Da Andiko, Ni Medy, Mak Jepe, Roland dan adidunsanak lapau, Assalamu'alaikum Warahmatullahi Wabarakaatuh,
Rumah sakik Achmad Mukhtar ko adolah tampek nan indak asiang bagi ambo. Sekitaran tahun 1982-1983 ambo paja kaciak kalene ingusan alah ampia tiok hari mamasuki gerbangnyo eh bukan gerbangnyo. Papa dulu acok manyambuik ambo dibaliak paga Rumah Sakik jikok indak sempat manjapuik ambo di TK Tunas Mekar dibalakang rumah Sakik ko. TK Tunas Mekar ko masih ado bangunannyo sampai bbrp tahun sasudah tu tapi dialahi dek SAA Sekolah Farmasi tk SLTA. Guru ambo Ibuk May mauluan ambo dari paga disambuik Papa dari baliak paga sambia senyum batarimo kasih ka Ibuk tu. Sebab kalo mamuta kamuko ka gerbang jauah bana Papa bajalan ataupun Bu Guru maantakan. Semoga Allah maagiah keberkahan ka kehidupan Guru TK ambo tu. Ambo adolah murik nan lumayan dicenoi Guru ambo. Bukan karano ambo labiah pintar dari murid lain, tapi kebiasaan ambo nan salalu manyalasaian tugas dari Guru sampai salasai walaupun jam sekolah alah habis, sahinggo Buk Guru manungguan ambo nan mada indak amuah maagiahan tugas tu sabalun salasai. Kudian Guru tu jaran maagiah tugas nan kiro2 akan salasai lamo ka ambo dek kebiasaan buruak ambo tu nan manyababkan Bu Guru tu manungguan ambo sampai salasai baru pulang. Dek indak tapek jadwal itulah mangkonyo Papa yang sahari-hari karajo di Rumah Sakik Achmad Mukhtar tu baliak baliak ka kantua liau, dek Bu Guru bapasan akan malaluan ambo ka rumah sakik. Nah salamo ambo TK tu ambo salalunyo bamain di Rumah Sakik Achmad Mukhtar tu. Mulai dari kantin eh cafeteria sampai Koperasi pegawai adolah tampek favorite ambo. Di tampek tu banyak makanannyo hehe... Ambo samaso tu indak tamat TK doh, tapi raport TK ambo manatapkan ambo tamat. Kiro-kiro duo bulan ka salasai TK ambo dapek musibah. Ambo jatuah dari janjang tukang nan dipakai untuak mancapai teras ateh rumah nan di dak untuak manjamuan kain. Waktu tu ambo manjamuan dasi TK ambo di hari Minggu kalo indak salah hari tu. Jadi dek dasi ko kiluih katinggalan di embe di cucian abang ambo, sahinggo ambo maikuik abang nan manjamuan kain ka ateh dak rumah tu sambia ikuik di janjang tukang nan anak janjangnyo jarang2 tu. Sahinggo lah ampia tibo diateh luluih kaki ambo di ruang janjang tu sahinggo tahampeh ka lantai di bawah. Dek lantai dari simin, ambo ndak tau di urang dari mulai pagi tu sampai sanjo. Untuang ka mujua, ambo diharuskan istirahat total di tampek tidua 40 hari. Tapi dek kaki ko sabana indak bisa diam, selang duo hari ambo lah sibuk lo main baliak jo abang-abang balari-lari indak tatagahan dek Urang Gaek. Nan TKnyo tamaik sorang setelah itu. Di sabalah TK Tunas Mekar ado sakolah SAA, di muko SAA Rumah sakik Achmad Muchtar, disabalah suok RS ado sembad (kolam ranang) taoi ambo indak pernah kasinan do. Kami biason manyabuiknyo Kolam Renang Sembad padohal setelah agak gadang ambo tau kalo kato2 Sembad tu ruponyo dari Bahaso Balando. Mungkin Mak Ngah ado kenangan jo Sembad di sabalah Achmad Mukhtar ko>? Trus di muko RS ado Benteng Ford de Kock nan ado mariam2 nyo. Disabalah jalan nan bakelok curam tu da Andiko manginap kan? Hotel Denai Kalo masuak ka taman Benteng tu sampai bisa tembus ka Kabun Bungo waktu ambo ketek namonyo bukan kabun binatang tapi Kabun Bungo Kinantan kalo ambo indak salah. Sangaik-sangaik rami pabilo hari rayo partamo jo kaduo. Piitih nan didapek katiko manambang lakeh bana bapindah ka urang manggaleh kacang randang bakulik di sapanjang janjang nan mampatamuan kampuang Cino jo Kabun binatang ko sampai ka arah pintu masuak, dan di dalam kabunpun banyak nan manggaleh kacang kulik barandang ko. Kami mambalinyo selain dikulek juo untuak maagiah makan binatang-binatang di dalam tu tarutamo buruang jo karo. Sadonyo jenis monyet disitu kami sabui karo samaso ketek dulu. Bukan hanyo panjua kacang nan barasaki tapi juo nan manjua pistol2an sabana tren di maso ambo ketek dulu. Ado ucihnyo nan dari pita merah bagaluang baagiah sejenis belerang kalo dilatuihan pistol ko bunyinyo mamakak. Iko favorit ambo. Seru se mambaunan apo tu mesiukah atau belerangkah. Jan heran lo ambo suko mainan nan harusnyo dipegang anak laki2 ko, dek sadonyo kawan main ambo laki2, kami banyak dunsanak laki-laki hehe jadi kasibaran. Pasa ateh, pasa bawah, pasa teleang, pasa banto jo pasa aua tajungkang.... kapan2lah InsyaAllah ambo caritoan pasa nan alah pasa bagi ambo ko. Batua-batua tulisan Da Andiko ko maungkik kenangan lamo. Tarimo kasih.. Wassalam Rina, 33, batam -- . * Posting yg berasal dari Palanta RantauNet, dipublikasikan di tempat lain wajib mencantumkan sumber: ~dari Palanta r...@ntaunet http://groups.google.com/group/RantauNet/~ * Isi email, menjadi tanggung jawab pengirim email. =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi disetiap posting - Hapus footer & seluruh bagian tdk perlu dlm melakukan reply - Untuk topik/subjek baru buat email baru, tdk mereply email lama & mengganti subjeknya. =========================================================== Berhenti, bergabung kembali, mengubah konfigurasi/setting keanggotaan di: http://groups.google.com/group/RantauNet/subscribe.
