Sanak Palanta Baru sajo mancogok jambatan Mahakam, badanyuik jantuang di dado, alah ka bacarai badan jo koto, koto banamo Samarinda. Tampak di kajauahan, musajik gadang Islamic Center, bak cando di selat Basporus badan nangko, selat nan mamutuih Timur jo Barat. Indak saba bendi di pacu, bakaja-kaja kilometer, dacik badacik bunyi rem, suok kida putaran stiur. Nan koto ko, samakin jauah tingga di bulakang, tingga langkok basarato jo durian. Durian basusun di tapi Mahakam.
Tabayang kajadian siang nangko, malipek selo di Kampus Unmul, sikolahnyo para forester, banyaklah anak mudo datang manuntuik. Tapi sungguahpun baitu, samakin sanjo industri kehutanan, samakin sarik kayu di rimbo, manurun pulo Fakultas Kehutanan ko. Tinggalah pinus-pinus jadi sasi, anak-anak mudo nan bakuhampeh manuntuik ilimu, ilimu tantang isi rimbo. Sahampia dari tangah bukik Suharto, batanyolah ka si kusia bendi. Oi mamak kusia bendi, dek lamo badan bajalan, tiok pagi jo sanjo maukua jalan, dari Baliakpapan ka Samarinda. Tantulah dek lamo bajalan banyak diliek, dimalah kolah kadai urang bugih manggaleh Coto, Coto tamasua di koto nangko ?. Manjaweklah si kusia bendi, oi anak mudo-mudo matah, dimalah kampauang buyuang, mangalah nan takana Coto di rimbo Kalimantan ko. Oi mamak kusia bendi, di kaki Gunuang marapi darah tumpah, disinan pulo sumpah di baco "Karatau madang diulu, babuah babungo balun-Karantau bujang dahulu, di kampuang paguno balun" "Dimalah bumi di pijak, disinan pulo masakan dicubo" Satantang Coto nan mamak tanyokan, coto nan iyo bapasangan, pasangan katupek bareh dari Maros, lambuaik nan alang makupalang. Baa mangko jadi coto, balilih jawi tagak mak, tadangalah pakiak dek saweri gadiang hinggo lahia Hilagaligo, rusuak nan di cancang urang manjadi konro, basusun ladiang mamutuihnyo. Kok konro mak, mancogok rusuak di balango, manari pisau di piriangnyo. Nak mamak tahu konro nan lamak, putalah bendi ka Karebosi, lapangan utamo di ranah Ayam Jantan. Kok kainyo mak, di abuih urang manjadi Kaledo, bakinca badan jo asam jao mudo, ubi batang abuih malah kawannyo, itu bana pananti rajo di tibo, etan di ranah urang Kaili, di lembah nan banamo lembah Palu. Oi anak mudo, baa pulo Coto nangko. Kok coto nan mamak mintak, bananti sajo badik nan tibo, tabusailah sagalo isi badan, itu bana nan di cancang urang. Bacakak katumba jo marica, sato pulo jintan jo kacang tanah, kuali basi manangguangkan, basi nan dari Luwu, koto banamo koto Palopo. Api layok-layok lintuah manghanguihkan. Alah salasai badan di irih, barang pulo di ayia manggalagak, indak ado nan salamaik lalu dari hangeknyo, kecuali mukjizat para nabi. Alah mancogok kaldu diri, bacampua pulo jo tumisan sagalo bumbu, dimalah harum indak mandaki, sahinggo tabukak pintu rajo Kutai. Kini, antalah ambo ka tampek Coto ko mak !. Salacuik bendi bajalan, sahambuah kudo marentak, sampailah kami di Baliakpapan Baru, disinan tagak lapau konro urang Bugih. Ramilah urang kalua masuak, bakapusuang harum diantaro kadainyo. Disinanlah kami bakucatak, ganti baganti coto jo katupek bareh. Padeh jo asam-asam tangguang, mati dibunuah teh manih angek. Tabiklah paluah bak cando gugua, bakilek-kilek di tapi bibia. Baitu bana sanjo di sonsong di Baliakpapan. Barisuak pagi, ka tabang pulo. Salam Andiko Sutan Mancayo -- . Posting yg berasal dari Palanta RantauNet ini, jika dipublikasikan ditempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. Email besar dari 200KB; 2. Email attachment, tawarkan disini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama =========================================================== Berhenti, bergabung kembali serta ingin merubah konfigurasi/settingan keanggotaan di: http://groups.google.com/group/RantauNet/subscribe To unsubscribe, reply using "remove me" as the subject.
