Assalaamu'alaikum wa rahmatullahi wa barakaatuhu, Bukan Rina, Galeh jo Kopi Daun indak sapadan doh. Kok minum kopi susu iyo pakai galeh. Indak manakah minum kopi daun atau minum aia kawa tu jo galeh doh. Kalau dalam ugamo lah buliah dikatokan bida'ah tibono duh mah.
Padanan tradisi Minum Kopi Daun, atau Minun Kawa adolah Sayak Tampuruang. Jadi katigono, "tabuang kawa" "sariangan kawa" (dari ijyuak nan bafungsi juo sabagai panutuik tabuang kawa tu, saroman nan dicaritoan Angku Lembang cako), dan "Sayak Tampuruang" adolah satu unit, tigo ciri-ciri Minun Kawa nan indak dapek dipisahkan. Aroma kawa angek jo Sayak Tampuruang tu kato-mangatoan dalam lingkuanganno. Bairuik sairuik-sairuik jo sungguah-sungguah manikmatino. Indak untuak diminum surang doh, tapi diminum jo kawan arek, atau tamu nan sanang sasalero jo raso kawa tu. Punyo tata-cara tertib sandiri, agak babunyi mairuikno. Mungkin dahulu Minum Kawa ko agak seremonial, saroman Urang Japang dengan Tea Ceremony mareka. Itu lah barangkali istilah "Minun Kawa" adolah unik di awak dari pado minun kopi. Kok Minun Kopi pai ka Lapau, tapi Minun Kawa ko pai ka pondok-pondok urang gaek nan tahu lamakno mambuek dan minun kawa tu. Itulah sababno kalau ambo saisuak pai ka Dangau Nyiak Kuruih (lah lamo almarhum) ambo batanyo di laman, "Lai kawa Nyiak?" Jawab baliau, "Lai, kumah lah buliah den tuangi angek-angek." sambia galak... :) Inyiak Kuruih ko sabana Urang Gaek nan unik dalam kahidupan ambo, itu lah ambo sanang manamokan Rantau Uajuah ambo di Santa Cruz, "California, jo namo julukan "Santa Kuruih"..:) Kalau ambo pulang dari Jauah, urang batanyo, kama salamo ko toh indak tampak? Jawab ambo sambia galak, Pai ka Dangau Nyiak Kuruih ... Tahun 1985 ambo pulang dari Jauah sasudah duopuluah tahun indak mancaliak kampuang. Nyiak Kuruih indak ado lai. Pak Adang Ambo (anak Nyiak Kuruih) nan Guru ambo tampek maota-ota dan mancak-mancak di halaman dangau Nyiak Kuruih maso ketek pun indak ado lai. Dangau nyiak kuruih indak ado lai. Ambo sabana taragak Minun Kawa. Kawa nan tamusahua di Kampuang kami, iyolah Kawa Rang Lasi, nan dijua urang di Pasa Lasi tiok hari Silasa. Tibo hari Silasa maso itu, ambo pai ka Pasa Lasi surang. Ambo bega-i Pasa Lasi tu, maengak-engak mancari urang manjua Daun Kawa. Lah panek babega, barangkali disangko urang bantuak Cino Sasek bagai, awak pakai kamera lo. Sudah tu ambo baranti di suduik pasa tampek urang manjaua Lapiak Mansiro nan dibuek di Lasi juo. Ambo batanyo ka Urang Padusi manjua lapiak tu nan duduak di ateh lapiakno di di bawah suduang-suduang. "Uni," kecek akbo batanyo, "dima Urang mnjua Daun kawa?" Mandanga tanyo ambo nan bak tu, tacangak Uni ko, tadanga diambo ano kasadak-an manjawab jo rusuah hati tacangan-cangang. Mancaliak bantuak jo gaya ambo, ano indak ka manyangko ka mandanga Bahaso Ampek Angkek Totok tu bana nan kalua dari muluik ambo. Dipatuik-patuikno ambo dari kapalo sampai ka sipatu, tacangang-cangan jo aia mato, baru dijawabno jo nada suaro sungguah-sungguah takajuik tapi tanang lambek-lambek: "Daun Kawa...?" "Daun Kawa...?" diulangno sakali lai jo mato agak tabulalak balinang-linang. "Anto Daun Kawa nan batanyoan?" jano baliau. "Indak ado urang minun kawa kini lai doh..." mambana baliau... "Urang kini lah minun kopi jo susu" kecek baliau mayakinkan. "Dima Kampuang? Baa mangko Daun Kawa nan ditanyoan? Ulang baliau, "Dima Kampuang? Kama salamo ko? Ambo bari luruih tanyo baliau, ambo di Ilia, Uni, di Kototuo. [Kototuo Ampek Angkek ko sabalah ka ilia Lasi sapaimbauan di lereng Utara Gunuang Marapi]. "Mandanga tanyo adiak tu Uni taragak lo minun kawa jadino. Lah lamo bana unti indak mambuek kawa. Takana lo enek awak saisuak. Kok indak sampik bakadai ko, pai awak ka mudiak kito ambiak dahun kawa di laman, kito buek kawa." [Rumah baliau di Lasi Tuo nan banyak batang jo parak kopi, di Mudiak Pasa lasi tu] Baitulah sakalumik carito ambo rindunyo jo kawa, Kopi Daun janyo