Test
From: rinapermadi [mailto:[email protected]] Sent: Tuesday, December 08, 2009 3:55 PM To: '[email protected]' Subject: MANANGGUAK BADA MACAH Assalamu'alaikum warahmatullahi wabarakaatuh, Dunsanak Palanta nan di Lapau, Sambia manaruihan monitor jo kondisi serius dari Negara kito kini ko, ambo nak ka baindak maota serius-serius ciek. Kok ado nan indak bakenan tolong ambo dilewatkan sajo. Topik sakaliko indak jauah-jauah dari nan taralah juo. Carito nan ambo lakoni saisuak kala ukatu pakansi sikolah esde sekitar tahun 1988-1989. Nantinyo akan ambo selipkan sebuah Kuliner nan indak talupoan rasonyo sampai kini. Manangguak Bada Macah By : Rina Pakansi sikola adolah ukatu nan sangaik dinanti-nanti, baa dek ka indak? Ukatu itulah kami (ambo jo abang) dapek ijin dari Mama untuak pai ka kampuang nenek nan talatak di lembah diantaro Bukik Barisan nan mambalah Pulau Sumatra. Di salo-salo Bukik kolah kampuang-kampuang ketek-ketek barado jo hamparan sawah nan laweh. Pakansi sakali ko kami indak manginap di tampek nenek doh, tapi manginap di tampek Mamak. Posisi Rumah Mamak ko barado tapek di kaki Bukik tampek rakyat saisuak baparang malawan Japang, Bulando dan tarakhir Tantara Soekarno. Masih ado bukti parang nan taruih dipartahankan waktu tu. Manancapkan bendera merah putiah di puncak bukik ko nan barado di tapi labuah. Dimuko rumah disabarang jalan lah tabantang sawah sampai sajauah mato mamandang, dikajauahan nampak gagah gunuang Marapi nan di puncaknyo ado gumpalan asok ilang timbua tiok sabanta. Maagiah kesuburan tanah untuak ranah minang nan tacinto ko. Maso tu adolah hari mamanen ikan ameh dimano sawah baraliah fungsi jadi tambak ikan dadakan nan biaso dinamoan jo 'Ganangan'. Ikan ganangan adolah ikan nan dibali dalam ukuran 4 ikua sakilo trus dimasuakkan ka ganangan sawah nan alah salasai manyabik, trus diolah jadi tambak ikan samantaro. Ikan nan di ganangan ko dipertahankan salamo musim hujan tu untuak digadangan jadi ukuran 2 ikua sakilo. Dalam ukatu singkek gananganpun kembali ke fungsinyo untuak mananam padi. Jikok ado hujan nan labiah labek dari nan biasonyo, ikan-ikan tu kadang bisa kalua dari ganangan malapeh ka banda umum. Biasonyo akan banyak urang turun ka sawah-sawah sasudah banjir ko, mancari keberuntungan jo caro manangguak ikan-ikan ganangan nan malapeh ka banda ko. Suatu bantuak hukum rakyat nan indak ado pasal tatulihnyo di daerahko. Jiko ikan lah malapeh ka banda, maka siapun buliah maambiak, alah jadi milik umum, ampia samo jo hukum batang durian. Kalo durian alah tapisah dari tampuaknyo jatuah ka tanah, maka nan mampunyoi adolah sia nan daulu maambiaknyo, walaupun tumbuah di parak urang, urang lalu berhak maambiak jikok durian tu indak dijago. Babekal embe ketek jo panangguak ukuran sadang elok, kami barangkek dari rumah sasudah sarapan nasi goreng buatan kakak sepupu. Kamipun ikuik Ummi (etek), karano anak2 liau mamanggia Ummi, kamipun ikuik maimbau liau jo Ummi. Ummi hari2 karajo di sawah, tapi lucunyo Ummi takuik jo yang namonyo lintah. Sambia bajalan dipamatang sawah, kami bagurau-gurau. Ambo : Mi.. baa dek takuik Ummi jo lintah? Ummi : Galinggaman