Lamo indak mangawanan anak anak baranang, ambo iyo tapurangah gadang. "Aji... jangan loncat di tempat yang dalammmmmm...awas kamu bisa tenggelammm...m" ambo basorak tagang maingek an anak mbo nan alah kelaih duo SD mahambua ka kolam ranang rang gadang sadalam duo meter. Ambo sempat ka mahambua an kolam tu walaupun pakai sipatu lakak jo badasi ka maagiah pertolongan, takuik anak ambo tabanam. Sakalian ambo bagageh mancari palampuang. Kebetulan ari agak pagi tangguang ka siang ko indak pulo ado patugeh panyalamat. Mbo tahan hangok, sambia basiap mambuka sipatu jo jas badasi. Mbo etoang agak 10 etoangan kalau sapuluah etoangan anak mbo indak juo mancogok, mbo putuih an ka mahambaui kolam tu balagak sarupo patugeh panyilamaik sarupo nan pernah mbo karajo duo taun nan lapeh katiko baranang di kolam halim... "... 8... 9... Sapuuullluuuaaaahhhhh... Aji kenapa kamu tidak memberi tau kalau kamu sudah bisa berenanggggg....!!!" Antaro sanang jo cameh mbo baliak basorak, antaro berang jo galak nabi ambo manahan hangok."Ang karajoan waden nan alah gaek ko..." sambi marapian sipatu lakak jo dasi mbo baliak ka kurisi tapi kolam. Lah tamanuang pulo ambo agak sa batang rokok. Bapikia sambia geleang2 kapalo. Tanyato iyo lah lamo bana lo mbo indak baranang basamo anak2. Mbo kiro masih saroman ampek tahun nan lampau takan katu ambo ma apuang apuang anak ambo di kolam ranang hotel Pangeran kutiko pulang kampuang. Ambo manuangan maso baumua 7 tahun di Padang...kelaih satu SD mbo di tahun sambilan baleh tuju puluh tujuh tu tapi lawik alah manjadi tampek bamain mancari umang2 indak adoh rang gaek ma awasi. Baranang nyo guluang dek ombak aia tawa, ombak ulak karang, ombak pasia kandang jawi, jo ombak pasi jambak alah pasai awak cubo. Baitu pulo baranang di batang aie gadang aie tawa, lubuk minturun, kampuang kalawi, batang aie kampuang koto (Nanggalo) di bulakang bukik (gunuang pangilun) alah pulo bajaja sampai bagai ka lubuak tampuruang jo nan agak jauh lubuak mato kuciang jo batang tabik. Kasadoalahe bakarajoan surang samo kawan samo gadang. Adoh lo memang musibah salah surang kawan maningga tabanam di batang aie tawa kutiko kami manyubarang baranang uji nyali (Allah mangampuni kawan tu amin). Kutiko itu dek bagadang ati dapek tugas dari guru sakola, pailah kami mancari pimpiang (tumbuhan nan iduik di tapai batang aie) tuk mambue tas karajinan tangan. Tujuh tahun subanae umua nan alah cukuik ntuak mandiri...ambo buktian katu mbo ketek basalemo. Kini...baa kok talampau cameh bana, protektf bana... "Aji...silakan lanjutkan berenangmu...abak jo amak ka baliak ka kamar..."Saparo bangga mbo tingga anak mbo di kolam baranang jo panunjuang lainnyo. Kok jadi pulang kampuang rayo taun mbo aja anak mbo maranangi ombak nan pernah mbo jaja maso ketek. Taragak lo ambo maagiah curito maso ketek ka anak2 ambo, ndak tau lo inyo sia Ayah e ko....
Rahyussalim Powered by Telkomsel BlackBerry® -- . Posting yang berasal dari Palanta RantauNet ini, jika dipublikasikan di tempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini dan kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur dan Lokasi pada setiap posting - Hapus footer dan seluruh bagian tidak perlu dalam melakukan reply - Untuk topik/subjek baru buat e-mail baru, tidak me-reply e-mail lama dan mengganti subjeknya. =========================================================== Berhenti, bergabung kembali serta ingin mengubah konfigurasi/setting-an keanggotaan di: http://groups.google.com/group/RantauNet/subscribe.
