Sanak palanta, izinkan ambo saketek bacarito Babagai-bagai carito tentang kandak padusi katiko manganduang. Sagalo makanan atau barang nan sarik diwaktu yang indak tapek, inyo mintak. Mulai dari mangga mudo tangah malam, sampai ka sate kerang jam 3 subuah. Kandak yang didalam katonyo. Babagai-bagai parasaian kawan deknyo. Tipak ka diri ambo, mungkin dek tahu apaknyo manggaleh babelok, alhamdulillah lai indak banyak kandak si janin ko. Kandak nan singgah, indak buliah mandehnyo makan dilua, tapasolah urang rumah mamasak sabalun ka kantuanyo. Masuak ka bulan ka tigo, antah dima jabang bayi ko tahu, malalui mandehnyo, mamintak Chess nut baliau ko. Satangah mati mamikianyo. Dek badan gadang di kampuang, iyo indak tabayang bantuak Chess nut ko. Apo kacang goreang taplau Padang atau kacang Bogor kah ujuiknyo. Alah bakuliliang bantanyo, iyo indak ado nan tahu. Samakin paniang bakuliliang. Panduannyo cuma namo lain kacang ko di Japang, banamo kacang kuri. Wakatu maminteh di Tumasik akhir Oktober lalu, sibuklah batanyo ka urang kadai, urang kadai bausaho mancarian, raso dibibia tapi cawan, kabarubek juo ngidam urang rumah. Tapi rasaki indak sapalangkahan, bantuak tantu barang tak ado. Sampai dirumah, agak sadiah indak bisa mamenuhi kandak janin ko. Sampai ka parantian salanjuiknyo, dek untuang badan, talangkahanlah kaki ka Kuala Lumpur. Duduak sameja jo bos kabun sawit,. salapiak pulo jo urang kampuang nan harus dinegosiasikan masalahnyo. Timpo batimpo kato, gayuang bagayuang silek, sampailah meja parundingan tahaniang, raso ka tasasak kasuduik, urang kampuang alah basitegang, baitu pulo si bos turun sagalo janji-janji. Katiko haniang bakatuik di meja, malinteh palayan restoran, ma anta hidangan kaduo, mangantri pulo hidangan panutup, baitu pulo caronyo makan urang disiko. Talonceklah dari muncuang, kabatulan ado bule disampaing, batanyolah tantang Chess Nut iko, sambia mancairkan suasana tagang. Galak tasengeang si bule mandanga kandak urang rumah, sajurus segera baliau manjalehkan barang ko, ujuang kato disambuik galak dek delegasi perusahaan, mandanga ambo nan alah paniang mancari barang nan indak tahu bantuaknyo, barang bajudul Chess Nut. Tibo-tibo satu manejernyo malompekan kato, katonyo "kalau dikampuang ambo di Sarawak jo perbatasan Kalimantan, Chess Nut banamo buah barangan, kalau ndak nio barang itu, pailah ka Petaling Street indak jauah dari Bukik Bintang, dirandang urang kacang itu di tangah paneh". Talompek kecek dari urang kampuang dari Kuantan, "Oh pantaslah di kampuang akhir-akhir ko banyak nan mancari buah Barangan, sampai 15 ribu sakilo, kok dek kami, buah itu bapadiakan, paliang tinggi jadi mainan anak-anak". Akhirnyo, parundingan cair gara-gara buah barangan nan alah baganti namo manjadi Chess Nut jo Kacang Kuri ko. karano penasaran, pailah kami ka Petaling Street ko, batamulah jo urang manjua buah barangan randang, 14 ringgik sakilonyo. Sungguah gadang hati deknyo, lapeh juo ngidam urang rumah. Indak lupo kawan dari Kuantan ko, mambao contoh bakeh urang kampuang, baa buah barangan yang indak barago, tibo malinteh nagari haragonyo naiak, sampai di Bandara KL dengan kemasan jo pengeolahan nan lebih baik, barubah pulo haragonyo, manjadi 24 ringgik sabungkuih ketek.
Sungguah banyak kekayaan dalam hutan kito, manga kok hanyo kayu nan baolah, galak-galak rusuah kawan Kuantan ko. Sakian pangalaman baurusan jo buah Barangan nan namo bulenyo manjadi Chess nut, atau kacang Kuri namo Japangnyo. Salam Andiko Sutan Mancayo --~--~---------~--~----~------------~-------~--~----~ . Posting yg berasal dari Palanta RantauNet ini, jika dipublikasikan ditempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. Email besar dari 200KB; 2. Email attachment, tawarkan disini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama =========================================================== Berhenti, kirim email kosong ke: [email protected] Untuk melakukan konfigurasi keanggotaan di: http://groups.google.com/group/RantauNet/subscribe -~----------~----~----~----~------~----~------~--~---
