Assalamu'alaikum Warahmatullahi Wabarakaatuh, Adidunsanak lapau nan mulie,
Agenda ambo di tiok hari Sabtu pagi di siko iyo ndak jauah ndak lapeh dari balanjo ka pakan. Pakan disiko adolah pakan nan dibuek developer di antaro beberapa komplek perumahan. Pakannyo basuruakkan didalam komplek ruko. Ditangah-tangah dari ampek deret petakan kios nan lancik-lancik-an hehe kalua bahaso kampuang kawan ambo sisuak. Nah.. ditangah kios nan lancik2an tun takalimbun pasa mode pasa traditional kito di kampuang. Namun antahlah, kok sasisuak carito urang gaek kalo nan si padang bisa se tasuo manggaleh dimapun, apolai galeh mudo cando sayua-sayua, lado bawang dan lain sebagainyo. Kebetulan di pasa ko lumayan ado nan si urang awak ko manggaleh cando itu. Namun sayang amat disayang. timbangannyo acok kali tasuo kurang 2 mato dari sakilo. Memang lumayan rami dek talatak pas ditangah pasimpangan jalan di dalam pasa tun. Sahinggo Pihak pangelola malatakkan kotak kaco gadang untuak pambangunan mushalla di dalam pasa tu, eee..samo kawan ko disuruah malatakkan jauah-jauah, tahalang urang mambali ka tampek den kecek e. Olaalaa... Tapasolah security mamindahan ka simpang lain nan di tapi pasa tun. Mungkin pado batanyo, baa kok sirina sampai tau sadetail tu bana? Hehe..kebetulan pengelola pasa ko bakawan jo ambo, ampia acok basobok jo ambo di pakan kalo hari sabtu, pas nyo sadang mamintak seo kios jo lapak pasa ko, baitu juo jo tagihan aia jo lampu. A iyo lah sagan barek ambo jo Itok ko nyeh, sabana takilek bana dek inyo nan ganjia-ganjia tun nan tanyato iyo iduang awak juo nan tatunjuak baliak, Urang Awak. Sabananyo bukan itun nan nak ka ambo caritoan kini ko goh, carito ambo iyo indak lapeh juo dari nan teralah juo doh yaitu seri kuliner "life on a plate" mantun lo istilahnyo du kiyoh. Dek ari lah baransua tinggi juo goeh, dikaliliangilah pakan ko nan kalo dikaliliangi hanyo makan ukatu limo minik se..haha..namonyo se pasa komplek. Ado 3 kios dagiang, sapuluah meja ikan, salabiahnyo sayua2, kios kalontong namoe tu? Ado 3 urang nan manggaleh bumbu, Nan ciek khusus bagiliang tangan katiko tu juo. Iko iyo agak lameh ambo, dek lamonyo tu ha..ga nahaaann, ambo hanyo manfaatkan untuak bumbu lado goreang atau pangek sajo. Nan kaduo bumbu instan alah bagiliang juo, tapi indak nampak dima liauko manggiliang doh sadang nan katigo babantuak kios nan sabana langkok bumbue jo masin panggiliangnyo bagai..Baa dek bumbue ambo sabuik? Dek nan manggaleh Cik Uniang jo Ajo kito hehe. sarupo kalo lah tagak wak dimuko gulenang bumbu nan laweh-lawehnyo tu? Aa bumbue..kadibuek Nii??? Itulah pertanyaan khas pembuka dari Cik Uniang ko. Jadi ambo kana2lah apo nan ambo bali sadari tadi tu. Ado dagiang sakilo, limpo satangah, usus ayam nan lah barasiah sakilo, tetelan (ramek-ramek) sakilo, ikan bilih segar danau Toba, sarato sayua-sayua cukuik untuak pakawan samba salamo 5 hari. Rambutan sajarek panjang, apel 3 buah jo pisang sasikek nanmasih mangka. Rencananyo dagiang jo limpo nan kadirandang untuak lauak jago-jago.. lauak simpanan. Nan tetelan atau ramek-ramek ko untuak campuran sup sayua anak-anak. Bilih digoreang balado jo patai irih serong. Usus ayam kadiungkep dulu, untuak digoreang cando ayam penyet dimakan jo sambalado ulam plus