Sato ambo cuap-cuap jo urusan isok maisok ko yo Da Jepe. Ambo mungkin tamasuak urang nan agak 'sadis' ka si ahli hisap ko :)
Alhamdulillah, abak ambo baranti marokoknyo sajak bujangan, jadi sebelum menikah jo ibu. Kato abak dulu alasannyo hiduik agak susah. Takuik labiah tapentingkan pulo beko rokok daripado makan anak bini :) Tapi dek indak parokok tu pulo, abak selalu punyo alasan untuak ma akali kami kaum padusi di ateh rumah. Hampia tiok hari ado sajo nan beliau mintak, goreng ubi lah, goreng pisang, lapek, onde-onde, bubua kacang padi, apo se. Alasannyo, ka di kunyah-kunyah wakatu luang. Kalau urang sudah makan kan maisok yo nak? Abak bialah indak, tapi masakkan nan lain dih... hehehe. Itu lah kaji nan diulangnyo hampia tiok hari. Uniknyo, almarhum abak ambo ko dulu kurang suko pulo jo makanan nan babali, kurang antusias beliau kalau makanan tu babaok dari lua. Babeda jo nan dari dapua, bia kurang manih, kurang garam, disantuangnyo se tanpa banyak cingcong. Sahinggo mau ndak mau, apo nan beliau dimintak, atau apo nan beliau taragak, diusahokan juo 'made in' dapua sendiri, hehe. Dek abak ndak marokok, rumah ambo sajak dulu buliah selalu dikatokan daerah bebas asap rokok. Kakak sulung ambo juo bukan perokok, samo jo abak. Duo dunsanak laki-laki ambo nan lain memang merokok, tapi dulu indak pernah marokok di rumah. Kalau ka marokok (biasonyo sudah makan), dunsanak laki-laki tu nyo baeh manjauah-jauah dari rumah. Lalu mereka tunggu agak sesaat, sabalun pulang. Itu pun hidung ibu tatap sajo sensitif dan langsung mengecek dan menginterogasi bantuak kucing mencium sesuatu. "Haa... kalian tadi marokok yo!!!!". Walaupun indak berang, tapi mato ibu tatap sajo jadi sagadang bola pingpong, hehe. Akibatnyo ambo sendiri dengan dibesarkan jo lingkungan nan bebas asap rokok tu, jadi rentan dan sensitif juo ka nan ciek ko. Asal lah ado urang marokok dakek ambo, nan labiah dulu sasak angok jo batuak-batuak tu ambo, daripado urang nan marokok, hahaha. Tapi dek karano lingkungan, bagaimanapun tantu awak di tangah masyarakat baraja toleran, sahinggo lamo-lamo, badakekan jo urang nan sadang marokok, badan ko bisa manarimo juo, toleransi dakek urang marokok. Tapi kalau di kampus, ambo masih juo dicap urang 'sadis' dek apak-apak nan ahli hisab ko. Kalau lah ado nan iduik api rokok dakek ambo, rokok atau catuihnyo langsung ambo suruakkan, sahinggo kalau rokok abih dan mereka ka manambah, indak bisa lai. Kadang-kadang lah baibo-ibo mereka mamintak, ambo icak-icak indak tahu sajo. Sahinggo kanai cap 'urang sadis'. :) Tapi antah baa, indak ado pulo nan sampai hati ka berang jo ulah jahek ambo tu doh, hahaha. Cuma kurenah ambo dek lah di kenal luas, kalau apak-apak tu lah maambiak sabatang rokok dari bungkuihnyo, sambia galak-galak madok ka ambo, langsung nyo suruakkan bungkuih rokok sisanyo langsung ka dalam tas atau ka dalam saku, sahinggo ndak bisa ambo rampok lai :) Kadang-kadang kalau sadang bakumpua basamo, ambo lai diprotek juo dek apak-apak senior nan indak marokok. "Jan duduak di sinan Ta, di sabalah tu kurisi apak Anu tu, ndak kuat Ita beko jo asok rokok sadang basamo-samo beko. hehe. Mungkin dek marokok ko lah sabana candu, sabanyak nan 'peduli' jo lingkungan, sabanyak itu pulo nan cuek. Di ruang sidang fakultas, dek karano full AC, lah jaleh-jaleh tatulih gadang-gadang "TERIMA KASIH, ANDA TIDAK MEROKOK". Tapi kadang-kadang ado juo apak-apak nan sabana mada. Inyo