Minggu, 31 May 2009 http://www.hariansinggalang.co.id/index.php?mod=detail_berita.php&id=1834
Tajadi debat nan agak sengit di lapau Uwo. Masalahnyo bamulo dari barita nan mangatokan masyarakat Minang mandukuang sapasang calon presiden. Dek saparo urang-urang tu, soal dukuang mandukuang dan soal pilihan adolah hak pribadi surang-surang. Tapi nan indak ditarimonyo adolah nan mangatokan masyarakaik. Karano, kalau lah mangatokan itu masyarakaik Minang, dalam pangana urang-urang tu saluruh manusia nan ado di Minang atau basuku Minang. "Ambo jujur se, indak katuju jo kato-kato nan mangecek-an masyarakaik Minang. Karano manuruik ambo, tarbudu, tarbudin. Kapalo samo babulu, tapi pilihan pasti balain-lain," kato Kari Garejoh. "Tapi, nan mangecek-an itu kan iyo urang Minang!" Potong Angah Piyan saolah-olah mamanciang suasana ota labiah angek. "Kalau nan mengecek tu indak urang Minang, tapi manjua namo rang Minang, ambo turuik ka rumahnyo mah," baleh Kari. "Manga tu?" Tanyo Tacin manyemba. "Minta karajo!" Jawek Kari sambia galak. Kawan-kawan lain lah sato pulo galak. Karano, dalam sarius mangecek, tibo-tibo se datang galemenyo. "Mukasuik ambo, mamprotes apo nan dikatokannyo. Karano, urang lua Minang, indak punyo hak untuak mangatehnamokan masyarakaik Minang. Baa dek Tan Baro?" Sambuang Kari mamintak pandapek ka konco palangkinnyo. "Yo, namonyo awak iduik di alam demokrasi, tantu awak musti maharagoi pabedaan pandapek. Apolai pandapatan, harus awak haragoi bana. Yo, ndak? Namun nan pasti, apo nan dikatokan dek tokoh-tokoh sarupo barita hari ko, juo indak salah, kalau inyo mambuek kalompok ciek. Umpamonyo kalompok A, B, atau kalompok C mandukuang pasangan si. X jo si Y. Kalau mangecek-an itu adolah masyarakaik Minang mandukuang pasangan tatantu, bararti tamasuak awak-awak di lapau ko. Jujur sajo, ambo indak sato mandukuang pasangan nan disabuik tu doh," kato Tan Baro. "Sia nan Tan Baro piliah?" Tanyo Tacin Barain. "Soal siapo nan ka ambo piliah, tantulah manjadi rasio ambo surang. Karano sistim pamiliahan di nagari awak ko kan langsuang, bebas dan rasio. Nan pasti, ciek dari nan tigo tu lah pasti manjadi piliahan ambo," jawek Tan Baro. "Ambo indak sato doh!" Sorak Mak Pono. "Indak sato manga?" Tanyo Kari. "Indak sato dalam rapek tu dan juo indak sato dukuang-mandukuang nan dibaritakan hari ko," jawek Mak Pono. "Tantulah iyo indak sato. Kan Mak Pono indak bisa maninggaan suduik dapua induak bareh. Urang-urang tu mambuek acara di Jakarta, dan ciek lai dalam kapasitas apo pulo Mamak dibao urang?" kato Angah batanyo. "Kan katonyo nan mambuek kasapakatan itu tokoh masyarakaik. Ambo juo tokoh masyarakaik. Di kampuang ambo, apo sajo nan ka dibuek, pasti ambo dibao sato atau diagiah tau. Kamanakan ambo banyak!" Jawek Mak Pono. Urang di lapau tu hanyo bisa galak. Karano, persepsi Mak Pono, nan dikatokan tokoh masyarakaik tu masuak inyo nan di kampuang manjadi mamak urang. "Dek indak ado tungganai, bialah ambo mandukuang rang sumando," kato Malin Kacindin. "Indak masalah! Itu kan piliahan Malin dan nan lain musti maharagoinyo. Nan kurang ditarimo tu mambao-bao namo urang Minang sacaro kasaluruhan. Ambo bisa juo baprinsip, indak ado rotan aka pun jadi. Atau indak ado tungganai, rang sumando buliah juo," kato Kari. Ota bagalau baliak. Malah, di antaro urang-urang nan ado di lapau tu lah mulai manyabuik namo-namo calon presiden jo calon wakienyo. Itu juo indak masalah di lapau Uwo. Karano, beda pandapek di lapau tu diharagoi. Nan pasti, debat di lapau tu indak ado mamburuak-buruak-an piliahan sarupo urang-urang hebat di televisi. (Espe St.Soeleman) --~--~---------~--~----~------------~-------~--~----~ . Posting yg berasal dari Palanta RantauNet ini, jika dipublikasikan ditempat lain harap mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi/dibanned: - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama - DILARANG: 1. Email attachment, tawarkan disini & kirim melalui jalur pribadi; 2. Posting email besar dari 200KB; 3. One Liner =========================================================== Berhenti, kirim email kosong ke: [email protected] Untuk melakukan konfigurasi keanggotaan di: http://groups.google.com/group/RantauNet/subscribe -~----------~----~----~----~------~----~------~--~---
