NAN INDAK PANDAI MANCIMEEH TU, KUDO Oleh: Wisran Hadi. Rumpuik kudo lah tagantuang sagarondoang di balakang bak bendi. Sagu sauleh lah tagolek di bak muko. Nan kusie, banamo Muncak tu duduak takantuak-kantuak sambia mamacik les bendinyo. Saroman lah kahabisan darah se Muncak pulang manambang hari ko. Mas Sam penumpang fanatik nan sato pulang kandang indak namuah manggaduah Muncak. Mas Sam duduak taangguak-angguak dioyak bendi dek jalan banyak lubangnyo, alun juo baaspal sampai kini lai, padohal jalan tu kabanya untuk jalur evakuasi tsunami. “Flu burung, flu babi, kaki gajah, busung lapar, gizi buruk, demam berdarah, itu yang kini mencemaskan kita,” Mas Sam manggarutok sasudah mancaliak sapinteh judul berita surek kaba nan dijua anak-anak di simpang lampu merah. “Nan kusie bendi hanya mau mengurus bendinya saja, tidak mau menambal jalan raya tempat mereka selalu lewat,” sindia Mas Sam. “Pilpres lah katibo lo sakali lai. Presiden lah mulai jago dari laloknyo nan lamak tu. Kecek an ka presiden nan baru jago tu. Janji sari baa? Baa mangko alun juo sejahtera kusie bendi ko sampai kini lai? Kan inyo nan bajanji dulu ka mansejahteraan rakyat ko ndak,” jawek Muncak. “Mungkin belum sekarang waktunya, karena banyak masalah lain yang harus diselesaikannya. Kasus Gayus, bank Century, Miranda, KPK macam-macamlah. Satupun tidak ada kaitannya secara langsung dengan kehidupan kita,” upek Mas Sam. “Jadi, bilo tu nak nyo urus nagari ko? Manantian bininyo jadi presiden lo lu?” “Bukan. Semua akan diurus. Percayalah Muncak.” “Akan. Akan. Akan ka akan juo baru lai. Lupoan selah janji-janji kampanye tu.” “Kok dilupakan? Mesti kita tuntut janji-janji itu.” “Baa manuntuiknyo Mas Sam? Surek utang bisa dituntuik, tapi manuntuik janji kampanye samo jo mintak sisiak ka limbek. Lupoan selah.” “Jadi Muncak tak percaya janji-janji kampanye itu akan dipenuhi?” “Janji biaso mukie titian biaso lapuak, baitu kecek urang-urang tuo. Kok lai ado pitih Mas Sam limo puluah ribu kini, rancak disumbangkan ka dunsanak awak nan kurang pitih mambangun rumah kanai gampo. Jaleh. Awak indak paralu bajanji, tapi langsung memberikan bantuan. Baa gak ati?” “Orang tidak mau naik bendi sekarang tahu Muncak sebabnya?” kata Mas Sam membalas sindiran Muncak. “Apo sababnyo tu?” “Sadonyo kusie bendi tu tukang cimeeh. Indak ado se nan elok urang dek inyo doh. Nyo sangko angok urang banyak ko lah samo baunnyo jo kantuik kudonyo,” jawek Mas Sam jo bahaso Minang teloh-teloh sambia galak tabarai-barai. “Nan indak pandai mancimeeh tu lai tahu Mas Sam?” tanyo Muncak. “Siapa ya, yang tidak pandai jadi pencimeeh tu ya?” tanyo Mas Sam. “Kudo!” jawek Muncak galak takangkang.**
Sent from my BlackBerry® powered by Sinyal Kuat INDOSAT -- . * Posting yg berasal dari Palanta RantauNet, dipublikasikan di tempat lain wajib mencantumkan sumber: ~dari Palanta R@ntauNet http://groups.google.com/group/RantauNet/~ * Isi email, menjadi tanggung jawab pengirim email. =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi disetiap posting - Hapus footer & seluruh bagian tdk perlu dlm melakukan reply - Untuk topik/subjek baru buat email baru, tdk mereply email lama & mengganti subjeknya. =========================================================== Berhenti, bergabung kembali, mengubah konfigurasi/setting keanggotaan di: http://groups.google.com/group/RantauNet/
