato batambah sipik Lah gadang kurang sopan taratik Lah hilang pidoman ka bapacik Karajo indak nan galik Dek utaknyo lah takilik Dek ulah masak ba karibik Ibarat tanaman hidroponik Indak mandapek hujan sangik Akhianyo lain genetik Ikolah kaba sakalumik Satantangan judul jo topik Bukan mancari ilik ilik Hanyo sakadar paisi rubrik Panambah wawasan publik Anggap sajo mambaco komik Sambia mahiruik kopi mix Dek maota indak talakik Ibarat tanah ba status girik Sadang di urus jadi hak milik Toloang jan di utak atik Yanto Jambak panek mangetik Santano kurang koma jo titik Kurang elok kurang baik Atau malanggar kode etik Jan pulo ambo di culik 16052009. [email protected] Yantojambak.blogspot.com --~--~---------~--~----~------------~-------~--~----~ . Posting yg berasal dari Palanta RantauNet ini, jika dipublikasikan ditempat lain harap mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi/dibanned: - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama - DILARANG: 1. Email attachment, tawarkan disini & kirim melalui jalur pribadi; 2. Posting email besar dari 200KB; 3. One Liner =========================================================== Berhenti, kirim email kosong ke: [email protected] Untuk melakukan konfigurasi keanggotaan di: http://groups.google.com/group/RantauNet/subscribe -~----------~----~----~----~------~----~------~--~---
