Powered by Telkomsel BlackBerry® -----Original Message----- From: [email protected] Date: Wed, 2 Feb 2011 22:57:52 To: K Suheimi<[email protected]> Reply-To: [email protected] TAROPONG : Uda K. SUHEIMI (Angkatan 65)
Ambo nan baru baumua sataun jaguang di milis ko, masuak jadi anggota bulan Mei 2009, ditambah pulo baraja di SMA 1 cuma sataun (1972), indak banyak nan ambo kenal dalam tahap-tahap awal jadi anggota, sakali-sakali ambo mambaco postingan Profesor Dr. K. Suheimi SpOG. K.Kbid. MBA, tantang agamo Islam, katubah pendek, praktis dan, sederhana, sakali-sakali di salo jo kisah kahidupan jo kesehatan Nabi Besar Muhammad SAW dikaikkan jo kahidupan sahari-hari didunia awak kini ko. Lamo-lamo ambo kalamakan, bantuak mambaco cerpen awak raso no, indak paralu kaniang bakaruik bagai, indak banyak Ayaik Al Quran jo Hadits nan basuo, tapi tulisan baliau taraso masuak jauah kadalam hati. Sakali-kali ambo komentari juo tulisan baliau jo hati-hati dek takuik salah, apolai anggota milis ko cukuik banyak nan mambaco. Kadang-kadang baliau bacarito sederhana tantang perjalanan raun-raun bakuliliang jo kaluarga, menikmati dan mensyukuri indahnyo nagari ciptaan NAN KUASO, sambia mancari makan lamak malapehkan salero buruak baliau tun, biko sasudah makan lamak baliau caritoan di milis, bagi urang nan dirantau iyoo dapek mangulek-ngulek sajo sambia jakun turun-naiak mambayang-bayangkan makanan lamak tun. Nan tipak diambo, sabana jaleh mukasuik tulisan Uda Suheimi tun .. Acok-acok lah pulang kampuang, mambina tali silaturrahim, basobok jo sanak-kaluarga, basobok jo kawan-kawan samo gadang saisuak, malala katampek-tampek nan basajarah saisuak, mancaliak indah no nagari Minangkabau sambia mancari makan lamak .. Raso-raso no dunia ko sabana lapang dek baliau, kawan banyak tasebar disaluruah palosok nagari, urang sanagari Sumbar kenal jo baliau lewaik tulisan nan acok muncul di koran lokal. Soal tulih-manulih ko baliau tamasuak urang sabana Tere goh, walaupun sibuk sapanjang acara Reuni SMA1, tapi nan tulisan baliau taruih mancogok juo di milis SMA1BKT, antah darima baliau dapek ide jo inspirasi, antah bilo, antah dima baliau manuncik-nuncikan ujuang jari ka Blackberry tun .. iyo sabana kerek awak nan labiah mudo ko dibuek no .. Energi baliau sabana panuah, sumangaik sabana tabudua, Sinayan-Rabaa ado di Pakanbaru, Kamih-Minggu ado di Sumatera Barat (Bukiktinggi jo Padang), tabayang-bayang di ambo sapanjang jalan nan jauah dari Pakanbaru ka Sumbar tun, baliau manuncik-nuncikan ujuang jari di Blackberry. Katiko bulan Juni 2009 milis sadang bagolak, dek karano diserbu banyak postingan bagarah nan masuak, sahinggo tapaso dibuek milis baru ciek lai (palanta-bagarah) dek Mak Darul Makmur, nan Uda Suheimi indak pernah maraso taganggu, tatap baati lapang jo maraso nyaman, baliau tatap konsisten manulih, bantuak da’i bakatubah didalam lapau ditangah pasa nan hiruak-pikuak. Namo Uda K. Suheimi jo urang rumah baliau Uni Cu (Dr. Zurtias MARS-Angkatan 65) alah lamo ambo mandanga, mungkin sajak 25 tahun nan lapeh, dek karano kakak ambo nan paliang gadang (Dr. Pelsi Sulaini Sp.OG) saprofesi jo baliau, nan “Ahli Pakakeh Padusi”, tapi ambo jo baliau alun pernah basuo, nan tabayang-bayang diambo adolah wajah surang Profesor nan lah tuo, basorban putiah, ba syal jo kafiyeh luriak bantuak Alm. Yasser Arafat-Pamimpin Palestina, babaju gamis, mamacik tasbiah ditangan, bajangguik panjang nan lah mamutiah didampingi taruih dek Uni Cu nan bajilbab jo pakaian muslimah sederhana dan tradisionil. Hari Kamih, 23 Juli 2009 sakitar jam 10.00 WIB, ambo caliak dakek meja panitia