urang. Sasudah bapisah jo Uni cako, ambo baliak pulang. Tibo di rumah, ambo kecekkan ka Kak Pasah, dunsanak ibu ambo, Cucu Nyiak Kuruih nan kami dahulu suko juo jo kawa. Sudah tu diam-diam baliau rupono pai maambiak daun kawa di bulakang rumah. Baliau paragoan ka ambo, "Iko nan bakandak-an yo?" sambia galak baliau. Tabasuik lo galak ambo. Kami atua-atua daun tu, kami buek unggun ketek di halaman, kami sangai sampai masiak. Lah salasai, iyo kami minum kawa angek di halaman tu juo, langok jo Sayak Tampuruang masih paninggalan Inyiak Kuruih nan lah lamo indak dipakai... Alhamdulillah Tuhan Pangasiah Panyayang kecek ambo. Uni ambo, mancaliak ka halaman dari pintu rumah, galak-galak nmancaliak kami baduo (kak Pasah jo Ambo) baiyuo-iyo manikmati IKawa Angek jo Sayak Tampurang tu... Eh, panjang lo Carito MakNgah mah Rina. Mantun MakNgha kalau lah tasingguang per-no jo pangalaman lamo, tbudua inspirasi manulihno. Labiah daun kawa nan dibuek Kak Pasah cako MakNgah bawo saketek ka Rantau Jauah untuak kenangan. Labiah satahun masih ado di Kulkas, baulangi saketek-saketek, saroman maulangi jarek tingga sambia mangana Kampuang Halaman nan Tacinto. Oh Ciek lai, untuak kenangan. Di Kampuang kami ado ungkapan. Urang nan Paliang Tahu jo Aturan adolah Urang Lasi. Karano "Atuaran Kawa" Urang Lasi tu sabana rapi ... Sakitulah dahulu Nostalgia jo Daun Kawa. Salam, --MakNgah Sjamsir Sjarif http://www.santacruzsentinel.com/localnews/ci_12030675 --- In [email protected], Reni Sisri Yanti <resy_2...@...> wrote: > > yup batua mak sutan, saroman itu pulo yg dikampuang reni wakatu ketek2 > mancaliak mambuek kopi daun tu....tp ndak pakai tampuruang saroman foto yg da > nof kirim, pakai galeh biaso see abis dr galeh didinginan di piriang > ketek.... > > renny,ancol > > --- On Mon, 8/24/09, Muhammad Dafiq Saib <stlembang_a...@...> wrote: > > > From: Muhammad Dafiq Saib <stlembang_a...@...> > Subject: [...@ntau-net] Re: KOPI DAUN - Made in Batusangkar > To: [email protected] > Date: Monday, August 24, 2009, 11:25 AM > > Assalaamu'alaikum wa rahmatullahi wa barakaatuhu > > Nof, > > Sajauah nan takana di ambo, mambuek kopi daun tu dari daun kopi. Diambiak > daun kopi nan sadang elok, indak pucuakno, indak pulo nan tuo bana. Daun kopi > ko mulo-mulo dibasuah, untuak mailangan kotoran (kotoran buruang atau ulek > atau sabangsono) sudahtu dikariang-an jo caro malap daun-daun tu. Daun nan > kariangko di atua (di cucuak) jo bilah sagadang kalingkiang atau ketek > saketek pado itu. Disusun-susun atua no tu. > > Daun kopi nan alah diatua tu di sangai di dakek paran dapua, tampek urang > mamasak jo kayu api. Manyangai jo asok kayu api tu bisa baari-ari, sampai > daun kopi tu kariang dan badariang. > > Daun kopi nan alah kariang surang ko, kalau di rameh saketek sajo amuah pacah > badarai. Nan badarai ko di masuak-an ka dalam tabuang kawa dari buluah > (bambu) tuo sudah tu disiram jo ayia angek manggalagak. Tabuang buluah ko > baagiah panutuik jo sariangan dari ijuak. Katiko manuangan ayia kawa angek, > ijuak ko manyariang siso daun. > > Ayia kawa angek ko buliah di agiah gulo anau untuak mambuek manyih. Ambo > manapek-i nenek ambo minum kawa daun kopi ko labiah satangah abaik nan lapeh. > > Wassalamu'alaikum > > Muhammad Dafiq Saib Sutan Lembang Alam > Suku : Koto, Nagari asal : Koto Tuo - Balai Gurah, Bukit Tinggi > 58 th, Bekasi --~--~---------~--~----~------------~-------~--~----~ . Posting yg berasal dari Palanta RantauNet ini, jika dipublikasikan ditempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. Email besar dari 200KB; 2. Email attachment, tawarkan disini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama =========================================================== Berhenti, kirim email kosong ke: [email protected] Untuk melakukan konfigurasi keanggotaan di: http://groups.google.com/group/RantauNet/subscribe -~----------~----~----~----~------~----~------~--~---
