Assalamualaikum Wr.Wb......Dunsanak palanta dalam kabingunganko kito
acok manjadi urang nan serba salah, tamasuak ambo sandiri sarupo nan
ambo gambarkan dalam gurindam dibawahko, baa pandapek dunsanak
kasadonyo tu.........!
TOLOANGLAH BANTU
(Palanta VIII)
Sabanta lai kito pamilu
Salapan juli hari rabu
Mancari urang nan nomor satu
Untuak Indonesia nan labiah maju
Limo tahun sudah waktu balalu
Ikolah hari nan di tunggu tunggu
Untuak mambukak lembaran baru
Tapi nan ka dipiliah alun lai tau
Bak cando mamak,ayah jo ibu
Mancari calon ka minantu
Tantu dicaliak kampuang jo suku
Disilau pulo sako jo indu
Tapi disiko kito ragu
Ibarat jalan nan ka dituju
Simpang tigo nan batamu
Disiko pilihan takuik kaliru
Ka kida raso ka buntu
Raso katibo di guo batu
Manuruik carito kaba jo isyu
Disiko banyak makhluk hantu
Hantu setan aru aru
Tamasuak hantu balau
Ka suok iko jalan baru
Jalan bakasiak banyak abu
Kataruih banyak kelok baliku
Jalan nan panuah rambu rambu
Talalu banyak ranjau jo paku
Banyak aral nan mangganggu
Kamalah kito ka lalu
Kito cameh takuik tatipu
Hari kalam ndak balampu
Nan tampak hanyo bayangan semu
Samo sajo karambia jo labu
Rambutan sabantuak duku
Ayie didiah tasangko susu
Tibarau tasangko tabu
Bak cando makanan dalam paraku
Lah jaleh banto bacampua inggu*1
Dek kudo gadang napasu
Nyo sangko dadak campua sagu
Ampiang sarupo jo galu galu*2
Kadang lah jaleh sampalah tahu
Dek awak basangko keju
Akhianyo paruik mancuru
Lah jaleh godok pisang abu
Saharago tigo suku
Dek awak basangko bolu
Tabayia limo ribu
Disiko sumangat layu
Tampang lamah muko kuyu
Taraso latiah jo lesu
Kaki layuah tungkai linu
Tabali kuciang dalam kalambu
Disangko bulu abu abu
Kironyo kuciang kulabu
Lah di kurok lah di puru
Sababkan baa dek baitu
Rumah tampak jalan ndak tantu
Lai banyak urang batamu
Tapi ,bak cando ta buru buru
Ma hambua hambua bak kangguru
Malompek lompek bak ikan hiu
Baciloteh manggarutu
Bahasonyo awak ndak tantu
Bak cando pakak jo si bisu
Surang turiak nan surang gagu
Ciek mangaku jadi pandu
Ciek mangaku tukang tandu
Caritonyo mangebu gebu
Pado dendang banyak balagu
Bunyi kecek batalu talu
Cando lasuang di dilantak alu
Kadang disiko taraso lucu
Nyo buek kelompok bersatu
Tapi ndak pernah bisa manyatu
Salalu sajo basiteru
Kadang batangka nan indak paralu
Ta abaikan nan wajib jo pardhu
Sadonyo sibuk mambuek tungku
Ndak surang juo nan mancari kayu
Barabuik sendok jo garapu
Barabuik meja jo bangku
Barabuaik dayuang jo parahu
Barabuik panokok jo palu
Sia nan ka jadi babu
Sia nan ka jadi pambantu
Sia nan ka jadi tamu
Sia nan ka manjamu
Lah bak cando tukang jamu
Kasadonyo sibuk maramu
Daun kacang daun mingkudu
Tamasuak kunyik bau
Suaro dareh mandaru daru
Tutua mandasiang cando piluru
Bunyi badia tasunduik picu
Cando mariam tabaka mansiu
Gayanya bantuak dosen jo guru
Kama pai mangapik buku
Langkok badasi kupu kupu
Kapalo sulah tando ba ilimu
Tapi, kok di caliak tingkah jo laku
Ndak ado nan patuik ditiru
Apo lai ka di gugu
Banyak nan tukang tipu
Kasadonyo ilimu palsu
Karajo tak labiah tukang adu
Angkek iko injak itu
Bak cando main enggrang bambu
Parangai bak ulek bulu
Urang nyo sangko sijantu
Ibarat ayam nyo agiah jalu*3
Baa urang nak batinju
