Cacatan Halal-Bihalal RN Duren Sawit Andiko Sutan Mancayo
Sanak Palanta Sanak palanta, agak malok-malok matoari, jo maleh-maleh tangguang di bukak kaba, apolah nan tajadi di dunia maya kininko. Tibo sakali pasan, etan jauah dari tapi lauik, dari tampaik banamo Ancol, mananyokan, lai ka datang ka aleknyo rantaunet. Tasirok darah, bakaja-kaja dari jantuang, mangguguah kasadaran, janji taguah nan alah dimintak, kok utang yo musti di bayia, ko paranduaan musti bapulang, utang silaturrahmi bana nan maimbo. Sakutiko diambek bendi nan lalu, di lacuik kudo basigageh, manuju daerah Duren Sawit. Sungguahpun co lawitan oto basusun, indak baguno lai si jalan tol, ba siinsuik lari bendi, tapi dek hati angek nak batamu dunsanak, batampuah juo. Singkek curito, baru sajo kaki tajajak di mungko gaduang putiah, jo galak urang manyambuik, tabukak pintu silaturrahmi, tabuhua hubungan sudaro. Baitu bana sanak, zaman alah baraliah, musim alah bakisa, jiko dulu jo batin Dang Tuanku mangontak Cindua Mato, nan kini masonyo HP jo internet nan bakuaso, disinan dunsanak di cari, disinan kasiah di teba. Nan gaduang ko sanak, yo tukang tuo bana nan mamancang, tokok partamo alah tahu janjangnyo randah, batimbo-timbo urang tibo, mulai dari kare’an, sanak sudaro, handai taulan, sampai ka dagang nan lalu. Dek pandai tukang mancari hari, kucindan murah nan punyo gaduang, yo dingin kasiat rumah ko. Sakutiko salam di baco, sarentak jawaban manyambuik di pintu. Ba susun sanak mananti, raso mananti dunsanak jauah nan lamo hilang. Alah basusun sagalo niniak mamak, lapeh ka mamak-mamak pensiunan angku palo, di suok alah galak nabi cadiak pandai, di ruang tangah mananti bundo kanduang. Nan saangkatan, alah langkok pulo. Oiiii sanak, antah jo apo kato ka ditulih, baitu bana raso di dado, biapun kini zaman urang man-DEN, mangapik daun kunik jo kapalo harimau, tapi diruang tangah ko, luluah sagalo pangkek, buluih sagalo kayo, apo lai sagalo santiang. Duduak badampiang satu raso, raso badunsanak urang Minang. Sungguahpun baitu sanak, nan pangajaran niniak tatap di pegang, mangecek malam badanga-danga, mangecek siang bacaliak-caliak, kok sawah alah bapamatang, kok lading alah bamintalak, ka nan tuo kato mandaki, ka nan samo gadang kato mandata, kato malereng kato ba ma’na. Baitu bana sanak, indahnyo kasopanan, dalam aura Minangkabau. Takana apo nan di katokan Ajo Buyuang, sungguahpun indak samo tinggi kayu dirimbo, namun itu nan mambuek harmoni, karano apo, kayu gadang manaungi, kayu randah indak mancuek, aka tagantuang indak manjarek, urek tajulua indak manaruang, basilang kayu dalam tungku, disinan api mangko iduik. Disinan arifnyo urang Minang, bagumam kato mangko malompek, di piciak tangan awak sabalun mamiciak urang, muluik manih kucindan murah. Sungguahpun niek mambuek kebaikan, tapi dek manyampaikan jo kato mandareh, apo lai kato nan indak pado tampeknyo, iyo raso ka mambaka kampuang sampai di talingo urang, disinan pulo fungsi rantaunet ko. Bersambung….. Andiko Sutan Mancayo Baru ka Mangambang lapiak di Pakanbaru -- . * Posting yg berasal dari Palanta RantauNet, dipublikasikan di tempat lain wajib mencantumkan sumber: ~dari Palanta r...@ntaunet http://groups.google.com/group/RantauNet/~ * Isi email, menjadi tanggung jawab pengirim email. =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi disetiap posting - Hapus footer & seluruh bagian tdk perlu dlm melakukan reply - Untuk topik/subjek baru buat email baru, tdk mereply email lama & mengganti subjeknya. =========================================================== Berhenti, bergabung kembali, mengubah konfigurasi/setting keanggotaan di: http://groups.google.com/group/RantauNet/subscribe.
