Ajo
Tarimo kasih atas supportnyo. Harato urang nan manggaleh babelok mode
ambo ko, iyo hanyo foto jo carito, salain itu abih dek angin
se...he..he. Saran ajo ko menarik, tapi ambo paralu baraja banyak teknik
foto, khususnyo foto malam hari untuak maambiak urang nan bakasenian
tradisional kito. Ambo terobsesi juo jo buku-buku foto nan maha-maha di
jua di toko buku. Kalau di bandara sukarno hatta, di terminal duo, ado
ciek, ambo suko singgah kasinan hanya untuak mancaliak buku foto ko.
Aduh...jo, lupo ambo maambiak foto urang gaek sandiri nan mamasak di
dapua untuak ambo. Alah duo hari ko menunyo baganti-ganti, inyo
mamasakkan sambalado tanak, palai ikan lauik, goreang patai masiak jo
maco baledang, ado pulo dendeang basah.
Kalau nan di daerah lain, lai ambo foto-foto juo, misalnyo tampayan
pambuek tuak bareh urang pedalaman Kalimantan, sampai urang manggaleh
pinang untuak kadimakan di Papua, pamandangan di kota Ternate (ado di
pitih saribu-ambo sampai di kafe tampek pamandangan persis mode di pitih
tu) sampai ka Monkey Forest di Ubud Bali. Lumayan banyaklah jo. Tapi iyo
baru pada tahap dipandang-pandang se.
Sakali lai tarimo kasih
Andiko Sutan Mancayo
Lies Suryadi wrote:
Sanak Andiko,
Tapurangah sarato badagun2 darah di dado maliek foto2 kampuang awak
nan Sanak postiangkan. Jauah di mato dakek di hati. Pandapek ambo, dek
Sanak urang pajalan, kumpuakanlah foto2 tu, agiah /caption/ dulu tiok
foto (wakatu dan tampek). Sia tahu nantik bisa ditabik'an dalam
bantuak buku ekslusif: gambaran visual kampuang awak kini. Takana dek
ambo satu buku nan tabik alun lamo ko di Jerman: buku bagambar rancak2
tentang Indonesia, mulai dari Aceh sampai ka Papua. Buku tu dibuek dek
duo urang anak mudo jerman man kaliliang Indonesia salamo duo tahun.
Bamacam gambar di dalam,mulai dari urang manangkok ikan sampai
carositokar oto mamintak pitih; mulai dari lauik sampai gunuang.
Ondeh....kalau mancaliak buku tu, iyo taraso baa kayonyo Indonesia ko
dari segi kebudayaan dan alam. Tapi ikolah nan agak kurang pandai kito
manjagonyo kini. Saminggu tarakhir ko ambo liek opini /Kompas/
taruih-manaruih tentang kerusakan alam kito dek penambangan nan
manjadi2. Kalimantan ampia "karam" lai dek ulang urang2 cangok nan
mangaruak paruik bumi ko.
Catatan ambo ka Sanak Andiko: cubolah abadikan moment nan labiah
spesifik: samumpamo URANG MAMBUEK LAMANG, URANG MAAYAM KATUPEK
PITALAH; URANG MAMBUEK SAMBALADO TANAK; URANG MAMBUEK KUE SAPIK; URANG
MANANGKOK BALUIK; URANG GUBALO ITIAK; URANG MAMBUEK TANGGUAK; URANG
MAMASANG LUKAH; URANG MAMBUEK GALAMAI; URANG MAMBUK GAMBIA; URANG
MARACIK TIMBAKAU; dll. Baitu juo genre2 sastra lisan (Minangkabau
verbal Art), mukasuik ambo suasana wakatu penampilannyo:
misalnto BAGURAU/BASALUANG, DENDANG PAUAK, BATARAM, BAILAU, BALUAMBEK,
BARANDAI; SIMARANTANG (khusus di Tiku); INDANG; SALAWAIK DULANG;
BATALAM; BATINTIN; BADABUIH; RABAB GALUAK (RABAB PARIAMAN); RABAB
PASISIA; DENDANG PAUAH; RONGGENG PASAMAN; BASIMALIN; BASIJOBANG;
DENDANG MANANGKOK HARIMAU (khusus di Pasaman); BAGAMAIK; MAIN KIM; dll.
Tiok nagari di Minangkabau ado kekhasannyo. Kok ado kesempatan dek
Sanak Andiko ka kadai Tanama Records di Padang (di dakek Blok A),
balilah kaset rarab Pariaman (rabab gaaluak) nan bajudul: JALAN
KULILIANG BILANG NAGARI oleh tukang rabab Amir Hosen. Di sinan dapek
didanga namo2 nagari Minangkabau sabalah pasisia barat dengan sagalo
kekhasannyo: umpamonyo LAMANG BAMINYAK SUNGAI ASAM, KATUPEK SASAK RANG
SICINCIN, dll.
Tabayang dek ambo, suatu hati nanti kalua buku: MINANGKABA KINI DALAM
GAMBAR karya Sanak Andiko. Tabik ekskulusif jo kualitas karaateh dan
gambar nan rancak. Iko pasti memberi sumbangan pulo bagi pariwisata
Minangkabau. Soal kepeng untuak manabik'annyo, ambo kiro ado mah.
Urang Minang, tamasuak babarapo urang nan di lapau ko URANG SARIBU
ANAM mah.
Wassalam,
Suryadi
--
.
Posting yg berasal dari Palanta RantauNet ini, jika dipublikasikan ditempat
lain wajib mencantumkan sumbernya: ~dari Palanta r...@ntaunet
http://groups.google.com/group/RantauNet/~
===========================================================
UNTUK DIPERHATIKAN, melanggar akan dimoderasi:
- DILARANG:
1. Email besar dari 200KB;
2. Email attachment, tawarkan disini & kirim melalui jalur pribadi;
3. One Liner.
- Anggota WAJIB mematuhi peraturan serta mengirim biodata! Lihat di:
http://groups.google.com/group/RantauNet/web/peraturan-rantaunet
- Tulis Nama, Umur & Lokasi pada setiap posting
- Hapus footer & seluruh bagian tdk perlu dalam melakukan reply
- Untuk topik/subjek baru buat email baru, tidak dengan mereply email lama
===========================================================
Berhenti, bergabung kembali serta ingin merubah konfigurasi/settingan
keanggotaan di: http://groups.google.com/group/RantauNet/subscribe