Ikolah panyakik sajak dahulu
Sajak jaman PKI gestapu
Sampai ka jaman orde baru
Main tangkok main pilanggu
Banyak mamakai ilimu kudu
Jo musuah barek kok batamu
Kalua jurus nan jitu
Sembunyi tangan lempar batu
Muluik manih bak cando madu
Hati kusuik basimpulu
Tinggi dado pado bahu
Hati paik bak ampadu
Dilua putiah di dalam kalabu
Di ateh hitam di bawah biru
Kaniang ameh utak parunggu
Muko licin hati babulu
Kadang bagaya urang borju
Pai kasalon mamotoang kuku
Sakadar marunciangkan dagu
Abuak hitam basimir sipatu
Bibia manih dek bagincu
Muko rancak babadak ungu
Tapi santano dibuka baju
Panuah balang kada jo panu
Disiko banyak kito kaliru
Tadayo rupo nan ayu
Tagoda jo bujuak rayu
Tinggi lutuik pado siku
Apolai jo suaro merdu
Bak cando kuciang uju
Lupo kito jo kunci pintu
Lah tandeh gulai ambu ambu
Buah tutua mandayu dayu
Bak cando urang lugu
Randah bibia pado dagu
Janji ba udang di baliak batu
Niniak mamak jo angku angku
Imam kahatib jo panghulu
Mak tuo jo mak uncu
Kakak one jo osu*4
Kok putuih alang alang di taraju*5
Putuih uleh dek mambuku
Nyampang kok hilang dek limbubu
Dibao lanyok awan biru
Kama lai kami ka mangadu
Lah hilang tampek ka batumpu
Lah lanyok sepai ka panyapu
Lah hilang sendok ka panyudu
Lah karuah ayia di hulu
Indak lai tampak lurah babatu
Lah samo sajo kura jo penyu
Sirangkak disangko puyu
Ikan limbek disangko karapu
Dicubo mangaruak bubu
Taraso katiak ngilu
Padiah bak raso disambilu
Disiko Lidah taraso kalu
Kadang bibia taraso kaku
Cando urang mabuak sabu
Lah bantuak sakik paru paru
Marangeh limau jo jambu
Dek ulah laku banalu
Tasisiah atah dek niru
Dek arok malapehkan candu
Lah singkek talunjuak dari ampu
Umpamo ladiang ndak ba ulu
Ibarat roda ndak ba sumbu
Bak cando badak dikarek sungu
Nasib umpamo padi salibu
Musim manyabik lah balalu
Musim kadatang ka ditunggu
Urang baniat ba parak labu
Lah banyak tangih nan pilu
Lah maratok anak jo cucu
Bak cando anak yatim piatu
Toloang ka sia mintak bantu
Yanto jambak nan manyaru
01072009
*Jenis tanaman yang daunnya bau sekali
*Beras ketan yang di sangria
*Susuh ayam
*Kakak (Daerah Solok)
*Simpul ikatan pada alang alang
--~--~---------~--~----~------------~-------~--~----~
.
Posting yg berasal dari Palanta RantauNet ini, jika dipublikasikan ditempat
lain wajib mencantumkan sumbernya: ~dari Palanta r...@ntaunet
http://groups.google.com/group/RantauNet/~
===========================================================
UNTUK DIPERHATIKAN, melanggar akan dimoderasi:
- DILARANG:
1. Email besar dari 200KB;
2. Email attachment, tawarkan disini & kirim melalui jalur pribadi;
3. One Liner.
- Anggota WAJIB mematuhi peraturan serta mengirim biodata! Lihat di:
http://groups.google.com/group/RantauNet/web/peraturan-rantaunet
- Tulis Nama, Umur & Lokasi pada setiap posting
- Hapus footer & seluruh bagian tdk perlu dalam melakukan reply
- Untuk topik/subjek baru buat email baru, tidak dengan mereply email lama
===========================================================
Berhenti, kirim email kosong ke: [email protected]
Untuk melakukan konfigurasi keanggotaan di:
http://groups.google.com/group/RantauNet/subscribe
-~----------~----~----~----~------~----~------~--~---
