Minggu, 07 June 2009 "Dek ulah pai raun-raun, karajo di rumah tingga. Yo, hebat mah!" Angah Piyan manggarutok surang di ateh palanta lapau Uwo. Kawan-kawan lain agak takajuik juo mandanga apo nan dikatokan Angah. Dalam pikiran urang-urang tu, pastilah ado nan kurang beres. "Apo juo lai, Ngah? Kama induak bareh?" Baitu tanyo Tan Baro. "Induak bareh ambo lai di rumah se nyo. Inyo indak candu gai raun doh. Malah, hari rayo, ambo bao bana pai raun-raun, indak namuah. Inyo labiah suko pulang kampuang. Karano, di kampuang banyak nan bisa dikarajoan. Di kampuang bisa basilaturahim jo dunsanak, jiran sarato lainnyo," Angah manjalehan kabiasaan induak barehnyo. "Jadi, sia nan pai raun? Anak sikola? Kini memang maso-maso untuak libur. Kan anak-anak sikola nan ka tamaik baru salasai ujian. Manuruik ambo wajar-wajar se wakatu senggang manjalang manarimo ijazah, dipagukan untuak raun. Samati-mati angin, untuak refresing atau tuka-tuka pamandangan lah," sambuang Tan Baro. "Indak! Indak itu mukasuik ambo doh," baleh Angah. "Kalau indak, sia nan pai raun-raun dan karajo apo pulo nan tingga?" Tanyo Tan Baro indak saba. "Iko ha. Caliaklah barita ko dek Tan Baro. Apak-apak wakie rakyaik ko pai raun ka Jawa, tapi karajo untuak manyalasaikan rancangan paraturan daerah takatuang-katuang di siko," jawek Angah sambia maangkek surek kaba 'Singgalang' tinggi-tinggi. Lah mancaliak sakalian mato di dalam lapau tu ka barita nan ditunjuak Angah. "Biaso se tu nyo. Kan indak mungkin pulo karajo di rumah dibao sato raun. Kalau ado karajo nan baserak-serak, tantu dikarajokan pulang raun," manyalo pulo Udin Kuriak. "Iko indak karajo bantuak di rumahtanggo doh, Din. Nan dikarajokan apak-apak tu adolah masalah paraturan daerah. Untuak awak nan banyak ko gunonyo ha," baleh Angah jo suara nan agak tinggi. "Iyo, kan masih bisa dikarajokan pulang raun tu!" Udin indak namuah kalah. "Eyayay......, iyo indak mangarati Udin doh. Masalahnyo kini, maso tugeh apak-apak tu tingga dalam etongan pakan se lai. Indak lamo lai, lah batuka pulo manusia pauni rumah bulek di Sawahan tu mah," Angah manjalehan mukasuiknyo. "Ambek cah lu! Ado pantunnyo ciek," manyorong pulo Uncu Labai. "Apo pantunnyo Ncu? Iyo lah lamo awak indak mandanga pantun di lapau ko mah," sorak Mak Pono. "Tambilang di rumpun lansek. Dibao urang batanam durian. Dibilang sado nan dapek. Nan tingga untuak urang kudian," baitu pantun Uncu. "Kalau lai bisa bantuak itu, rancak! Cuma lai indak ka baa? Kok dikecek-an urang beko itiak gaek beko nyo," Angah indak namuah kalah pulo. "Itiak gaek ko apo mukasuiknyo?" Tanyo Kari Garejoh. "Dadak abih, tapi indak batalua. Kok dapek, ijanlah sarupo itu wakie-wakie rakyaik awak nan ka abih maso tugehnyo bisuak ko di saluruh nagari. Kalau bisa, adolah kenang-kenangan untuak urang banyak ko. Supayo siang bisa dipatungkek, malam bisa dipakalang," ruponyo Angah Piyan indak pulo namuah kalah jo istilah-istilah pantun Uncu.
Agak badarai galak urang di lapau tu mandanga istilah-istilah dari Angah Piyan. Baitulah biasonyo di lapau Uwo satiok hari. (Espe St.Soeleman) http://www.hariansinggalang.co.id/index.php?mod=detail_berita.php&id=1971 --~--~---------~--~----~------------~-------~--~----~ . Posting yg berasal dari Palanta RantauNet ini, jika dipublikasikan ditempat lain harap mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi/dibanned: - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama - DILARANG: 1. Email attachment, tawarkan disini & kirim melalui jalur pribadi; 2. Posting email besar dari 200KB; 3. One Liner =========================================================== Berhenti, kirim email kosong ke: [email protected] Untuk melakukan konfigurasi keanggotaan di: http://groups.google.com/group/RantauNet/subscribe -~----------~----~----~----~------~----~------~--~---
