Assalamualaikum warahmatullahi wabarakatuhu, Maa Angku Yan Majo Basa sarato Rang Lapau nan Basamo,
Sajak mambaco postiang gurindam angku nan mulo-mulo (Pasan Mamak 1) ambo lah mulo kagum kapado angku nan ambo nilai manarimo rahmat Ilahi nan mahatinggi tinggi dalam manulih gurindam ko. Perbendaharaan kato-kato, pandai mamapatauikan nan lamo jo nan baru, campin mangajangi nan lapuak-lapuk, lasuah mambarui nan usang-usang. Kahadiran angku nan baru-baru ko di Lapau kito sabana mambari banyak inspirasi ka Kito nan Basamo. Pamakaian Bahaso Minangkabau nan sajak samulo kito takankan di Mailing List Lapau Kito ko, lah angku contoh praktekkan dan kuatkan dengan blend (adukan) nan bagitu nikmat, lamak dibaco, elok dicaliak, dalam makna, banyak nan tasirek jo kulimek; gurindam-gurindan nan jauah marasuak, nan indak sadang dibaco sakali duo. Ambo copy-and-paste-kan limo gurindam dalam replai ko, untuak manjapuik indak kalua konteks. Tapi inti patanyoan ambo cuma sakatek, dalam gurindam nan ditangah. "Taraso ciuk nyali Bak cando janur ndak ba lidi" Ambo alun panah manandanga duo kato atau ungkapan, apo aratinyo "ciuk nyali" sarato "janur ndak ba lidi"? Panjappuik postiang nan tingga cako, angku alah manarangkan mukasuik kato "mawa" dalam postiang sabalunnyo. Tarimo kasih banyak. Ruponyo di Canduang bungo "mawa" dipakai untuk "bunga mawar" (Indonesia, Melayu), itu nan ambo bayangkan. Tapi ambo tanyokan karano di Ampek Angkek biaso ambo danga kato "mawar" biaso dipakai saroman Indonesia/Melayu tu. Ambo lah maklum angku dari Canduang, Nagari Gadang nan ambo Kagumi, nanalah ambo jalani agak mandetail jo piciang mato. Nan ambo indak jauah dari Canduang doh di Ampek Angkek. Untuak manjalehi tanyo angku dimaa kampuang ambo, kampuang awak lai badakekan. Posisi dangau Amak ambo persis ditangah-tangah Ampek Angkek, di dataran tinggi Agam Tuo Utara, tasalek di tangah-tangah, kalompok pondok nan banamo Bandabaru, antaro Kototuo-Balaigurah, Biaro, Lambah-Kotomarapak jo Ampanggadang. Dari sinan kito dapek maengong sabalik, sambia mairuik udaro barasiah, Kampuang nan Jauah di Mato, Gunuang Sansai Bakuliliang ... Ambo raso, tulisan-tulisan angku sajak dahulu, nan mungkin dianggap draft untuak samantaro, tantunyo angku alah tahu, rancak disimpan elok-elok, dicaliak ditiliak sakutiko-sakutiko. Kok lah tibo masonyo nanti, kok lah ado nan paralu dikajangi, tunggulah wakatu nan elok maso nan baiak untuak manabikkannyo. Buah pikiran angku nan dikatangahkan sairih-sairih sajamba-sajamba tu akan manjadi tiru tuladan, pelajaran dan kenangan, bagi angkatan kini sarato angkatan kudian nan jauah dari pandangan mato kito ... Salam, --MakNgah Sjamsir Sjarif Di Tapi Riak nan Badabua di Subarang Lauik Basa Santa Cruz, California 20 Juni 2009 Wakatu Siang Terpanjang di Belahan Bumi Utara. http://www.santacruzsentinel.com/localnews/ci_12030675 --- In [email protected], yanto jambak <yantojam...@...> wrote: > > > Assalamualaikum wr.wr..dunsanak palanta nan ambo cintoi, mancaliak > situasi dan kondisi, nan tajadi di nagari awak kini dan sambia > manunggu sia nan ka jadi , pamimpin RI. > Ambo cubo manyampaikan sabuah gurindam nan sabananyo lah ambo tulih > sakian bulan nan lalu tapeknyo katiko BBM malambuang tinggi tantunyo > saketek ambo pa eloki sasuai jo kondisi kini, harapan ambo sakadar > intermezzo dek kito basamo……………………. > > SAMO DIAGAK I > (Palanta VII) > > Jikok dipikia di agak i > Di hituang di kaji kaji > Di cubo koreksi diri > Di tanyo hati nurani > ...... Kini kito ka ba kenduri Alias pesta demokrasi Banyak nan paralu kito awasi Jan tapiliah di nan udi Ibarat rumah nan lah jadi Tibo masonyo di renovasi Apokoh nan ado diruntuah i Apokoh cukuik di pa elok i Disiko awak nan ngari Taraso ciuk nyali Bak cando janur ndak ba lidi Cando oto ndak ba oli Jo dunsanak ambo babagi Shering kato rang kini Santano jatuah pilihan hati Handaknyo kalua dari nurani Bukan karano dek materi Atau karano apam sarabi Disiko kito ba hati hati Olie sabantuak jo tangguli ......... > 24 Jiuni 2008 > Yan Majo Basa. > --~--~---------~--~----~------------~-------~--~----~ . Posting yg berasal dari Palanta RantauNet ini, jika dipublikasikan ditempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. Email besar dari 200KB; 2. Email attachment, tawarkan disini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama =========================================================== Berhenti, kirim email kosong ke: [email protected] Untuk melakukan konfigurasi keanggotaan di: http://groups.google.com/group/RantauNet/subscribe -~----------~----~----~----~------~----~------~--~---
