Kutiko Atang batamu di Jila di muko kantua Balaikota sasudah urang bubar acara peringatan Nuzul Quran, Atang langsuang mauji kapandaian Jila.
"Tang. Waden mintak fatwa ka waang mah." "Fatwa ka fatwa juo baru lai. Apo masalah. Curai paparan molah bakeh waden. Supayo den kaluakan fatwa nan waang mintak. Apo tu garan?" "Salamo puaso setan-setan dirantai. Iyo tu Jila?" "O, iyo. Iyo. Saluruah ustad jo ulama mengecek saroman tu." "Mangko di rantai supayo urang bapuaso tapaliharo puasonyo. Indak tagaduah-gaduah, indak rusak, indak bata puasonyo. Itu dek karano Tuhan sayang ka urang nan puaso. Iyo baitu?" "Bana rasulullah." "Rasulullah tantu iyo bana. Nan waden kecek an tadi baa? Lai sasuai jo sunnah nabi tu?" "Bana baitu." "Tapi ado nan indak kunjuang paham waden Tang. Kecek ustad-ustad tu setan dirantai salamo puaso, tapi tanyato nan paliang banyak urang malangga puaso tu tajadi salamo puaso tu pulo." "Malangga puaso baa?" "Makan tangah hari di warung-warung kalambu. Maliang motor, cilok barang. Bagandak tiok subuah. Baampok tiok lekok tiok lapau. Padohal salamo bulan carai indak baitu bana doh." "Manuruik waang baa mangko tajadi nan bak kian?" "Jadi kini waden punyo kasimpulan lain, Jila." "Apo kasimpulan waang." "Tanyato indak ado gai barantai setan tu salamo bulan puaso doh. Bahkan banyak setan-setan tu nan bakaliaran. Kalau indak bakaliaran setan-setan tu, tantu indak ka manggoda urang puaso inyo doh. Kok iyo barantai setan tu, tantu indak ado urang nan baampok, indak ado urang-urang nan makan tangah hari. Tanyato tabaliak sadonyo. Jadi, kini waden mintak fatwa ka waang tantang itu." "Tantang apo?" "Tantang setan-setan nan barantai tu." "Apo fatwa nan musti aden agiah." "Waang fatwakan, bahaso indak ado gai setan dirantai salamo puaso doh." "Jadi itu nan musti den fatwakan?" "Iyo. Kecek an alasannyo sakali. Alasannyo nan penting. Alasan dari fatwa waang tu adolah, dek karano salamo bulan puaso banyak urang nan malangga aturan puaso, mako itu pastilah disebabkan dek karano setan-setan sangajo balapehan salamo puaso." "Oleh karena itu." "Oleh karena itu, uraian ustad-ustad nan mangecek an bahaso setan-setan dirantai salamo puaso tu salah. Keliru. Indak sasuai jo kanyataan. Lai lanteh angan waang mangecek roman tu?" "Tapi agak hati den Tang. Setan-setan di rantai untuak urang Islam sajo." "Urang Islam sajo? Jadi molah. Tapi nan makan tangah hari di baliak kulambu-kulambu tu kan urang Islam. Urang nan indak Islam indak ado gai inyo makan di baliak kulambu doh." "O, kalau baitu, setan-setan tu memang sangajo balapehan di bulan puaso, mah yo? Kok itu nan ka den fatwakan, iyo bedo tumah." "Kenyataannyo baitu Jila. Kenyataannyo. Agamo Islam awak ko musti kontekstual, Jila." "Kantuik ang! Kontekstual pulo nan waang sabuik-sabuik. Nan paralu waang pikiekan baliak adolah - setan-setan nan ma nan indak dirantai tu?" "Setan nan manggaduah ummat Islam nan sadang puaso tu molah." "O, salah tumah kawan." "Salah baa pulo den?" "Ummat Islam nan puaso tu nan musti marantai setan-setannyo surang, supayo inyo indak digaduah dek setan-setan tu." "Jadi kan jaleh. Bahaso memang banyak setan-setan nan dilapehan rantainyo di bulan puaso ko dek urang Islam itu sandiri? Kan iyo baitu ndak?" (Wisran Hadi) http://padang-today.com/index.php?today=jilatang&id=104 Selasa, 15/09/2009 12:00 WIB --~--~---------~--~----~------------~-------~--~----~ . Posting yg berasal dari Palanta RantauNet ini, jika dipublikasikan ditempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. Email besar dari 200KB; 2. Email attachment, tawarkan disini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama =========================================================== Berhenti, kirim email kosong ke: rantaunet-unsubscr...@googlegroups.com Untuk melakukan konfigurasi keanggotaan di: http://groups.google.com/group/RantauNet/subscribe -~----------~----~----~----~------~----~------~--~---
