Risaulai. oi Risaulai..
Hari raba a pukua satu hari raba a pukua satu Urang manembak si buruang Nuri Kanai si kikiak nan sadang tabang Jatuah badarai si bungo lado Lai sarawa indak babaju Lai sarawa indak babaju Joa den tampuah galanggang rami Mangko den duduak balangang - langang Jatuah badarai si aia mato Barakik-rakik kito ka hulu Baranang kito yo katapian Basakik-sakik kito dahulu, sayang Asal lai sanang yo kamudian Bada kariang parancah paku Paku digulai anak rang lolong Bialah kariang banda di hulu, sayang Ka bakeh hujan den mintak tolong Risaulai... oi. Risaulai... Assalamu'alaikum Warahmatullahi Wabarakaatuh, Adidunsanak palanta nan manyanda di lapau, Pas barangkek karajo pagi lah bara hari ko, radio Discovery Minang FM nan mangudaro di langik Batam ko maidangkan ka pemirsanyo Lagu Risaulai. Nan mano lagu ko alah di lagukan baliak dek Ajo Andre jo One. Nan One batingkah malaguannyo. Tarakhir mintak tolong ka Ajo untuak di peloki. Sanang hati ambo mandanga lagu ko, sampai jauah pangana. Mangkonyo tagarik hati nak ka manguleh lagu ko, sadang elok bana lagu ko mawakili Rang Mudo Rantau nan sadang basikaiah mancari iduik di tanah rantau. Walaupun kurang pangatahuan ambo mengenai lagu Minang, tapi kainginan juo mancari-cari tau. Apresiasi Lagu Minang Lamo ; Risaulai By ; Rina Di muloi jo bait partamo bacarito mangibaraikkan raminyo pakan hari Raba a, nan tabayang dek ambo Pakan hari Rabaa di Bukik, iyo sabana bagadincik tarutamo Pasa Teleang. Ado nan manembak buruang tapi nan ditembak buruang Nuri, dalam arti kato buruang maha, eh malah tatembak si buruang Kikiak (ambo ndak tau buruang ko doh, mungkin Mak Ngah tau?) Sudah tu jatuah badarai si bungo lado, nan tabayang bungo lado putiah2 badarai indak jadi buah tapi bisa juo kalopak bungo lado nan putiah sen tapi nan putiak tatap di tampuaknyo sahinggo manunggu hari nak ka jadi buah lado. Di bait kaduo tambah tarang parumpamoan untuak Rang Mudo rantau nan sadang basikaiah ko. Lai basirawa indak babaju jo a den tampuah galanggang rami, iyo bana labiah parah dari baju nan alah barek dek panumbok. Mangkonyo si dagang anggan untuak ka tangah. Baiak di itu di lapau nan rami, nan inyo manapi-napi sajo di carito nan ringan-ringan sajo nan indak banyak urang akan mandangakan. Juo taraso pulo dek ambo si dagang ko anggan untuak sato katangah atau pulang kampuang duluh. Dek alun basaga laih. Mangkonyo manyuduik ka suduik lapau atau tatap di rantau duluh sambia tatap basikaiah mancari iduik. Tibo lah surang badan diri, tantu mailia surang sin aia mato, namun aia mato ko bisa jatuah kalua bisa pulo jatuah ka dalam. Nan jatuah kadalam ko bana nan sabana padiah. Nan diadok an di muko urang rami, bibia tatap juo senyum manih, tapi di dalam lah sabak nan malatuih jadi tangih bailia2 aia mato hati.. Bait katigo mulai tabik pangana si penulis laih, indak guno balaruik-laruik. Show must go on kecek rang kampuang ambo. Cocok bana pantun barakik-rakik kahulu basanang kamudian ko. Tapi disudahi jo suatu target nan harus di capai. "Asa lai sanang kamudian". Jadi satiok usaho awak iduik di rantau harus ado target nan musti awak capai. Untuak ado target musti ado planning. Sadang lai diplanning sajo kadang masih tajilapak apolai indak diplanning. Kunun lah kok kunun, sadang lah kunun lai ka kunun kecek rang kampuang sabalah. Jadi pasan moral mandalam mengenai ilmu management alah di sampiakan dek penulis lagu sacaro tasirek. Salut.. Bait tarakhir ko bahubungan arek jo salero kampuang tangah alias seni kuliner. Nan mano Bada kariang lamaknyo dipakai untuak parancah gulai paku. Santan pakek jo lado kutu dimasuakkan potongan paku (pakis) nan masih basanggua ditopingkan jo maco arai (sebutan bada kariang kalo di Bukik). Apolai ado kawannyo pamakan nasi jo karupuak jangek pasa ateh....wes se wes mantap..hehe. Sabana langkok sajian penulis lagu ko. Nan isi dari sampiran ko adolah pamacu sumangai jo kalimat " bialah kariang banda di hulu, aratinyo walaupun tampek bapacik nan alah taban atau kok tibo di si dagang nan pokok alah tarancam pulo. Tapi nan jaleh sadonyo di pulangkan juo ka Nan Kuaso. Kalimat "ka bakeh hujan den mintak tolong" bisa di mangarati sabagai mamulangkan ka jalan nasib nan di garihan dek Nan Kuaso. Sadonyo usao alah di karajoan, walaupun banyak rintangan jo tantangan. Tatap si dagang mamulangkan sagalo urusan ka Nan Kuaso, di lain kato sebagai basarah diri ka Allah SWT nan Maha Mambulak Baliak iduik si dagang. Sia kolah nan manciptakan yo? Wassalam Rina, 32, batam --~--~---------~--~----~------------~-------~--~----~ . Posting yg berasal dari Palanta RantauNet ini, jika dipublikasikan ditempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. Email besar dari 200KB; 2. Email attachment, tawarkan disini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama =========================================================== Berhenti, kirim email kosong ke: [email protected] Untuk melakukan konfigurasi keanggotaan di: http://groups.google.com/group/RantauNet/subscribe -~----------~----~----~----~------~----~------~--~---
