Sanak Palanta Tapek bana palangkahan, tapek di hari pesta rakyaik. Hampia limo kilo dari Sungai Tarab, etan ka pinggang gunuang marapi, kiro-kiro tigo kilo dari Koto Baranjak, jalan mandaki ka nagari Talang Tangah, patahanan PRRI. Di Nagari Gurun tampeknyo sanak, disinan lapiak di kambang, disinan urang ba pacu jawi.
Baa nan pacu jawi sanak. Ba niniak mamak mambukak alek, jawi babaju diarak, talempong danguang badanguang, ditingkah jo bunyi pupuik sarunai. Ba pidato tagak mambukaknyo. Makan bajamba urang disinan, langkok sarato jo siriah pinang. Alah salasai adat dikambang, disinan maso jawi bapacu. Jawi santiang alang kupalang, badan bakilek ditimpo matoari. Etan di ujuang sawah, disinan star dimulai, dilakekkan pasangan, disinan tagak anak joki. Sakatiko parentah tibo, diatur lari jo pasangan, ayia manyibak ka udaro, basurato jo luluak sawah. Manahan angok para penonton, mancaliak jawi mangukua sawah, sawah nan sawah kagadangan, kagadangan pangulu pucuak. baitu juo anak joki sanak, harus sarasi jo jawinyo, sabab jalan indak ka tampak, karena lunai tabang kamungko, dek jawi malajang alang kupalang. Disinan panonton basorak. Di tapi dakek galanggang sanak, disinan tagak pasa kaget. mulai manjua makanan sampai ka manjua pakaian. Nan tukang sate indak baranti mambaka bawang, ditimpo pulo jo minyak makan, baun nan sungguah maimboau-imbau. Badampingan jo inyo, tagak pulo lapau darurat, satangah dindiang ba daun karambia, baitu juo atoknyo. Dasia badasia bunyi patamuan, kutiko pisang mandi tapuang, dicampuangkan kadalam kuali minyak, disinan manjadi pisang goreng. bakawan pulo nan jo katan. Kok minumnyo sanak, batampuruang urang hidangkan, bukan maulang nasip cindua mato, ukatu ditawan tiang bungkuak, tapi...disinan seninyo sanak. Iko minuman kabasaran, Kawa Daun urang namokan. indak jadi pucuak manjadi daun dek ulah aso si tukang sangai, disinan mangko badan masiak. Alah masiak si pucuak kopi, diabuih pulo jo ayia Bulakan, harum mambubuang ka ateh langik, di campua pulo jo harum tampuruang. Itulah si Kawa Daun. Indak cukuik jo itu sanak, disampiang ado pulo, tek ros manggaleh nasi. Dek urang pacu jawi, inyo sangajo mambantai kambiang mudo, nyo gulai jo kasiah, disinan mangko raso makin manggilo. Nan pamasak dianta urang kaliang, jauah dari tanah hindustan. bakawan pulo gulai kambiang ko jo dendeng, indak lupo sambalado jo pucuak ubi. Dek hari paneh garang, batimpo jo padeh sambalado uwok, yo sabana mancucua paluah dibueknyo. Tapi jan ragu sanak, dibunuah padeh jo ayia angek, angek bacolok jo teh paik. Alun salasai padeh lapeh, datang pulo si pisang Kaliang, pisang sarik, jarang kalua, ka ganti kawan lamang sakabuang, langkok jo sarek tapai hitam. Urang Balimbiang jo Limau kaum nan punyo kapandaian. Sahampia dari sinan sanak, tatagak Buaian legendaris, itulah buaian tenaga manusia, buaian banamo Buaian Kaliang. Ondeh sanak...alah banyak kasiah di rajuik, alah banyak cinto manjadi, iyo dek naiak buaian kaliang. Buaian baputa-puta, dari ateh manurun ka bawah, di tulak pulo baliak ka ateh. Bakaja-kaja mamilin paruik, jo takuik-takuik sanang. Pakiak nan baserai-serai, itu bana panyumangaik si anak buai. Indak ka basuo kenangan nangko, meskipun di Duvan jo Disneyland. Kok pacu jawi sanak, gadang ketek, tuo mudo, jantan padusi, tumpah ruah. Disinan ladang panjanjian, bagi tokeh jawi jo anak gubalo, disinan pulo tampek pajanjian, bagi nan mudo-mudo. Di pacik arek di di pupuak janji, bialah niniak mamak nan ka manyalasai, bia kito hadang dunie nangko. Baduo diak, baduo sajo. Iduik nan cando buaian kaliang, sakali ka ateh, sakali ka bawah, tapi sungguahpun baitu, nan janji indak ka diungkai, sampai tibo panggilan malikaik maut. Baitu bana janji arek pasan taguah di buaian kaliang, di galanggang pacu Jawi. Sanak Palanta, batahun lamonyo indak mancaliak pacu jawi, iyo barubek sagalo karinduan. Karinduan ka kenangan maso kecil. Mungkin ado pulo sanak nan punyo kenangan. Sakian dulu sanak. Andiko Sutan mancayo -- . Posting yang berasal dari Palanta RantauNet ini, jika dipublikasikan di tempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini dan kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur dan Lokasi pada setiap posting - Hapus footer dan seluruh bagian tidak perlu dalam melakukan reply - Untuk topik/subjek baru buat e-mail baru, tidak me-reply e-mail lama dan mengganti subjeknya. =========================================================== Berhenti, bergabung kembali serta ingin mengubah konfigurasi/setting-an keanggotaan di: http://groups.google.com/group/RantauNet/subscribe.
