*Seri Dendang Kuliner XI : Kue Bika Si Mariana*
Si Sanip Bakudo Sirah
Mandi-mandi di Biaro
Garah nan sabana baserai
Nasip bak cando kue Bika
Di bawah api di ateh baro
Di tangah badan sabana marasai
Ikolah dendang kue bika sanak, kue parumpamaan di tangah pasa,
parumpamaan sakik nan jo sanang. Sakik abih sanangpun tibo. Kok badan di
sabuik jo galak pencong, malayang tarompa tenggi tumik urang marando,
kok disabuik jo ibo ati, baguguah aia mato malah jadi.
Sadarun gas oto, sadacik rem bendi bugih, di Koto Baru malah tampeknyo,
bika Simariana urang imbauan. Ba apik Singgalang jo Marapi, badampingan
antaro musajik jo los balai. Disinan tagak lapau ketek, lapau nan banamo
Bika Simarianan.
Kue bika nan ka disabuik, bakinca tapuang bareh nan jo karambia, gulo
datang mambao candu. Ba abih tanago badan di puta, nak nyo padu sagalo
bahan. Dek kareh bareh nak ka jadi tapuang, bacakak alu nan jo lasuang,
bunyi nan bateba ka suduik kampuang, ma agiah tando maradeso jinih. Padi
manjadi, jaguang ma upiah, sawah gadang datuak Palo, padi si sayang
katampang anak nagari, pa hapuih malu jo panyonsong dagang lalu.
Baitu pulo karambia limbayuang, tumbuah nan tinggi ma apik rumah gadang,
badan samparono buatan, indak sakuduang tabuang tido, batang ka jadi
ruyuang pamaga nagari. Santan nan putiah pati bumi, sagalo nan elok
mangko manjadi. Putiah bak awan ba mego-mego, tabang bararak di langik
Allah.
Kok gulo, gulo nan indak sumbarang gulo, manih nan paubek badan jariah.
Kok gulonyo gulo anau, anau nan tampek saga sati, indak tapampeh dek
patuih tungga. Kok gulonyo gulo tabu, tabu bukan sumbarang tabu, tabu
paubek Rambun Pamenan, parumpamaan si manih muluik. Ba adaik badan di
pangkeh, ba anjuang ditanah Jao.
Sakatiku badan padu, abihlah gali dek galitik, abihlah miang dek
bagisia, lakek bak awua nan jo tabiang, sanda basanda manahan bukik.
Cinto nan bapacik arek taguah, usahkan bacarai iduik, bacarai mati raso
ndak ka rela. Disinan janjian di kabek taguah, sabab badan ka manyonsong
api.
Sakatiko badan di ciduak, lamak tatanggok di ateh daun, onggok nan indak
gadang bana, elak pangganja paruik lapa. Anguihlah balango di ateh
tungku, balango tanah dari Galogandang. Kasinan badan ka di cubo,
mangasah sagalo ilimu, baro nan indak mambuek gamang. Sakatiko badan
sampai, surang diri di dalam balango, di baco kulimah ilahi, bia nak
tawa racun api. Di bawah urang ungguak baro, nyalo bana kayu kulik mani.
Sajuak sakatiko, di ateh ditimpo pulo, api bak cando manari-nari, angek
nan alang pakupalang, angek elok ka mambaka nagari, si Gulambai api sati.
Disinanlah sanak, dibawah baro diateh api, ditangah-tangah badan di uji.
Dek putiah hati manyonsong api, indak ka paneh mambuek anguih. Harum
maruok mangguguah puro, salero buruk bana nan marantak. Mancaliak badan
putiah coklat raso rangkah.
Oi kawan sapamainan, maurak kaji di surau tuo, ba habih hari di tapian
mandi, ondeh malang nasip bak cando kue ko, kue bika urang imbauan,
diateh api dibawah baro, di tanagah-tangah badan di sangai. Tapi bialah,
bialah nak ka sanang ibu bapo, di sonsong malah paneh si gulambai, rila
badan bamandi paluah.
Sakian dulu dendang kue bika, pa imbau sanak nan larek di rantau, imbau
nan mambao pasan singgah, tajanguak juo surau, lapau jo tapian tampek mandi.
Salam
Andiko Sutan Mancayo
Kue Bika 1
Kue Bika 2
--
.
Posting yg berasal dari Palanta RantauNet ini, jika dipublikasikan ditempat
lain wajib mencantumkan sumbernya: ~dari Palanta r...@ntaunet
http://groups.google.com/group/RantauNet/~
===========================================================
UNTUK DIPERHATIKAN, melanggar akan dimoderasi:
- DILARANG:
1. Email besar dari 200KB;
2. Email attachment, tawarkan disini & kirim melalui jalur pribadi;
3. One Liner.
- Anggota WAJIB mematuhi peraturan serta mengirim biodata! Lihat di:
http://groups.google.com/group/RantauNet/web/peraturan-rantaunet
- Tulis Nama, Umur & Lokasi pada setiap posting
- Hapus footer & seluruh bagian tdk perlu dalam melakukan reply
- Untuk topik/subjek baru buat email baru, tidak dengan mereply email lama
===========================================================
Berhenti, bergabung kembali serta ingin merubah konfigurasi/settingan
keanggotaan di: http://groups.google.com/group/RantauNet/subscribe
