BUKAN MANYASA
( Surek dari kampuangIV)
Assamu’alaikum ka urang rantau
Kadagang juo surek tatuju
Kok nyampang garuang talampau
Suruakkan talingo kalangan baju
Tigo kali malayangkan surek
Rauang jo ratok kasadonyo
Ulah dek sayang tadoroang amek
Lahia jo bathin basangketo
Lah singkek kalam panulih
Ayie mato lah ganti dawat
Dukun mati ubek lah abih
Tak mungkin rasonyo panyakik sehat
Surek kami lah dagang danga
Simak bajawek kasadonyo
Di lahianyo surek bak panawa
Di bathinnyo racun sapaduo
Dulu manangih dek taragak
Kini marauang kacamehan
Dagang manyurek sambia galak
Bathin maratok basuruakkan
Pandai bana dagang baladang
Alah saparak pisang manih
Pandai bana dagang batenggang
Muluik galak hati manangih
Kami bak mandi jo kiambang
Palak habih gata nan timbua
Tiok barih lah kama ulang
Dalam sirek gamang tasumbua
Sakik cegak damam nan tumbuah
Kada di ubek tukak nan tibo
Dagang baniat ma ubek rusuah
Basuruakkan duto sapaduo
Usah dagang salah tarimo
Indak doh kami maetoang jariah
Nyampang tatanam di padi hampo
Lah jaleh mungkin salah dek baniah
Indak labiah dek urang ladang
Salain batanam bijo nan baiak
Tumbuah rimbun babuah kambang
Barabuik urang nak ma ambiak
Kok disabuik malang baparak
Bijo banyak tumbuah sabatang
Daun labek babuah indak
Lah manyarok ka parak urang
Kok jaleh kalikih jantan
Daunnyo dapek ubek jumalang
Biapun tumbuah di tapi jalan
Bapikia urang ka manabang
Bukan mangana sakaruang pupuak
Sayang jo jariah nan tabuang
Bak ma ambiak antimun bungkuak
Kakaruang indak di etoang urang
Bukan doh untuang nan kami cari
Mangana pokok jan tamakan
Buah tumbuah musim baganti
Harago kok jatuah di pasaran
Di urang tumbuah lah ma ambiak
Awak dek gilo jo palapah
Daun mudo lah jadi karisiak
Putiak kok malu jadi buah
Kok nyampang jadi salibu
Lah jaleh tumbuah dek taserak
Dagang lah jaleh tanaman suku
Tumbuah di ladang ba mintalak
Ladang bapandam bapakuburan
Sawah balantak batu baji
Usah baniek tumbuah di jalan
Sio sio daun baganti
Untuang takadia jo bagian
Lah nyato garak dari Allah
Tapi kok kito salah jalan
Lah jaleh sasek dek malangkah
Sakitu surek dari ladang
Untuang kok lai batang manyimak
Mancaliak buah kami lah sanang
Kok ma ambiak bialah indak
PARAK TINGGA : 30101993
Y. JAMBAK
--~--~---------~--~----~------------~-------~--~----~
.
Posting yg berasal dari Palanta RantauNet ini, jika dipublikasikan ditempat
lain wajib mencantumkan sumbernya: ~dari Palanta r...@ntaunet
http://groups.google.com/group/RantauNet/~
===========================================================
UNTUK DIPERHATIKAN, melanggar akan dimoderasi:
- DILARANG:
1. Email besar dari 200KB;
2. Email attachment, tawarkan disini & kirim melalui jalur pribadi;
3. One Liner.
- Anggota WAJIB mematuhi peraturan serta mengirim biodata! Lihat di:
http://groups.google.com/group/RantauNet/web/peraturan-rantaunet
- Tulis Nama, Umur & Lokasi pada setiap posting
- Hapus footer & seluruh bagian tdk perlu dalam melakukan reply
- Untuk topik/subjek baru buat email baru, tidak dengan mereply email lama
===========================================================
Berhenti, kirim email kosong ke: [email protected]
Untuk melakukan konfigurasi keanggotaan di:
http://groups.google.com/group/RantauNet/subscribe
-~----------~----~----~----~------~----~------~--~---
