Sanak Palanta Pudua bagi kami di kampuang aratinyo mati, puduakan, artinyo matikan, atau kalau di timur, ado satu bahaso nan indah tadanga dek ambo, "Tindis". Ukatu mangaji di surau kampuang dulu, kalau mangaji malam, kami acok mamakai Lampu Togok. Mungkin banyak dari sanak palanta nan masih batamu jo Lampu Togok, tapi bagi yang indak panah batamu, bantuaknyo kiro-kiro mode iko : 1. Kalau nan paliang sederhana, biasonyo pakai boto kaco nan sedang, di tutuiknyo diagiah sumbu, botonyo diisi jo minyak tanah, baru sumbu itu nan di baka. 2. Kalau nan agak artistik saketek, yo babali ka tukang pati di balai. Boto tadi di ahiah kaki jo badan seng. Tapi ado juo seluruhnyo nan pakai seng, berbahan dasar kaleng bekas susu kental manis, diagiah sumbu, diagiah tangkai. Minyaknyo samo minyak tanah, dan sumbunyo di baka.
Kok cahayonyo iyo lindok-lindok, kama angin mahambuih, kasinan arah cahayonyo. Kok sumbunyo agak buruak, yo bakapusuang asoknyo, bisa tambah lusuah kupiah beka paragiah urang gaek partamo mangaji. Kalau lampu storongkeng, yo sakali-sakali sajo iduiknyo. Kutiko hari pakan biasonyo dan sakali-sakali kutiko ado acara nan pakai makan basamo. Udin karapai nan baru pulang balibur ka rumah mamak di Jao, punyo istilah lain, karena baliau ko alah bisa saketek-saketek ba bahaso Indonesia. Jadi dek udin ko, pudua ko diubah manjadi pudur, karena telah mengalami penyesuaian dengan bahasa Indonesia. Baitu juo koran barubah menjadi kran, karambia batuka pulo manjadi kerambil. Nan kami nan indak pernah pai balibur ko, yo ma angguak-angguak balam se, ma iyokan kecek si Udin nan alah mancaliak lampu-lampu rancak nan indak pudua-pudua di Jakarta. Kami jadi takana sebuah pasan guru mangaji, "buyuang, kalau ka iduik lampu togok kito, usahlah di puduakan lampu urang". Kalau di Indonesiakan ala udin karapai tadi, jadinyo kiro-kiro "Buyung, kalau ka hidup lampu togok kita, usahlah dipudurkan lampu orang". Takantuak-kantuak kami mamikia, bahaso indonesia si udin ko, sambia manunggu salasai mangaji jus amma. Nan lampu togok di samping guru mangaji kami, Sudah Hampir Pudur Pula karena kurang minyak dek jarang mambayia uang mangaji. Salam andiko sutan mancayo -- . Posting yang berasal dari Palanta RantauNet ini, jika dipublikasikan di tempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini dan kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur dan Lokasi pada setiap posting - Hapus footer dan seluruh bagian tidak perlu dalam melakukan reply - Untuk topik/subjek baru buat e-mail baru, tidak me-reply e-mail lama dan mengganti subjeknya. =========================================================== Berhenti, bergabung kembali serta ingin mengubah konfigurasi/setting-an keanggotaan di: http://groups.google.com/group/RantauNet/subscribe.
