Pak Emi lah salam bagurau, baa ka dilanjuik serial opelet CB ko lai di palanta ko (kok di balerong tu sagan awak) kito agiah judul
Surek Oplet Cigak Baruak By :Jepe Nan sitokar kaliang, nan toke santiang pulo, sabana tarawat oplet CB ko dek toke masin rancak nan bodi baru babadak pulo tibo oplet CB kantinyo toke nan samo model, merek jo tahun mambueknyo, ndak do lai lah geroh oplet CB kanti toke ko, dikaokan juo pai manambang jampang dibaok lari diateh ampek bilih tangguang akibatnyo masin rarak nan bodi tingga di balakang Nan oplet CB toke jaan ditanyo dek lai rajin si kaliang marawtnyo masih kuek juo manambang, pantang diagoh lai ado urang mancarter kama sajo ditampinnyo mah dek oplet CB Toke ko. Nah katiko liburan akhir pakan nan panjang ko Opelet CB toke dicarter urang dari bukik ka lubuak bangku "Kaliang..kaliang..iko oplet awak dapek carteran mambaok urang pai baralek ka Lubuak Bangku" toke ma hape si kaliang "Ndee ko ambo sadang karajo ko Ke, manimbo tobek ka dikureh lai aianyo, baa lah ka aka lai ko paralu juo ambo ikuik jadi sitokar"si Kaliang "Apo kaliang ka mahambua-i tobek koriang lo waang" toke bagarah diujuang hapenyo "He he he..alun terlakik lai do Ke..manghambua-i tobek non koriang sadangkan lai baraia tobek ko ndak tolap kaliang manghambua-i do " jawek si kaliang "Siap2 lah lai kaliang sabalun maantaan urang nan kabaralek ka lubuak bangku ko ado carteran stek mambaok sayua mayua dari simpang padang lua ka Koto Baru, sakitar jam 10 an baru awak ka lubuak bangku tunggu sajo di simpang padang lua tu" Toke lansuang sajo ka pokok kecek lai, dari pado si Kaliang baulah jo bagarah taruih "Jadilah Ke, ambo tunggu disimpang Padang Lua" jawek si Kaliang Sakiro jam 7 pagi Toke lahnyo kaluakan dari kandang oplet CB ko dari rumahnyo di Magek manuju simpang padang lua tampek si kaliang manunggu jo tampek mamuek sayua mayua nan ka dibaok ka Koto Baru. Si Kaliang manunggu di simpang oto tibo sikaliang lansuang manamui toke nan sadang mamuta stir mamarkirkan oto agak ka tapi "Ke.Ke..ambo alun sarapan lai do, makan nasi sup gai awak lu di lapau randah dakek simpang ka sungai tanang tu" si Kaliang maibo2 sambia maresek "los lambuang" nyo "Kaliang..kaliang salero ka salero sajo pangana waang mah karajo alun lai do, tapi baa lah nan waang ndak asiang lai jo den do, sajak oplet ko baru den bali waang lah jadi sitokar waden sajak dulu, molah sarapan awak lu nan waden yo alun sarapan juo lai" jawek Toke Lah duduak dilapau randah si toke jo si kaliang sarapan nasi sup ndak lupo pulo teh talua sagaleh sorang, ndak do lai tagak-tagak sisunguik sikaliang jo toke dek mati kalamaan makan nasi sop nan sero jo teh talua nan kamek lapau randah ko.Salasai sarapan Toke jo si Kaliang maurak duduak di palanta lapau randah nasi sop ko lansuang mamuek sayua mayua di simpang pada lua taruih ka Koto Baru Si Kaliang duduak disampiang toke nan manyopir oto sambia maota jo Toke "Ke kemmyo mahaappp bana ambo.... Alun lanjuik si kaliang ka maota dipotong dek toke "Oiii kaliang ko mahhaaap ko baa lo ko gaya waang mangecek..makasuiknyo Mo'oh" toke protes maliek tingkah si kaliang nan banyak gaya mangecek maaf "He he iyo ke malsud ambo Mo-oh ambo" si Kaliang lah mulai serius mangecek ka toke apo nan kadisampaikan "Mo'oh apo kaliang" "Iko ha kok karajo di tanggal merah ambo danga2 upahnyo agak dobel mah toke, itu kecek paraturan pamarintah mah Ke...yo Mo'oh bana ambo batanyo cando itu ka Toke, solanyo ambo dapek borongan tadi mamboka tobek, kok dek toke sajo mah tapaso ndak ambo lanjuikan mambongka tobek tu"si Kaliang bamohon upahnyo di tanggal merah ko duo kali lipek dari hari2 biaso "Oiiii kaliang ndak kaberetong bagai awak do, aman tu, upah carteran mambaok sayua jo maangkuik urang baralek ka lubuak bangku kaluakan bali minyak sisonyo ambiaklah dek waang kaliang" jaek toke Mandanga bantuak itu sanang bana hati si kaliang batambah samangaiknyo manambang jo oplet CB toke "Tapi tunggu lu kaliang kaluakan juo pitih untuk pambayia nasi sup jo talua tadi, kanai waden 25 ribu mah sarapan tadi pagi..suai kaliang" baujuang juo kecek toke ko (Bato Ke..ndak gratis doh yo sarapan tadi pagi" si kaliang mambathin he he he) "He he he "ndak kabererong bana" awak do Ke"si kaliang saketek manyindia toke pulo dek tadi mangecek "ndak kaberetong bagai" Sudah mambongka sayua mayua di Koto Baru oplet cigak baruak lansuang ka magek manjapuik urang pai baralek ka lubuak bangku sakiro jam 10 an lah tibo di magek nan urang baralek lah manunggu Bersambung.. Lubuak Jantan-Lintau, 2 April 2010 Sent from my BlackBerry® smartphone from Sinyal Bagus XL, Nyambung Teruuusss...! -- . Posting yg berasal dari Palanta RantauNet ini, jika dipublikasikan ditempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. Email besar dari 200KB; 2. Email attachment, tawarkan disini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama =========================================================== Berhenti, bergabung kembali serta ingin merubah konfigurasi/settingan keanggotaan di: http://groups.google.com/group/RantauNet/subscribe To unsubscribe, reply using "remove me" as the subject.