den.... Ambo : Tapi hari-hari Ummi kan basobok jo lintah ko? Ummi : Itulah yiah.Aden kan lah ba-SK di sawah tapi den yo galinggaman jo lintah tun Sadonyo: hahahahahahaha............... Sampai di sawah Ummi mamakai celana panjang nan ujuangnyo dikabek trus kaki liau dibaruik jo tembakau. Kato Ummi lintah takuik jo tembakau. Mulailah Ummi dan rombongan induak2 nan lainnyo mambokek banyiah trus sebagian ado nan batanam. Ambo salut jo kekompakan yang dibangun dek rombongan ibuk-ibuk yang ber-SK-kan di sawah ko. Mereka mengelola sawah mereka nan laweh-laweh ko jo system gotong royong. Misalkan hari ko sawah si A dipagarutuangan mananam sampai sudah, bisuaknyo sawah si B, si C sampai sadonyo beres ditanami. Sasudah tu turun lo baliak ka sawah untuak basiang. Basiang dari gulma-gulma nan indak paralu tumbuah pulo maambiak jatah hara untuak padi. Baitu sataruihnyo sampai manyabik. Prosesinyo lah malingka sajo tanpa dikomadoi. Sungguah system win-win solution nan berimbas kapado samakin areknyo silaturahim penduduk kampuang tu. Kembali ka si anak duo nan mangikua tadi tu, ambo jo abang ambo nan jarak kami beda satahun sajo ko, lah sibuk pulo maharu-haru banda jo panangguak ikan nan kami baok. Macam-macam ikan nan didapek, ado puyu, pantau, udang, mujaia, bada putiah, anak limbek, garundangpun masuak juo hahaha... Nah.. ikan ketek-ketek nan dapek di tangguak kami kolah nan disabuik jo "Bada Macah". Biasonyo adonyo di musim pahujan nan mano talua-talua ikan baru manateh sahinggo banyak ikan ketek-ketek ko di banda-banda di sawah. Bialah ambo tarangan ciek-ciek ikan nan kami tangguak ko : Puyu : adolah jenis ikan nan tahan bantiang, ampia samo jo rutiang (gabus) angoknyo kuek. Talok bajalan di tanah mancari aia. Kapalonyo kareh, warnanyo abu-abu galok. Pantau : Ikan ko adolah ikan nan paliang banyak barado tarutamo di aia nan mangalia, jenisnyopun banyak. Ado nan disabuik pantau pedang, ado pantau tarusan nan ado di banda tarusan kamang, adolo pantau banda nan biaso disabuik pantau buncik. Memang paruiknyo yang buncik kolah nan mambueknyo disabuik pantau buncik. Tapi perkembangan pantau ko ado nan jadi ikan hias nan disabuik jo Moli. Udang : Udang yang kami dapek katiko tu adolah udang aia tawa nan manuruik Ummi udang ko asalnyo dari Tarusan Kamang. Udang ko baukuran kaciak sekitar 3 -5 cm kuliknyo kasa. Mujaia : Sia urang awak nan ndak tau jo mujaia? Hubungi ambo hehe.. Mujaia nan di banda ko adolah mujaia sawah nan baukuran ketek sekitar sajari duo jari nan tulangnyo aluih. Indak ado sobok dek ambo doh mujaia sarupo itu di rantau ambo ko. Kebanyakan muajaianyo lah jadi lohan nan batulang kasa jo bau tanah. Ambo paliang suko mujaia ketek ko di dibalah maco asin trus digoreang kariang jo campuran lado mudo...nyam..nyam..deh. Bada Putiah : Ikan ko kalo di jawa namonyo wader, atau adolo nan manyabuik ikan sungai. Sisiaknyo nan mangkilek perak nan mamantulan warna silver, mangkonyo disabuik ikan putiah. Gadangnyo ndak labiah dari sajari sajo. Anak limbek : limbek = lele Biasonyo mamacah di rumpuik-rumpuik, kalo ado rumpuik nan maraok ka tapi banda disitulah banyak anak2 ikan