Sanak Palanta Kurang sakilo dari arah Gajah Mada di Pontianak, sampailah langkah di Pasa Flamboyan, salah satu pasa tradisional di kota iko. Malakik tabang, pailah ka pasa Flamboyan ko untuak mancari sayua pakih. Ternyata disinan ado duo jenis sayua pakih yaitu pahih nan hijau dan pakih merah. Pakih merah agak pendek-pendek jikok dibandiangkan dengan pakih hijau nan banyak dijadikan sayua di daerah-daerah lain. Pakih merah iko biasonyo di tumih jo ikan teri ketek-ketek. Mungkin iko nan di sabuik dengan cah pakis. Kalau dek ambo yo ndak tabedakan ma nan pakih merah ma nan pakih hijau kalau alah bamandi-mandi kuah manjadi gulai pakih jo ikan salai. Pakih merah indak maha di Pasa Flamboyan ko, hanyo 1500 tigo kabek. Sahampia dari urang manjua pakih, basususn sagalo bada kariang, mulai dari teri aluih, udang kariang, ikan siam atau acok disabuik gabus asin, sapek, basarato primadonanyo ikan kariang yaitu Ikan Talang Asin.
Alah salasai babali pakiriman kawan-kawan, langkah diurak baliak ka mungko pasa, tampek bendi nan baseo tagak mananti. Salanja kudo balari dari lampu merah, tagaklah kadai urang Maninjau, urang Bayua baliau ko. Tapi dek urang gaek nan marantau dulu ka Pontianak, nan awak alah lahia di siko, yo alun panah mancubo rinuak di tapi danau nangko. Sanak urang Maninjau ko ba urang rumah urang Sibolga, sahampia dari Aia Bangih, Madina kini Kabupatennyo kalau indak salah. Balain jo nan lain, sanak urang maninjau nangko, manggaleh manjua kerajinan, nan di buek urang kampuang nan taserak di perbatasan Malaysia, Mulai dari Melawi, Kapuas Hulu, basarato jo sambas. Basusun karajinan tagantuang, mulai dari babahan dasar rotan sampai ka bahan dasar tabu-tabu. Dek pandai jari ma anyam, inyo langkok sagalo bantuaknyo. Di etalase, basususn sagalo para mato, baragam rononyo, diujuang alah tatonggok pulo Kacubuang Kalimantan, ba pamanih mitos tuahnyo. Tapi bukan disinan mato tatumbuak. Kutiko dilayangkan pandang jauah, ditukuikkan pandangan dakek, tatumbuak mato di lapiak rotan. Lapiak bukan sumbarang lapiak, bukan Lampit nan biaso di balai, iko lapiak sarik batamu, jarang basuo. Lapiak banamo BIDAI, badan barasa nan dari perkawinan rotan jo Kapuak, kulik kayu bahan baju zaman saisuak, mungkin kayo Tarok kalau di Ranah. Salo manyalo rotan hitam, mambantuak motif jo kayu kapuak, kabatulan di bidai nangko, motif perisai nannyo pakai. Batanyolah ambo, dimanolah tukang nan mambuek lapiak, dimanolah tampek kadiamannyo. Bacuritolah si urang kadai, iko barang jauah di perbatasan, indak Pontianak biaso dijua, barang biaso beredar di Sarawak, disinan di bayia urang jo ringgik, sahinggo modal kami harus jo ringgik pulo. Nan rotannyo, bajihin ba hantu, ma alah rimbo mangkok dapek, baitu pulo kayu kapuak ko, manangih dewo-dewo malapeh kulik, tapi dek Debata nan alah manggarihkan, itu jalan nan kadituruik, ba upacara adaik janji di ikek, ba tampayan Nago dari Singkawang, langkok sarato jo tuak bareh nan ditanam di giliah balik, babilang tahun mako sampai, katampek badan ditanam di tanah samulo. Baitu bana bidai ko mangko jadi. Indak bapikia duo kali, lansuang sajo lapiak dibungkuih, lapiak langka jarang batamu, antah kok di padalaman rimbo Sumatera. Kalau indak salah, tahun 1980an terakhir nenek ambo punyo lapiak rotan, itupun cuma rotan sajo. Kok kini nangko, rumah alah rami dek lapiak palastik, kamalah rotan kadi cari. Rimbo dialah bumi di bolak baliak, disinan rotan bahibo hati. Bialah awak binaso, tabang maninggakan bumi Sumatera. Rimbo indak lai haniang, batingkah buruang jo siamang, baruak sato mamakiak. Kini rimbo alah heboh, bapacu-pacu bunyi sinso, badaram-daram bumi escavator. Alah hilang tuahnyo rimbo, harimau manjadi pamenan urang, gajah sato pulo manjadi buruan, bacakak barabuik lahan jo Manusia. Alah di cabiak pajanjian gaib antaro Manusia jo Inyiak Rimbo, saliang manjago wilayah masing-masiang. Baitulah sanak, alah banyak curito jo sanak urang Maninjau nangko, alah salasai Bidai di bungkuih. Sabalun pai, bapasan ambo ka dunsanak nangko, kalaulah nio sanak saketek maningkekkan palayanan, yaitu dengan sisitem pengiriman, jadi karateh sajo nan di baok dari kadai sanak, samantaro barang dikirim lewat ekspedisi, ambo yakin kadai sanak akan berkembang, baitu nan ambo caliak, mulai dari Baliakpapan ka Palangkaraya. Ramilah urang mambalinyo, karano indak bapikia untuak manjinjiang pulang. Cukuik mananti sajo di alaimaik nan diagiah. Ma angguak-angguak sanak nangko, apo lai ambo kecekkan, kalau itu dibuek, ikolah kadai partamo dengan sisitem begitu di Pontianak ko. Salam Andiko Sutan Mancayo Sadang Mananti Kapa Datang -- . Posting yg berasal dari Palanta RantauNet ini, jika dipublikasikan ditempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. Email besar dari 200KB; 2. Email attachment, tawarkan disini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama =========================================================== Berhenti, bergabung kembali serta ingin merubah konfigurasi/settingan keanggotaan di: http://groups.google.com/group/RantauNet/subscribe