urang bakalompok sambia mangakak galak gadang, rupo no Uda Suheimi jo Uni Cu sadang bakucindan jo anggota nan lain, ambo takajuik lansuang mamperkenalkan diri, baliau manyambuik angek uluran tangan ambo sambia manapuak-napuak bahu ambo, iyooo .. sabana akrab awak raso no, bantuak alah lamo indak basobok jo dunsanak. Untuang ambo lai agak gagah saketek, mirip-mirip Palatiah Sepak Bola Club Chelsea-Carlo Ancelloti (hikhikhik), indak minder bana doh basobok jo Uda Suheimi jo Uni Cu. Sambia maota-ota ambo patuik-patuik panampilan baliau, ilang lanyok lah saluruah bayangan ambo tantang Uda Suheimi nan tradisional jo sawu tun, kini ko baliau basarawa panjang pakai kaus, indak bajangguik, indak bagamis, indak batasbiah, black-berry salalu siap ditangan, tampilan ustad modern zaman kini, galak bacikakah taruih tiok mangecek, senyum taruih tiok manyapo urang nan lewaik, wajah sabana segar walaupun umua baliau ka masuak 63, muko bakilek taruih, tiok hari salamo Reuni baganti colok model baju, mulai dari Baju Batiak, Kaos Olah Raga, Kaos Seragam Angkatan, Kaos Pambarian Angkatan Lain, pokok no apo nan ado, dengan panuah ka-pede-an dipakai dek baliau tun .. lapir taruih, indak ado baso-baso no. Mancaliak lo awak ka Uni Cu, eiiiiii .. masih nampak jaleh kamek baliau, tinggi samampai, badandan jo barias fully fashioned, pakaian sabana muslimah modis, indak kalah jo gaya peragawati muslimah, taruih galak manih jo mangamek .. katiko mudo daulu alah pasti dapek ponten salapan mandakeki sambilan dibandiang jo Uda Suheimi nan cukuik lapeh makan ampera dapek ponten anam labiah saketek Sabana lupo ambo batanyo ka Uni Cu, capak-capak baruak apo nan dibaco Uda Suheimi katiko maso pendekatan saisuak .. kok bisa sukses gitu lho .. ?? Baliau baduo ko samo-samo Angkatan 65, taruih lo baduo-duo masuak ka F-Dok Unand, antah sajak bilo api asmara tun bakambang, nan tabayang di ambo, pajuangan Uda Suheimi ko sabana barek nampak no, sabana batungkuih-lumuih, raso ka banyak lawan katiko tun untuak mandapekkan bungo nan kambang satangkai. Raso-raso no carito lamo ko paralu dijalehkan dek Uda Suheimi dimilis ko, bia nak tau pulo urang banyak tantang kisah perjalanan iduik baliau tamasuak bajuang kareh mandapekan urang rumah, nan kini alah manghasilkan generasi penerus The Suheimi’s Family nan sabana boneh-boneh, ado nan manaruihkan jajak Uda Suheimi sabagai “Ahli Pakakeh Padusi” Dokter Sp.OG, ado nan kini alah bapangkek Kapten TNI. Untuak ka manjadi referensi dek anggota nan labiah mudo, baa caro no mambina kaluarga Sakinah, Mawaddah dan Warrahmah .. mesra taruih dari mudo sampai tuo .. Kamih siang, 23 Juli 2009, katiko peserta salasai disambuik jo Tari Pasambahan di pintu gerbang SMA1, barisan Pandeka Regok ba Kaus Itam (Angkatan 75) bakalompok di halaman balakang, bantuak pasukan Tuanku Imam Bonjol saisuak nan ka pai baparang, ado 40 labiah banyak no, katiko tu Uda Suheimi lewaik dimuko mereka, lansuang baliau kanai tangkok, disuruah mamakai kaus itam katiko tu juo, jo galak sengeng baliau manuruik mamakai kaus dilua baju batiak didalam .. mungkin dalam hati baliau mangecek .. Emangnye gue takut pakai kaos loe .. Saketek tantang Angkatan 75 : Kaos Itam nan sabana rancak manuruik Angkatan 75 tun, hasil disain kanti Najib (75), nan manuruik ambo iyo rancak juo dek karano ambo dapek perai sabagai Anggota Kehormatan Angkatan 75, kok ambo dapek mambali pulo .. alah pasti komentar ambo indak rancak .. hikhikhik. Sabana biati jo barasaki gadang awak babako ka Angkatan 75 ko, patuik lah Tan Kayo (74) jo Mak HB (74) kuaik bana manempe kasinan sajak daulu, cubo kito