Selasa, 09/06/2009 09:05 WIB "Nangkene lah rusak e, ikolah jadinyo, kalau waang paso-paso Ai mamakai jilbab. Eboh sagalo anak randai. Sajak bilo Sabai Nan Aluih barandai pakai jilbab. Nan kadatangko jaan disuruah-suruah Ai jo pakaro-pakaro sensitif nan saroman tu lai," hariak Sabai Nan Aluih ka adiaknyo nan banamo Mangkutak Alam tu.
"Iyo ciak. Sajak Sabai Nan Aluih mamakai jilbab, banyak se urang nan curiga. Ado nan mangecek an Sabai tu indak tahu diri. Lah jaleh awak lah gaek, rambuik lah bauban, tapi dek karano mancandu juo baru lai nank barandai, nyo lampok rambuik baubannyo tu jo jilbab. Baitu bana kecek urang ciak oi," jawek Mangkutak sambia maratok panjang. "Kan lai tahu waang mah. Tu, apo kecek urang-urang nan indak batangguang jawab tu lai?" tanyo Sabai Nan Aluih. "Banyak ciak. Banyak," jawek Mangkutak. "Sabuik an lah," sasak Sabai. "Lai indak emosi aciak beko?" tanyo Mangkutak katakutan. "Indak. Ai lulua emosi Ai. Sabuiklah," sasak Sabai sakali lai. "Kecek pareman-pareman di lapau-lapau tu, Sabai tu kan alun balaki lai. Manga musti pakai jilbab. Urang kalau lah balaki baru sasuai mamakai jilbab," jawek Mangkutak. "Apo hubuangannyo Ai bajilbab jo Ai indak balaki? Nan salamak paruik se pareman tu mangecek mah," kato Sabai agak tarabo. "Urang balaki kalau bajilbab, taraso bahaso padusi tu baugamo, amanah, setia, dan bagai-bagai pujian lainnyo. Tapi kalau alun balaki pakai jilbab, nyo kecek an dek pareman tu bahaso rambuik aciak indak ado lai. Lah sulah dek mananti jodoh. Dek karano indak barambuik, takuik dek malu, mako dipakainyo jilbab. Supayo talampok kapalo sulah aciak tu," jawek Mangkutak. "Iyo sajadinyo pareman tu mah. Soal Ai mamakai jilbab atau indak, itu kan hak asasi Ai," hariak Sabai. "Iyo ciak. Sadonyo urang tahu pakaro hak asasi tu mah. Tapi Sabai Nan Aluih dalam barandai pakai jilbab, iko nan indak ado sajak dunia takambang. Kalau aciak pakai jilbab main randai, urang manyangko bahaso aciak lah sato pulo kampanye jilbab. Padohal, sajak dulu kala, Sabai Nan Aluih indak panah pakai jilbab doh," baleh Mangkutak. "Pakai suntiang, takuluak kompoang, salendang balapak kan lai," jawek Sabai. "Iyo, itu pakaian Sabai Nan Aluih sajak daulu. Kini, tibo-tibo mamakai jilbab. Sagalo parewa nan sato manonton randai Sabai Nan Aluih tu tangangak," kato Mangkutak. "Tangangak baa? Dek karano nampak Ai rancak dinyo pakai jilbab? Parewa gata sadonyo mah!" kato Sabai. "Tangangak dek karano aciak lah malangga kebiasaan randai sajak dulu. Urang pakai jilbab tu kalau pai ka musajik, pai ka majlis taklim, pai manjanguak. Kutiko barandai urang indak ado nan pakai jilbab doh," solang Mangkutak. "Lah katinggalan waang mah Mangkutak. Kini banyak padusi nan sato barandai pakai jilbab. Caliak dek waang acara randai di tipi, caliak dek waang anak-anak esteesi di Padangpanjang, banyak padusinyo barandai nan pakai jilbab. Jaan macam-macam waang. Jaan sato-sato pulo waang mairik-irik persoalan jilbab ko ka ranah politik lai," kato Sabai. "Tasarah aciak lah. Kok ka bajilbab atau ka indak. Nan jaleh urang eboh. Kan lah jadi tu. Mangajuik-ngajuik an urang se," kato Mangkutak sambia galak bagumam turun janjang. Saminggu sasudah tu, Mangkutak baliak ka rumah gadangnyo. Basobok baliak jo aciaknyo Sabai Nan Aluih tu. Tacangang Mangkutak, baa mangko indak bajilbab aciak nyo tu lai. "Ha? Manyo jilbab aciak tu lai?" tanyo Mangkutak. "Ai ingin mambuktikan ka pareman-pareman banyak tu, bahaso kapalo Ai alun sulah lai doh! Ai ingin buktikan bahaso rambuik Ai lai alun bauban lai doh. Itu nan kalamak dek kalian!" hariak Sabai. "Tapi kini jilbab tu lah manjadi isu nasional mah ciak. Pakailah, supayo aciak disabuik-sabuik dek urang taruih, bahaso Sabai Nan Aluih kini alah barubah," kato Mangkutak. "Takana dek Ai, jadi persoalan jilbab tu kini indak persoalan agamo sajo lai doh. Lah masuak ka persoalan politik?" tanyo Sabai Nan Aluih. "Jak sari lai. Lah katinggalan garobak aciak mah," jawek Mangkutak.(Wisran Hadi) http://padang-today.com/index.php?today=kakobeh&id=91 --~--~---------~--~----~------------~-------~--~----~ . Posting yg berasal dari Palanta RantauNet ini, jika dipublikasikan ditempat lain harap mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi/dibanned: - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama - DILARANG: 1. Email attachment, tawarkan disini & kirim melalui jalur pribadi; 2. Posting email besar dari 200KB; 3. One Liner =========================================================== Berhenti, kirim email kosong ke: [email protected] Untuk melakukan konfigurasi keanggotaan di: http://groups.google.com/group/RantauNet/subscribe -~----------~----~----~----~------~----~------~--~---
