Assalaamu'alaikum wa rahmatullaahi wa barakaatuhu
Amuah juo titiak ayia mato gaek ko katiko mangana sijarah. Mungkin dek ambo
tamasuak anak kasayangan (walaupun sayang baliau sabanano indak babagi do),
ambo jo uda ambo maso itu iyo nan paliang acok dibao ayah, bagonceng jo
kuretangin. Uda ambo duduak di balakang, ambo duduak di kurisi rotan khusus nan
bakabek-an di batang kuretangin dimuko. Bakuretangin batigo tu dari Lambau
amuah sampai ka kampuang ambo di Koto Tuo, amuah pulo sampai ka kampuang baliau
di Koto Panjang Kamang Hilia.
Umua anam tahun ambo alah panah kanai lacuik dek baliau (kan sayang kaanak
balacuik-i) tapi sasudah kanai lacuik tu baliau gendong di bahu baliau bajalan
sajak dari Lambau ka pasa ateh, pai makan sate. Baliau jo ambo sajo.
Namo baliau Saibi, namo ayah baliau Ismail. Tapi sajak ketek-ketek kami alah ba
Saib an sarupo di namo ambo kini. Gala baliau Sutan Lembang Alam. Duo hari
sabalun ambo 'pai' babinyi (ambo manikah tanggal 1 Juni 1979) datang adiak
baliau nan padusi sarato adiak sapupu baliau nan laki-laki, ka Koto Tuo, mambao
talam, dek anak pisang ka pai babinyi. Dalam acara maanta baka tu, bapasan
banalah tipak bako ambo, bahaso baliau maantaan juo gala nan ka ambo pakai.
Gala nan kecek inyiak Muncak basalin abih, Sutan Lembang Alam. Gala nan hanyo
ambo sajo buliah mamakai, indak buliah dilakek-an pulo ka kamanakan ambo. Kok
ambo mati isuak, galako babaliak-an baliak.
Tasabuik pulo pakaro urang ilang carito awak kapatang. Ayah ambo ko badunsanak
barampek, duo laki-laki duo padusi. Baliau nan paliang tuo. Nan laki-laki
maningga di Pakan Baru tahun 1957. Adiak baliau nan padusi, dijapuik urang
malam di tahun 1959. Indak basuo sampai kini. Anak dari mak tangah nan ilang
malam ko, surang padusi, sato pai ka lua jo suami jo anakno sataun di bawah
ambo. Uni Nur ko tatembak di sabuah parang di daerah Suliki. Suami uni Nur ko
baru maningga babarapo bulan nan lapeh di Padang. Anakno surang laki-laki masih
ado, tingga ndak jauah dari tampek ambo di Bekasi.
Panjang pakana awak ka jaman dulu.....
Wassalamu'alaikum,
Muhammad Dafiq Saib Sutan Lembang Alam
Suku : Koto, Nagari asal : Koto Tuo - Balai Gurah, Bukit Tinggi
Lahir : Zulqaidah 1370H,
Jatibening -Bekasi
--
.
Posting yg berasal dari Palanta RantauNet ini, jika dipublikasikan ditempat
lain wajib mencantumkan sumbernya: ~dari Palanta r...@ntaunet
http://groups.google.com/group/RantauNet/~
===========================================================
UNTUK DIPERHATIKAN, melanggar akan dimoderasi:
- DILARANG:
1. Email besar dari 200KB;
2. Email attachment, tawarkan disini & kirim melalui jalur pribadi;
3. One Liner.
- Anggota WAJIB mematuhi peraturan serta mengirim biodata! Lihat di:
http://groups.google.com/group/RantauNet/web/peraturan-rantaunet
- Tulis Nama, Umur & Lokasi pada setiap posting
- Hapus footer & seluruh bagian tdk perlu dalam melakukan reply
- Untuk topik/subjek baru buat email baru, tidak dengan mereply email lama
===========================================================
Berhenti, bergabung kembali serta ingin merubah konfigurasi/settingan
keanggotaan di: http://groups.google.com/group/RantauNet/subscribe