caliak, ambo alah tabao rendong ka salero nan lamak, kaditulak dek awak doa panulak rasaki indak ado pulo : (1) Hari Kamih makan siang sero di rumah Piet Suwin (75), jo Nasi Kapau langkok, (2) Hari Jum’aik makan siang nan aduhai jo banyanyi-nyanyi di Hotel SMEA (disabalah SMA1) ateh usao Tan Gindo (75), (3) Hari Sabtu makan siang lamak pulo di Hotel Benteng punyo si Ci (75), (4) Hari Minggu acara makan siang undangan dari Ipin (75) tapaso gagal, dek anggota banyak nan bakaliaran mancari oleh-oleh pambuka pintu dirumah. Sapanjang acara bakalompok taruih, tubo-manubo, udi-maudian, indak baranti-ranti, walaupun alah co itu bana serpis nan ambo tarimo dari urang rumah bako Angkatan 75 ko, raso no masih ado juo nan kurang lih, indak basaratoan bagai sakalian jo Ongkos Taxi ka Padang + Tiket Pesawat pulang ka Jakarta + Ongkos Taxi ka Bogor + Biaya makan jo minun salamo di jalan .. hikhikhik, bantuak Bulando mintak tanah .. Disampiang tun, acok bana Mak Hendra Bahar (74) malakok-lakok ka Uda Suheimi, bajalan bakuliliang dari kalompok ka kalompok, man cas baterai namo no duh supayo nak maalia tuah Uda Suheimi, supayo sagan urang jo awak, dek karano Mak HB ko acok marasai goh kanai dangkuang jo kanai tubo di Lapau Mak Kari. Dimuko Uda Suheimi, ambo kecekkan ka Mak HB .. Hen, kalau ka marasai iyo indak talok dek tuah Uda Suheimi bagai duh .. paruntuangan badan tu bana nan indak elok .. Nampak no ado pangajian nan samo/stereotip di nagari Magek ko, bia pasangan tuo bia pasangan nan labiah mudo, bantuak Uda Suheimi (65) jo Uni Cu (65), bantuak Mak HB (74) jo Rinna Novita (75), bakapik-kapikan taruih kama pai, oooii .. biai oooiiii .. banampakan bana kemesraan tun dimuko urang rami, easy going, honey-moon sapanjang musim, sapanjang jalan, katiko ambo sampaikan ka Rinna Novita, lansuang ambo kanai cibia .. Ebek awak jo kami .. kanti arek ambo ko sapanjang Reuni tiok hari taruih jago talambek, bantuak urang nan baiyo bana tiok malam di Bukiktinggi nan dingin tun. Jum’aik malam, 24 Juli 2009, katiko acara panampilan Alumni, mancogok lah rombongan Alumni Riau diateh pentas babaju manari untuak manari bawarna ijau langkok jo deto merah di kapalo, dari jauah dicaliak iyo sabana rancak urang manari malenggang-lenggok sambia banyanyi, katiko tari lah bubar, banyak panari nan bagabuang baliak jo panonton, nampaklah kanti ambo anggota kKalompok Tere Dr. Fidruzal Sp.OG (Piet Pado) nan tatap masih kalek sajak saisuak bialah abih bana sabun sabatang tiok mandi, lalu nampak pulo .. Uda Suheimi .. alah maaak, iyo sabana indak mamantang baliau ko, ikuik manari bagai, bia bana pinggang tun alah luruih bantuak boto, alah sarik pulo untuak ditakuak-takuak, nan sumangaik urang Riau ko iyo sabana tabudua. Sakaliko, Nyiak Lako (Indra Catri-79-Ketua Panitia Sumbar) nan labiah mudo sabagai pambina panampilan Alumni Sumbar, nan cuma manampilkan nyanyi basamo (vocal group) iyo harus mangaku kalah jo acara nan disiapkan dek pambina Riau, Uda Suheimi, nan labiah tuo .. Ambo kecekkan bataruih tarang ka Nyiak Lako : Nyiak, kalau manyanyi ka manyanyi juo nan ditampilkan, cukuik 5 minik untuak malatiah no duh, indak paralu bagai maheboh-heboh dimilis doh, nampak no Alumni Sumbar ko kabanyakan konsumsi katiko latihan goh, paruik kanyang, paluah tibo, ide jo kreasi tatutuik, alah maleh untuak latihan .. Nyiak Lako indak bisa manjawek bantuak urang sakik garaman. Sarupo pamikiran urang awak, katiko umua alah 55 tahun, alah tibo maso pensiun, namo no alah pulang pokok duh, kok lai juo panjang umua, balabiah dari 55 tahun tun alah ka labo sen tingga lih, apolai katiko badan