marokok juo dalam rapek. ibuk-ibuk nan lain lah babisiak-bisiak, maklum beliau sangat senior. Di ambo, dasar cipeh, daripado babisiak-bisiak, rancak dikatokan sajo ka apak tu langsung. "Oi Apak kanduang, ndeeh, lah ado plang nan tatulih di dinding tu mah pak..." Eehh.. jaweknyo sambil cuek " Itu kan dikatokan batarimo kasih kalau ambo ndak marokok kan Ta? Jadi nan sakali ko bialah Rita ndak batarimo kasih ka ambo yo, ambo marokok gak sabatang lu.." Haha... lah tapaso galak pencong urang ka sado nan di dalam ruang sidang tu. Nan labiah parah lai jo salah surang senior di kampus. Asok dari muluiknyo lah bantuak lokomotif kureta api, bakasinambungan. Dek karano lah hubungan lah dakek bantuak ka kakak kandung, ambo pun barani ngomong langsung-langsung. Kato ambo, "Bang, cubo abang etong-etong bara abih pitih abang untuak urusan rokok ko. Kalau dikalkulasi, mungkin lah tabalikan pulo anak istri abang rumah agak ciek lai mah". Eh, Jawabnyo sambia santai... "Nyo model ko mah Ta, katokanlah abang baranti marokok, lalu pitihnyo abang balikan rumah. Kironyo rumah tu tabaka... haa... kan disinan juo tibonyo??" hahaha... Yo ndak dapek aka lai. Baranti marokok ko nampaknyo yobana tagantuang 'kemauan' dari dalam diri, motivasi intrinsik nan harus kuat untuak baranti bakabiah jo rokok, dan baranti ba profesi sebagai ahli hisap :) Itu lah da Jepe. Sekedar celoteh awal tahun tantang urusan urang marokok ... Salam, Murai Kukuban ------------- Pada 1 Januari 2011 15.43, <[email protected]> menulis: > Kanda Zultan > > Ahaii..menarik carito kanda sebagai profesional ahli hisap :-) > Nan samo bana jo ambo dan tabayang bana ambo mambuak abu rokok tu ha, iyo > bana bakalipekan sarawa jin lepis jadul tu, bakalatiakan juo abu ko ka > lipatan bagian bawah sarawa tu > > Tapi kok amatikan baro rokok jisamsu jo lidah tu yo ndak talok dek ambo do, > biasonyo untuak mahimaik rokok ko jampang baru saparo di baka, kalau > dipiriakan baro rokok ko samisal ka aspak atau dipatahkan baro diujuangnyo > banyak tabuang he he > > Jadi caro ambo, ado aia saketek, ambo celupkan ujuang rokok nan mambaro ko, > jampang lah berdesis alias lah mati baro ko, inyo kaku sajo lai diujuang > rokok, kok baulang maisoknyo baliak tingga dibaka sajo ujuang tu kan lah > kariang jadi tetap maksimal maisoknyo (ndak banyak tabuang he he he) > > Ondee nostalgia ahli hisap > Tapi samo wak mah kanda dek ulah batuak ko juo plus didorong dek niek nan > kuek kito bisa baranti marokok > > Okelah ditunggu carito dunsanak nan lain > > Baa pulo nan masih marokok yo, mungkin paralu juo didanga caritonyo apo nan > menyebabkan gak susah baranti, siapo tahu berbagi bantuak iko awak bisa > manjadi inspirasi buek dunsanak nan ado niek baranti manjadi ahli hisap > > Trims kanda > > Wass-Jepe > > > -- . * Posting yg berasal dari Palanta RantauNet, dipublikasikan di tempat lain wajib mencantumkan sumber: ~dari Palanta r...@ntaunet http://groups.google.com/group/RantauNet/~ * Isi email, menjadi tanggung jawab pengirim email. =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi disetiap posting - Hapus footer & seluruh bagian tdk perlu dlm melakukan reply - Untuk topik/subjek baru buat email baru, tdk mereply email lama & mengganti subjeknya. =========================================================== Berhenti, bergabung kembali, mengubah konfigurasi/setting keanggotaan di: http://groups.google.com/group/RantauNet/subscribe.
