Assalamualaikum, Wr. Wb
Satiok ppstongan Sanak Yanto selalu Uni copy paste dan difile. Raso sanang bana Uni baraja ciek ciek bait gurindam Pasan Mamak ko. Tantunyo akan menjadi perhatian Uni untuk mendapatkan " minang nan sabana minang :. Indak gampang bagi nan mambueknyo dan ciek demi ciek Uni pahami. Terus semangat Sanak. Hanya saja mungkin perlu dibuat per topik - agar mudah kita memahaminya.. Atau mungkin uni yang agak sulit memahaminya.. Dari tutur kata inilah bertambah perbendaharaan kata - kata minang itu bagi Uni. Wassalam, Evy Nizhamul (Kawasan Puspiptek, Serpong, Tangerang) http://hyvny.wordpress.com http://bundokanduang.wordpress.com --- On Sat, 5/30/09, yanto jambak <yantojam...@gmail.com> wrote: From: yanto jambak <yantojam...@gmail.com> Subject: [...@ntau-net] Pasan Mamak VI To: "RantauNet" <RantauNet@googlegroups.com> Date: Saturday, May 30, 2009, 6:10 AM Ass. dunsanak palanta,ambo batarimo kasih sakali kapado seluruh dunsanak nan alah mambarikan tanggapan ateh tulisan apo nan ambo tulih, sarupo nan disampaikan dek salah seorang mamak kito (K.Suhaemi) dalam menanggapi karya tulis dunsanak..nan lain karano memang indak ado kebahagian nan labiah dari seorang pelaku seni , selain hasil karyanyo itu dibaca,dikagumi dan ditanggapi oleh orang lain, apapun bentuk dan jenis karyanyo. sekali lai tarimo kasih diantaro lain kapado dunsanak, Jepe, Tan Lembang, uni Evi Nz, Datuak Arief, Budiman dan banyak lai dunsanak lainnyo nan idk tasabuikkan ciek parsatu dalam kesempatanko, mari kito ramikan dan kito isi Palanta ko jo karya - karya nan positip dan mudah mudahan bamanfaat tantunyo, minimal untuak generasi nan mudo...Wss. PASAN MAMAK VI Kamanakan juo kato mamak Alun pueh mamak batutua Sabuah lai cubolah simak Kaganti pamenan tidua Banyak istilah kito di minang Manggambarkan kaum rang padusi Jikok disibak tarang tarang Sarek makna jo arati Dalam surek nan ka anamko Ka mamak cubo manjalehkan Ka buah tutua dek urang tuo Gurindam adat mangatokan Tigo macamnyo parampuan Nan jadi pameo dalam kampuang Jikok di inok dipikiakan Indak sadonyo nan bundo kanduang Nan partamo parampuan simarewan Kaduo mambang tali awan Katigo baru parampuan Danga di kamanakan mamak uraikan Nan disabuik simarewan Kurang adat kurang taratik Jarang baso jauah sopan Hiduik sarupo mambalakang ka langik Bakoroang kampuang indak jaleh Jo tetangga indak paduli Tukang asuang silangkaneh Pambuek cabuah dalam nagari Adat indak nyo isi Limbago indaknyo tuang Bak cando hiduik indak kamati Dunia bak katonyo surang Basutan dimato barajo dihati Durako kapado ibu jo bapak Himbau nan indak nyo sahuti Sakali suruah saribu anggak Dek ranggaek indak ta tagah Dek laki indak ta ambekan Acok dilua pado dirumah Rumah tangga nyo abaikan Lupo diri lupo jo malu Awak lah ibu rumah tanggo Kadang laki basangko babu Awak bak cando juragannyo Indak mamikie hiduik susah Taunyo ado jo cukuik Usah disabuik badan salah Amuah baparang adu muluik Usah ditiru nan bak kian Dunia akhirat kamakan cilako Ba pandai dalam pargaulan Pandai manjago rumah tanggo Nan ka duo kok dibaco Banamo mambang tali awan Saroman balain rupo Sairiang batuka jalan Kok mangecek pantang kalah Bak cando awak nan paliang santiang Tinggi hati somboang jo pongah Pantang bana ka tagandiang Bunyi tutua marandang kacang Indak manaruah paruik lipek Indak ma agak jo manenggang Urang mandanga ka ma upek Kok ma ota barami rami Mancaritokan laki surang Nan sayangnyo Allahurabbi Sagalonyo labieh dari urang Indak bacacek saketek juo Indak samo jo laki urang Lah tingga tulang jo kulik sajo Bakatokan juo paliang sanang Kahilie mudiak ma ajan tuah Mamanggakkan apo nan punyo Laki lah cando sapi parah Awak mabuak manyasok juo. Nan katigo di sabuik parampuan Iko lah istri nan saleha Tau di malu dengan sopan Mamakaikan adat jo budaya Lamah lambuik kok batutua Budi elok laku katuju Rahasio dapua sumua jo kasua Urang lain ndak paralu tau Nan tuo bamuliakan Nan ketek dikasihi Pandai bagarah bakucindan Taat ibadat jo mangaji Bijaksana kato rang kini Pandai malenggang dinan sampik Tau manjago hati laki Paham bana hiduik nan sulik Balayie biduak silenggang Karucuik jo saliguri Di nan rumik pandai batenggang Tando bamain aka jo budi Limpapeh rumah nan gadang Sumarak anjuang paranginan Samo maraso sakik jo sanang Ka jadi suri jo tauladan Malabihi ma ancak ancak Mangurangi sio sio Tau di bateh jo agak Tandonyo paham jo kiro kiro Ikolah sipat nan ka ditiru Nak salamat dinie akhirat Tapaliharo tingkah jo laku Tandonyo padusi ba martabat Urang bijak mangatokan Harato jo kakayaan Hanyo mampu ma sejahterakan Tapi bukan mam bahagikan Nan kayo sasungguahnyo Urang nan pandai mansyukuri Bijak menikmati hasie usaho Disinan bahagia nan hakiki Mudah mudahan nan mamak sampaikan Isuak untuang gadang gunonyo Insyaallah kamanakan rasokan Kok untuang dek kami tacaliak juo Lah limo surek dari mamak Pasan ka anam jo nan kini Santano ado nan kurang bijak Anggap itu koreksi diri Insyaallah minggu di muko Ka mamak cubo manambahkan Ka mamak tuangkan isi teko Salamo galeh kamanakan tadangkan. Sampaikan salam mamak Karik jo barik di kampuang kito Santano hari rayo pulang indak Cinto di hati barubah tido.......! (bersambung) 30052009. yantojam...@gmail.com. --~--~---------~--~----~------------~-------~--~----~ . --~--~---------~--~----~------------~-------~--~----~ . Posting yg berasal dari Palanta RantauNet ini, jika dipublikasikan ditempat lain harap mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi/dibanned: - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama - DILARANG: 1. Email attachment, tawarkan disini & kirim melalui jalur pribadi; 2. Posting email besar dari 200KB; 3. One Liner =========================================================== Berhenti, kirim email kosong ke: rantaunet-unsubscr...@googlegroups.com Untuk melakukan konfigurasi keanggotaan di: http://groups.google.com/group/RantauNet/subscribe -~----------~----~----~----~------~----~------~--~---