Jumat, 03 September 2010 http://www.hariansinggalang.co.id/sgl.php?module=detailberita&id=591
"Baa Tan, iyo lai indak jadi parang awak jo Malaysia?" Baru sajo tibo di pintu lapau, Udin Kuriak lah batanyo. "Parang-parang apo pulo ko ha. Urang mancari damai, awak nio parang. Udin sangko sanang baparang tu?" Baitu jawek Tan Baro. "Lai tadanga tanyo den tadi dek Tan Baro? Nan den tanyoan iyo lai indak jadi parang? Sabab den takuik. Raso dunia alun samparono den nikmati lai, sudah tu anak den ketek-ketek," baleh Udin. "Urang nan nio parang tu cuma sakadar mangipeh tu nyo. Lah tibo bana maso parang tu yakin den, pasti mancuru ciriknyo dalam sarawa," potong Kari Garejoh. "Batua mah Ri, urang-urang nan salamo ko nio nagari ko kacau atau nio baparang jo Malaysia adolah tipe urang-urang nan indak sanang mancaliak nagari ko damai. Atau bisa jadi itu adolah urang-urang nan ditunggangi dek kapentiangan lain. Katiko nagari ko lah kacau atau lah rarak dek parang, nan inyo manangguak di aia karuah," kecek Angah Piyan pulo. "Ado nan paralu awak kana-kana. Ambo raso awak di siko pernah sikola kasadonyo dan wakatu baraja di es-de dulunyo guru awak pernah maajakan arati kadamaian. Katonyo damai itu indah. Ciek lai nan paliang pentiang adolah pambukaan undang-undang dasar negara 1945 nan awak punyo itu mangatokan baraso kemerdekaan itu adolah hak sagalo bangso. Karano itu panjajahan di muko bumi ko musti diapuih. Nah, kalau awak lai paham jo pambukaan undang-undang dasar tu, den raso indak ka bakandak parang gai doh," kato Tan Baro. "Kalau nio tau sakiknyo parang rancak tanyo ka inyiak-inyiak awak nan lai masih iduik. Sejarah di nagari ko tigo satangah abad baparang jo Balando dan tigo satangah tahun lo baparang jo Japang. Alun lai parang awak samo awak. Parang nan salamo tu sabana mambuek urang awak sansaro. Nan padusi diperkosa, atau kamatian laki, sudah tu manjadi jando. Anak-anak manjadi yatim dan indak ado nan bisa lalok di rumah. Jadi, janlah bacito-cito pulo untuak parang lai. Kok batampuang cirik dalam sarawa beko," Mak Pono indak pulo amuah katinggalan mangaluakan pandapek. Mak Pono banyak tau sakiknyo parang, karano inyiaknyo adolah veteran. Wakatu ketek, Mak Pono acok dicaritoan padiahnyo iduik di nagari sadang parang. Dek itu pulo, Mak Pono sabana takuik jo kato-kato 'parang'. "Batua Mak. Dek karusuhan unjukrasa se, lah banyak nan gaca sampai-sampai lari ka lua nagari," kato Udin mamotong. "Kok parang awak jo Malaysia, tantu samo jo bacakak kakak-adiak. Kecek urang, di Negeri Sambilan namonyo, bahaso sahari-harinyo tu adolah bahaso Minang. Di situ rumah adaiknyo ampia samo jo rumah adaik awak siko," Uncu Labai indak pulo katinggalan mangecek. "Kabanyo urang-urang tu barasa dari Pagaruyuang juo Ncu," baleh Mak Pono. "Itulah makonyo den indak satuju jo kainginan si tukang kipeh nan manyuruah parang. Ongok awak kecek urang kalau baparang jo dunsanak surang. Awak baparang, urang lain batapuak paho," kato Uncu. "Jadi baa, ado nan satuju baparang?" Tibo-tibo Uwo Pulin batanyo lantang. "Indaaaaakkkkkkkk!" Sarantak lo urang-urang tu manjawek. (eSPe St.Soeleman) -- . Posting yang berasal dari Palanta RantauNet ini, jika dipublikasikan di tempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini dan kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur dan Lokasi pada setiap posting - Hapus footer dan seluruh bagian tidak perlu dalam melakukan reply - Untuk topik/subjek baru buat e-mail baru, tidak me-reply e-mail lama dan mengganti subjeknya. =========================================================== Berhenti, bergabung kembali serta ingin mengubah konfigurasi/setting-an keanggotaan di: http://groups.google.com/group/RantauNet/subscribe.
