Assalamu'alaikum ww, Bapak/mande, dunsanak di Palanta ([email protected] , [email protected] )
Alhamdulillah sacaro indak sangajo awak sato ba Halal bi halal jo IKMR di Aula Koran Riau Mandiri Pekanbaru. Kahadiran awak disinan dek di bao pak Zainul jo pak Elthaf nan memang barencana ka pai ka sinan. Kami batigo pai ba halal bi halal sapulang dari rumah dunsanak kito Anwar nan baru sajo ba kamalangan dek amak baliau dipanggia Nan Kuaso. Sabagai bagian dari RN kami mambaranian diri manyampaian ka dunsanak kito Anwar jo kaluarga sebagai nan mawakili atau kadatangan kami ateh namo warga Rantau-Net. Jadi untuak nan ciek iko kami mintak karilah ka kito basamo karano indak talakik baiyo batido di palanta baso kami ka pai mawakiai kito basamo dek rencana iko tibo-tibo sajo diantaro kami batigo. Jadi untuak itu bari ma'oh lah kami dek lah lancang mawakiai RN tapi indak baiyo batido dulu sabalunnyo. Ado ciek tambahan untuak Mak Uwo Nismah, dari carito pak Anwar amak beliau kenal jo mak Uwo karano kawan sapamainan jo istri pak Umar Farouk. Babaliak ka pangka kaji atau judua carito, Awak lai sato mandanga pidato pak Gubernur nan lai takana diawak isi nyo nan wak curaian dibawah untuak bisa pulo manjadi paratian kito basamo, diantaronyo : 1. Ranah Minang mamaraluan urang rantau untuak basato mambangun nagari disagalo bidang supayo mak tumbuah galiek ekonomi urang kampuang 2. Kutiko tajadi gampo daulu urang rantau basugiro pulang untuak maringanan baban darito dunsanak di kampuang, untuak itu walau kini indak lai tajadi gampo ateh namo pamarentah Sumatra Barat maimbau baliak untuak kumbali manyaluran bantuan baiak itu moril juo materil, supayo bisa mangumbalian baliak garik pambangunan jo ekonomi rang kampuang, sungguahpun kini bantuan du lai juo taruih badatangan tapi kok dapek digarak an baliak nan labiah gadang saroman kutiko gampo tajadi kan labiah rancak pulo lai. 3. Dari pambangunan baliak daerah bakeh gampo baru sakiro 15% nan takarajoan sabalun ko baiak itu rumah tingga, rumah sikola, musajik jo surau sarato bangunan pamarentah lainnyo nan kalo diarok an dari APBD sajo indak pulo APBD itu talok mambiayai kasadoannyo. 4. Pambangunan di kampuang atau ekonomi urang kampuang salamoko bisa elok barakaik pakirin dari rantau barupo wesel jo pakirin lain dari dunsanak nan di rantau. 5. Sangaik diimbau urang rantau untuak manaman investasi di ranah supayo sektor ekonomi bisa pulo bakambang. 6. Maimbau urang rantau untuak mambantu pamarentah mauujuik an program Sikua Jawi untuak Surang Patani. Dalam program iko indak musti malalui pamarentah do tapi bisa sen masiang-masiang parantau mangirin sikua jawi untuak dunsanak di kampuang. Adopun program iko adolah program "Ba Pasaduoan" atau bagi hasil kecek rang kini. Dari pangalaman nan taralah hasia pasaduaoan iko akan mandapek labo labiah kurang 25% sakali sataun kalo jawi nan di gubaloan adolah jawi potong. Dalam program iko untuak mauujuik annyo dilingkuangan pamarentah Prov alah mamuloinyo sabagai conto. Sakironyo dalam praktek dilapangannyo ado pulo nan batanyo "kok ilang jawi kami beko baa", mako pak Gubernur mangecek an akan ado ........ (indak baitu jaleh tadanga) nan ka mambari jaminan sakironyo programnyo didaftaran ka pamarentah. A sabana mukasuik dari rencana iko adolah supayo kito bisa mambari pamasukan tambahan untuak dunsanak patani di kampuang karano rato-rato sahari untuak ka sawah kan labiah banyak satangah arinyo, jadi nan satangah ari lai bisa pulo digunoan untuak bataranak. 7. Dalam hal suberdaya; batua Sumbar indak mampunyoi sumber daya tambah nan balabiah saroman provinsi sakitar tapi kalo kito caliak potensi alam nan gadang tapi kito punyo nagari nan Subur nan masih banyak hutannyo. Sakiro conto kalo kita dakek-dakek ka pabatasan caliak senlah kalo lah mulai masuak rimbo itu tandao lah dakek ka sumbar tapi kalo gersang itu masih di Riau. Tapi sungguahpun baitu walau gersang isi paruik bumi di Riau ko kama pai minyak se sadonyo, baitu juo diatehnyo. Sungguahpun baitu, kito masih juo punyo karbon nan barasa dari hutan nan masih hijau nan bisa juo di jua kalua untuak panambah pendapatan Sumbar (supayo indak jadi tando tanyo rancak dunsanak nan bisa bakomunikasi jo pak Gub mananyoan karbon ko a mukasuiknyo ko). Itu saketek nan dapek awak tangkok isi dari pidato pak Gubernur nan bahubuangan jo rancangan baliau ka muko untuak paimbau urang rantau untuak satu baliak mambangun kampuang alaman baiak itu dari segi ekonomi maupun pambangunan nan juo sangaik diharok dalam bantuak pananaman investasi nan gadang supayo tabukak lapangan karajo untuak dunsanak di kampuang. Pangabisan, tulisan iko wak buek jo kirinan ateh namo pribadi sasuai jo nan didangan jo nan dikana. Jadi kok ado dunsanak nan lain nan sato mandanga tapi taraso balain jo nan awak ketik ko dibari pulo kasampatan untuak manukuak jo mangurangi isi ketikan awak iko supayo labiah paguno untuak kito basamo. Tarimo kasi jo mintak ma'oh jo rila kok ado sasek jo salah didalamnyo. Wassalamu'alaikum ww Batuduang Ameh (43) Nan datang Indak basangajo. -- . * Posting yg berasal dari Palanta RantauNet, dipublikasikan di tempat lain wajib mencantumkan sumber: ~dari Palanta r...@ntaunet http://groups.google.com/group/RantauNet/~ * Isi email, menjadi tanggung jawab pengirim email. =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi disetiap posting - Hapus footer & seluruh bagian tdk perlu dlm melakukan reply - Untuk topik/subjek baru buat email baru, tdk mereply email lama & mengganti subjeknya. =========================================================== Berhenti, bergabung kembali, mengubah konfigurasi/setting keanggotaan di: http://groups.google.com/group/RantauNet/subscribe.