masih sehat, pikiran masih tarang, baati lapang, rasaki masih bajalan elok, makan lamak masih bisa, katiko masih suko bagarah jo bakucindan, mansyukuri iduik ka NAN KUASO. Kok lah sampai disiko lo nan dikaji .. iyo nampak jo taraso ebek awak ka Uda Suheimi jo Uni Cu .. nan nampak no sabana disayang dek Allah SWT, tapi sabana patuik pulo ambo bersyukur, Alhamdulillah, lai juo ambo kacipratan rasaki dalam bantuak pencerahan malalui tulisan-tulisan baliau, ditambah pangalaman nyato salamo Reuni kapatangko, ambo mandapek rasaki nan sabana gadang mancaliak contoh kahidupan anak manusia hamba Allah SWT nan paralu untuak diteladani .. Uda Suheimi jo Uni Cu .. Bukan ambo maambuang bukan ambo maangkek, dari lubuak hati nan dalam kato-kato tun kalua, sabana basyukur awak dimilis ko bakawan jo Uda Suheimi dan Uni Cu, semoga Allah SWT yang Maha Rahman dan Maha Rahim salalu mambarikan yang terbaik buek baliau, manjago kasehatan baliau supayo dapek taruih mambimbiang, maagiah pencerahan jo jadi suri tauladan ka kawan-kawan nan labiah mudo. Ambo cubo mambuek kasimpulan singkek, walaupun ambo sabana sabanta basobok dan bagaua jo Uda Suheimi dan Uni Cu : (1) Tetaplah mesra jo urang rumah, sarupo jo ajaran urang Magek, bantuak iklan coca-cola Everytime, Everywhere and at Any-age. (2) Salalu baati lapang, acok galak mangekeh, sakali-sakali jadi urang tere bagai, acok tasanyum manih, panyapo, randah ati, indak ja-im jo indak pamiliah kawan. (3) Kok ado nan rancak lewaik dimuko awak, sapo sen jo galak manih tapi jan didakek-i Akhirul kalam, mohon maaf sagadang-gadang no ka Uda Suheimi jo Uni Cu, kok ado kato-kato nan talabiah jo takurang dalam tulisan ko, ambo indak ado mukasuik apo-apo doh, hanyo sakadar mambarikan ucapan tarimo kasih nan ikhlas malalui tulisan ambo ko, kok salamo ko Uda Suheimi sangat banyak manulih dan manaropong nan elok-elok tantang kawan-kawan, sarupo tantang Uda Maizar Rahman, dll. Alah patuik bulo baliau kanai taropong jo kanai kodak dek urang lain, nan kabatulan ambo sandiri, nan nota-bene masuak Kalompok Tere di milis palanta-bagarah, kok sanyampang ambo singgah di Pakanbaru, sabana batarimo kasih ambo kok diajak makan lamak agak sakali ditambah jo pitih sakuih saketek pambali aia dijalan pulang .. hikhikhik. Mudah-mudahan, pergaulan jo persahabatan kito basamo, Keluarga Besar SMA1 Bukiktinggi, baiak di dunia maya (milis) maupun di dunia nyato, akan taruih batambah dakek batambah arek jo taruih batambah baiak. Di acara Reuni kapatangko, selo alah diurak, langkah lah diayun manuju katampek nan labiah elok, ka tujuan nan labiah gadang, demi kemaslahatan Umat, manghasilkan sagalo nan rancak, sagalo nan baiak sasuai jo parintah NAN KUASO. Bogor, 28 Juli 2009 Irzal Sulaini (Jaka) - 74 Pengagum Berat Pasangan Mesra (Jaan sampai tabaco lo tulisan ko dek kanti ambo Hendra Bahar-74 jo Rinna Novita-75, kambang gadang lo iduang no ku duh, bisa lo masuak batu senter epredi bagai kadalam) Powered by Telkomsel BlackBerry® -- . * Posting yg berasal dari Palanta RantauNet, dipublikasikan di tempat lain wajib mencantumkan sumber: ~dari Palanta R@ntauNet http://groups.google.com/group/RantauNet/~ * Isi email, menjadi tanggung jawab pengirim email. =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi disetiap posting - Hapus footer & seluruh bagian tdk perlu dlm melakukan reply - Untuk topik/subjek baru buat email baru, tdk mereply email lama & mengganti subjeknya. =========================================================== Berhenti, bergabung kembali, mengubah konfigurasi/setting keanggotaan di: http://groups.google.com/group/RantauNet/