nasi uduk. Kalo fillet ikan masih ado simpanan di kulkas kalo nak ka man sup ikan, rencana nak ka dibuek untuak Pak Emi pagi Senin nantik. Baitulah kalo bulan sadang mudo ko..sagalo takana nan kadimasak hehe..makonyo agak lapang nagari rasoe kalo bulan sadang mudo hahaha.. "Aa.. bumbue kadibuek Ni.tanyo Cik Uniang pas tibo giliran ambo. "Buek an ambo randang tigo ibu, ayam penyet duo ibu, lado goreang limo ibu mah lado maha mah hehe. Iyo Ni..lado sangaiklah kamahanyo, tapi kini lah agak tughun saghetek. (Mungkin dek Operasi pasa lado kaghitiang kapatang tun kali yo? Haha). Trus takana dek ambo ramek-ramek nan agak tabanyak mambali no, dek segar-segarnyo tuha..kok dibuek cancang agak satangah kilo kan ndak baa tu doh, pikia ambo. " Kok mambuek cancang kok ndak awak masuakkan santan, lai lamak beko du yoh? Tanyo ambo ka Uniang ko. Jadi Gulai Baga lah nyeh.. kalo di kampuang kami namo e Gulai Baga. Aa..bialah ambo cubo manggulai Gulai Baga ko," kecek ambo. Baa caroe Niang? Tanyo ambo. Uni tumihan bawang sadang elok, tu tumihan bumbue nan bagiliang ko sudah tu masuakkan dagiang ramek-ramke tu tapi rancaknyo Uni cincang ketek-ketek luh," jawek Si Uniang ko. Nampak dek ambo bumbunyo ko nan disisiahkan dek Uniang ko antaro lain : 1. Lado giliang sa ons 2. Sipadeh, langkueh bagiliang 3. Bumbu sup rempah 4. Katumba jo bumbu kambiang sangenek 5. Bawang putiah giliang 6. Daun kunyik, sarai jo daun limau puruik agak ganok "Sasudah Uni tumih iko sadonyo sampai kariang, baru Uni masuakkan aia angek agak sadang elok cando awak mambuek kuah sup banyaknyo. Aduak-aduklah sampai manggalagak kuah ko. Badaso awak mamakanne dari pado basantan-santan ko NI. Kadang lah patah salero mancaliak santan ka santan ko. Iyo lo du yoh," kecek ambo. Nah..tibo di rumah, ambo jarangan randang sasudah tu lansuang ambo jarangan lo Gulai Baga ko, buliah ndak lupo lo apo nan dikecekkan dek Uniang nan di pasa tadi tu. Alah salasai sambia mangacau-ngacauan randang, ambo ambiak nasi trus ambo kuahi jo Gulai Baga nan merah manyalo ko jo warna kuah agak kecoklatan khas aia kaldu. Sruupp..kicok lu..hehe.. sensasional bana rasonyo.. manihnyo kaldu jo padeh dari bumbu-bumbu nan sadang angek tu..wah.iko mah kampuaangg banaaa..batin ambo. Memang luar biaso raso GUlai nagari Ciak Uniang ko. Nendang bok... Kiro-kiro. apo iyo mode tu caro mambuek Gulai Baga ko? Ambo manarimo ide, kritik dan saran tarutamo dari adidunsanak lapau nan pernah manggulai Gulai Baga ko? Baa Ni Dewi??? Lai batua Gulai Baga Rina ko go? Tambah diangekkan batambah juo ampuaknyo ramek-ramek ko... kayaknyo agak batambah semok Rina alah duo hari ko hehehe.. Wassalam Rina, 33, batam -- . Posting yang berasal dari Palanta RantauNet ini, jika dipublikasikan di tempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini dan kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur dan Lokasi pada setiap posting - Hapus footer dan seluruh bagian tidak perlu dalam melakukan reply - Untuk topik/subjek baru buat e-mail baru, tidak me-reply e-mail lama dan mengganti subjeknya. =========================================================== Berhenti, bergabung kembali serta ingin mengubah konfigurasi/setting-an keanggotaan di: http://groups.google.com/group/RantauNet/subscribe.
