JAN DI HAO (Sr dr Kampuang V) Sajak kami mandapek kaba Kanduang kapulang jo oto surang Ayam jo itiek sato kapasa Taluanyo sajo nan tingga di kandang
Dek ulah sanangnyo hati Barang nan indak kami adokan Batuka galang jo timah pati Untuang lai baju panjang langan Sapakan lamonyo ba hari rayo Kami hiduik bak juragan Pai ka pasa mambali maco Jo oto juo dagang antakan Labiah bak raso batagak pangulu Siang malam baralek gadang Lupo jo susah nan dahulu Takalo dagang ka mahilang Babagai bagai macam acara Malam amal sambie bagurau Panjek pinang pangguang gembira Sampai basaluang dalam lapau Dalam acara lelang kue Solo manyolo samo gadang Bak cando loncek dalam embe Malompek lompek pitih kalua Baitu juo acara saluang Bakandak lagu mintak di pantuni Pitih bak cando itiak ka jaguang Sabalun di kajuik alun baranti Tangangak urang di lapau Sakadai urang kanduang bayiekan Kok cando iko sadonyo urang rantau Rayo lah baa tiok bulan Dagang di puji di muliakan Kecek badanga kasadonyo Kok ado dibalakang mancibiekan Itu tak labieh dek iri sajo Lah sapakan dagang di rumah Mandeh baralek tiok hari Tamporo rampak labuahlah lanyah Kami tarimo jo sanang hati Lah tibo masonyo ka babaliek Cutilah abih took nan tingga Tasabuik dek dagang randang itiek Taragak pulo jo palai bada Indak di ulang duo kali Mandeh carikan salero dagang Ampiang jo dadieh batangguli Sampai jo tapai puluik balamang Apo di tabek lah mandeh bangkik Di parak lah tingga tunggua sajo Kok lai ka ubek ibarat sakik Ka oleh oleh tibo di jawo Lah baliek dagang ka rantau Babaliek langang taraso kampuang Tibo rusuah lah tabik galau Dicaliek padi lah abih di lumbuang Lai bana dagang baragieh Pambali maco nan dagang sabuik Usah di baco pambali sirieh Pambali garam sajo indak cukuik Tapi dek dagang lai manyabuik Takalo kabaliek malam sinayan Ka dituka cek bank lah tutuik Dari rantau sajo ka bakirimkan Mandanga janji dari muluik Lupo jo hutang sabalik pinggang Nanti kok tibo urang manuntuik Dilipek duokan bayie hutang Tapi apo ka disabuik Dek dagang janji bukan bahutang Sajak palembang di tutuik kabuki Surek sapucuak haram kok datang Tarakhir kaba nan kami tarimo Kadai dagang disita Bank Untuak pambayie carteran oto Nan dagang lagakkan wakatu pulang Kok bana co itu nan tajadi Lah bakicuah kami kironyo Labieh rancak pulang jo padati Cukuik jo rumpuik bayie seonyo Disangko jambatan panyubarang Titian barakuak nan kami titih Sampai hatinyo anak dagang Kami bapujuak bapatangih.. Ateh ngarai, 11031994. Y. Jambak [email protected] yantojambakblogspot.com --~--~---------~--~----~------------~-------~--~----~ . Posting yg berasal dari Palanta RantauNet ini, jika dipublikasikan ditempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. Email besar dari 200KB; 2. Email attachment, tawarkan disini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama =========================================================== Berhenti, kirim email kosong ke: [email protected] Untuk melakukan konfigurasi keanggotaan di: http://groups.google.com/group/RantauNet/subscribe -~----------~----~----~----~------~----~------~--~---