mandok. Kiniko alah ado lele hias nan dijua urang nan albino, adolo nan bintiak-bintiak. Garundang? Garundang adolah versi metamorphosis lain dari koncek/kodok/katak/bangkong/? Proses awal dari koncek ko dimuloi dari manatehnyo talua koncek manjadi garundang. Paliang lameh kalo lah sato lo garundang ko masuak ka dalam tangguang nan banyak ikan ketek2nyo. Mamiliahnyo jadi harus selektif bana, kok indak lah tamakan koncek pulo awak beko hehehe. Lah ampia tangah hari, ummi lah sibuk mamanggia kami untuak makan siang. Menu ala urang kasawah ko, ikan paweh bagoreng balado jo campuran taruang ungu. Gulai cubadak nan baru diambiak di kabun jo campuran saketek ramek2 dagiang. Luar biasa ueenak tenan kalo makan di sawah nan jauah dari rumah-rumah penduduk tu. Antah memang sambanyo lamak, nasinyo lamak atau suasanannyo? Pokoknyo sip markosip, top markotop indak talupoan sapanjang masa. Istirahat di dangau di tapi pamatang sawah sabanta sambia mangalai-ngalai, kami taruihkan untuak malanjutkan manangguak bada macah ko. Lah manjalang lapeh tangah hari sekitaran jam tangah tigo. Kamipun pulang basamo-samo bajalan kaki dipamatang ka arah kampuang. Ummi sudah baiyang-iyang (cerewet) mangingekkan kami untuak indak bapaneh-paneh bana di sawah. Dasar kami nio baluluak-luluak otomatis yo bapaneh-paneh. Kok indak ndak bisa manangguak doh. Langan baju nan diateh siku disibakkan dek Ummi, tampak alah balang. Sabalah ka bawah lah merah padam dek kapanehan. Di hati kami nan masih ketek-ketek tu, maa ado dipikian, nan penting heppi..kan mantu du, maso kanak-kanak kito tu? Sampai di rumah kakak sepupu yang padusi nio mancaliak hasil tangguak an kami tu. Kebetulan ambo indak takuik jo lintah, ambo baokkan oleh-oleh sikua lintah nan sadang elok gadangnyo. Ambo ambiakkan lintah tu dari dalam embe nan ambo tenteng tu. Takileh dek uni ambo tu lansuang tabang ambua inyo, sambia dikuncian pintu ambo ndak buliah masuak sabalun dibuang lintah tadi tu. Hehehe..memanglah.alah ba-SK di kampuang nan dikaliliangi sawah, otomatis pasti banyak makhluk kicik ko dima-dima, tapi masih juo takuik.. Lah salasai episode lintah tu ambo ambuangan ka dalam tabek di muko rumah, baru dibuliahan ambo jo abang masuak rumah. Dibaok bada macah tadi tu ka dapua untuak disiangi. Bada-bada nan aluih-aluih indak dipanga-pangakan doh, dicuci sajo lansuang digarami. Kalo nan agak kasa baru disisiak jo buang isi paruiknyo. Jan ditanyo manihnyo bada nan baru ditangguak ko. Kalo udang dibuang ikua jo kapalonyo sajo. Kadipangakankah gerangan bada2 ko? To be continued Wassalam Rina --~--~---------~--~----~------------~-------~--~----~ . Posting yg berasal dari Palanta RantauNet ini, jika dipublikasikan ditempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. Email besar dari 200KB; 2. Email attachment, tawarkan disini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama =========================================================== Berhenti, kirim email kosong ke: [email protected] Untuk melakukan konfigurasi keanggotaan di: http://groups.google.com/group/RantauNet/subscribe -~----------~----~----~----~------~----~------~--~---
