http://padang-today.com/index.php?today=jilatang&id=90 Selasa, 02/06/2009 14:13 WIB
Lah katigo-tigonyo capres cawapres mandeklarasian diri. Nan si Atang jo si Jila indak juo tatunjuak jadi tim sukses lai doh. Sudahlah jadi caleg gagal, jadi tim sukses indak pulo dapek. Stres kawan tu. Dari pado diarak urang ka Gaduik, mako pailah si Atang jo si Jila raun paniang. Duduak di tapi lawik, sambia mamakan jagung panggang pakai saus jo pisang timbatu balinyak pakai keju. "Iyo kereatif urang awak ko ndak, salut den," kato si Jila mambukak persoalan. "Baa ko baitu kecek waang, dari segi apo kereatifnyo urang awak ko, kreatif dalam hal cimeeh-mancimeeh?" tanyo Atang. " Indak itu doh. Caliek lah dek waang nan awak makan kiniko, dulu maa lo ado jagung panggang pakai sausko, pisang balinyak pakai keju, yo ndak," kato si Jila. "Pakaro urang awak kereatif tu memang den akui tu mah," kato Atang sambie maangguak-angguak. Eh Jila kini ado lo nan baru den baco di surek kaba," tukuak si Atang. "Apo tu, barang?" tanyo si Jila sambia mancaliak paja-paja bapacik-pacik pinggang duduak di batu krip. "Indak barang bagai doh, soal barang tu indak urusan awak tu do kanti, jaan cubo-cubo lo malenceng ka soal tu lai. Indak di bukaannyo waang pintu dek si Roih beko". "Jadi aa to nan baru kecek waang tu, panasaran lo den deknyo mah" . "Itu lah den kecek an ka waang rajinlah mambaco surek kaba, banyak nan awak dapek an di sinan". "Maa nan kaden baco sabanyak tu surek kaba kini, apolai wartawannyo sangat banyak pulo". "Maa nan banyak surek kaba jo wartawan, bara ratio nyo nan ideal? Dan baralo banyaknyo wartawan tanpa surek kaba?". "Jaan itu lo diurus lai, bialah PWI, AJI dan persatuan wartawan tu nan mauruihnyo". "Baliek kito ka topik tadi baliek". "Tantang nan waang kecek an nan banyak di bincang di surek kaba tu". "Iyo. Soal partai-partai ngenek nan kareh-kareh karak tu". "Kareh kareh karak baa?" "Iyo baitu kecek urang di surek kaba. Indak sampai sahari inyo mangecek indak, e, alun tabik matohari lai lah barubah se jadi iyo". "Aratinyo bana masak pagi atah patang tumah. Baa kok bisa roman tu urang-urang partai tu ha? Indak bapandirian partai-partai tu kini lai". "Ampun den kawan. Jaan kareh-kareh bana mangecek pakaro itu. Ilang malam awak beko". "Ilang malam? Kini ma pulo bisa urang ilang malam. Dulu iyo". "Dulu jo kini apo bedonyo kawan. Nan ka mamarentah itu ka itu se urangnyo. Nan awak tatap se bansaik sajak lahie sampai kini". "Iyo. Dek den indak paduli sia nan mamarentah. Lai bisa barubah iduk den ko atau indak. Itu nan penting dek den.". "Jadi, sia ka waang piliah nantik kutiko pilpres?" "Nan takana kutiko itu se. Sia nan takanan, itu den piliah". "Kok dapek serangan fajar waang baa?" "Serangan fajar, serangan udara, serangan laut tasarah dek inyo. Den nan paralu nan banyak maagiah." "Mukasuik waang, sia sajo nan banyak maagiah itu nan ka waang piliah?" "Antahlah kawan. Kok lai indak dipaso-paso den mamiliah tantu lai ka sanang hati awak. Ulama lah banyak pula nan batea. Lah kalua pulo fatwa haram kalau urang indak sato pamilihan umum". "Lah banyak se nan haram-haram mah. Indak mamiliah haram. Marokok di tampek rami haram. Urang main fesbuk haram," "Takana di den, lai ado ulama tu nan bafatwa, bahaso korupsi tu haram? Bahaso mamaso-maso urang indak mamiliah tu haram? Indak kan? Itu tandonyo, ulama lah sato pulo uru-uru politik". "Mustinyo ulama tu baa?" "Mustinyo netral. Inyo musti bapacik ka Quran jo Hadist. Indak sato-sato lo barabuik tulang-tulang kekuasaan ko doh, saroman awak ko". "Kok awak racun se ulama-ulama roman tu baa?" "Baa kok diracun?" "Daripado ummat ko binguang dek fatwa-fatwanyo, pacah-pacah urang dek partai-partainyo, kan labiah rancak mati takapuak sadonyo". "Tang. Waang kan lai indak damam paneh do kan?" (*) --~--~---------~--~----~------------~-------~--~----~ . Posting yg berasal dari Palanta RantauNet ini, jika dipublikasikan ditempat lain harap mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi/dibanned: - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama - DILARANG: 1. Email attachment, tawarkan disini & kirim melalui jalur pribadi; 2. Posting email besar dari 200KB; 3. One Liner =========================================================== Berhenti, kirim email kosong ke: [email protected] Untuk melakukan konfigurasi keanggotaan di: http://groups.google.com/group/RantauNet/subscribe -~----------~----~----~----~------~----~------~--~---
