Catatan Pulang 3 : Kucindan Angku Palo Program Silaturrahmi Sanak Palanta
Sadarun dari BIM, tabang mamancuang pulau paco, tapek di tangah pulau Sumatera, maminteh-minteh mego, menyisia-nyisia angin, alah basitumpu pulo tongkang di Hang Nadim. Disinan rimbo di rambah, disinan padang di taruko, dikarang ingin ka manjadi. Masih tangiang-ngiang di talingo, oto-ota tangguang di lapau tadi malam. Kutiko lampu sitorongkeng sadang mandasia, mambayang jatuah ka pele sarang balam, malampok pulo ka boto paniaram. Mak Sudi ta akuak-akuak tangguang disuduik, disampiangnyo duduak mak kari mudo sadang mamilin paesok daun nipah, ndak jauah di subarang meja dakek deretan pele kue sagun-sagun, si bujang karapai tabatuak-batuak dek asok timbakau. Tibo-tibo baranti bendi bugih hitam di mungko, dari sinan turun maenggak-enggak mak Kari Sutan. Sakatiko liau turun, lansuang ma hambuah ka pintu lapau, tibo disinan, lansuang malafazkan salam dengan ekspresi saketek ongeh dan iduang nan dek ratuang itu di kambang-kampihkan. Assalamualaikum ! hariak Kari Sutan…. A…aa…laikum….salam….ho…hohopp…manjawek si Buyuang Karapai sambia taciraguik dek kopi angek. Alaikum salam……serentak nan lain maningkahi. Oh…kari sutan ruponyo, dari ma tadi dan sia nan ma anta Kari ko……tanyo Mak Sudi sambia ma hambuihkan asok paesok nipahnyo… Eheem…ehem…..itulah mak, dek elok bana Angku Palo kini ko, nyo antakan ambo ka lapau ko, indak salah kito mamiliah baliau manjadi pucuak pamerentahan….yo sabana marakyaik……, ambo salah satu urang nan acok minum kopi jo baliau” jawek Kari Sutan dengan ekspresi nan agak angkuh. Ohhhhhhh Angku Palo….tangango pulo saisi lapau……kecuali si Buyuang Karapai. Nan si Buyuang Cuma nyelutuk “Oh…..baitu nan pemeimpin marakyaik tu yo mak…..semba buyuang sambia galak pencong. “Jadi apo pulo nan paralu dek waang buyuang……apo pulo caceknyo angku palo nan kini dek waang…, bia den danga pulo….taburansang Mak Kari Sutan. “Iyo…iyo…, indak ado pulo Angku Palo nan namuah ma anta urang ka rumah sakik jo bendi dinehnyo doh…..” imbuh nan lain “Ha….jawek lah dek waang Buyuang !, tambah mamburansang Buyuang karapai, tambah gali paruiknyo mancaliak Mak Kari Sutan Taburansang. Sambia galak ketek Buyuang Karapai manjawek “ Dek alah mati aka, indak ado ide lai apo program nan cespleng untuak marubah sakik iduik rakyaik, usaho nan paliang murah untuak tetap di dukuang rakyaik yaitu mambangun citra bahwa angku palo kito memang marakyaik....he..he..he…” Baa pulo tuh caronyo sanak ! manyemba pulo Ujang Kuro “Caronyo murah sajo, angku palo cukuik manyuruah dubalang ma intai-intai rakyaik, sia nan sadang baralek sanak rasu, atau acara basipak takrau, atau dima ado lapau urang paburu….sambuang Buyuang Karapai…. Kadi pangakan lapau acara ditampek-tampek tu sanak, ka ditangkok ?, tibo tibo ado nan manyolo dari suduik lapau Oi ya ya yaiiiii, yo ongok bana waang tumbuang………….bukan di tangkok……….tapi pai pulo sato maronggok kasinan……..! hariak Buyuang Karapai Manga pulo angku palo kasinan, yuang ?...Mak Kari Sutan jadi tertarik “Murah senyo mak….dek rakyaik badarai ongok-ongok pulo, alah mental kalah pulo…yo subana bangga baliau kalau di meja inyo, sato pulo angku palo duduak….ma ota-ota lamak, ota ilia mudiak, sasudah itu di tompangan pulo pulang ka karumah…he..he..” galak sengeang Buyuang Karapai. “Tapi buyuang, dari pado nan kayo-kayo nan lain, masih santiang Angku Palo, meskipun baliau ko pejabat, tapi nionyo badakek jo rakyaik…maota jo rakyaik…” Semba Kari Sutan “Ondeh mak Kari…….., nan paralu dek awak pamimpin nan elok ati sajo dan seolah-olah marakyaik, tapi indak ado terobosan apo apo untuak iduik awak ? atau pamimpin cerdas membangun program nan ka mambuek sakik iduik rakyaik baransua, walaupun rakyaik indak paralu bagai maronggok basamo di lapau jo baliau ?, ma nan katuju dek Mak Kari ?” “Oh….iyo juo ndak, jangan-jangan baliau seolah-olah yo dakek bana jo rakyaik dek mancaliak rakyaik sanang diambuang jo raso didakei bana dek Angku Palo, tapi angku palo sabananyo ndak punyo ide baru untuak mansejahterakan urang kampuang, jadi silaturrahmi sajo nan di pakuek deknyo sampai salasai manjabat”….baa kiro-kiro Mak Sudi ?. “U hukk…u..huk…, sambia tabatuak-batuak mak Sudi menyelutuk, “Sabananyo awak nan bodoh, baru sajo Angku Palo suko datang ka alek-alek ketek di kampuang, apokah alek pemuda atau alek apo, hati kito alah sanang, lupo sakali kito ka tugeh utamonyo untuak mambuek program cemerlang di situasi susah iko untuak maningkekkan kesejahteraan rakyaik….” “Iyo mak…dengan mental rakyaik mode itu, cukuik modal silaturrahmi sajo, bisa berkali-kali angku palo tapiliah….he..he…” celutuk urang suduik lapau… Datang pulo manyemba nan lain “ Tapi jan lupo, piliah wakia urang nan bapitih…untuak biaya kumpanye…suruah mangamek-ngamek sajo liau ko salamo menjabat…baa gak ati ?..... Bana-bana….., kalau ingin manjadi angku palo hari kini, indak paralu cerdas-cerdas bana, cukuik citra elok, gaoul jo rajin manompangan rakyaik naiak bendinyo, sakali-sakali suruah supir ma antakan urang sakik ka rumah sakik jo bendi dineh tu, bia harum namo sampai ka sabalik gunuang…ha..ha..ha… Hus……….!!!!!!!!!!!!!, Angku Palo datang……….hariak Mak Kari. Malam kemudian balalu dek galak-galak politis si Buyuang Karapai di lapau tangah nagari. Batam 15 September 2010 Andiko Sutan Mancayo -- . Posting yang berasal dari Palanta RantauNet ini, jika dipublikasikan di tempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini dan kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur dan Lokasi pada setiap posting - Hapus footer dan seluruh bagian tidak perlu dalam melakukan reply - Untuk topik/subjek baru buat e-mail baru, tidak me-reply e-mail lama dan mengganti subjeknya. =========================================================== Berhenti, bergabung kembali serta ingin mengubah konfigurasi/setting-an keanggotaan di: http://groups.google.com/group/RantauNet/subscribe.
