Jilatang, Lembaran Stres Padang Ekspres Minggu 10-04-11 NAMO BERHALA TU, SURAU Oleh: Wisran Hadi “Baitu komah Jila. Lah bajalan den kaliliangi nagari. Mancaliak babagai macam kaadaan surau-surau sa Alam Minangkabau ko. Kasimpulan den, indak ado urang nan sumbayang Jumat di surau doh. Sajak dulu sampai kini,” kecek Atang sasudah sabulan basafari ka saluruah nagari. “Sababnyo indak ado urang sumbayang jumat di surau dek karano kurang syarat. Syarat urang buliah maadoan sumbayang jumat musti punyo jamaah labiah ampek puluah urang. Ma ado surau nan punyo jamaah sabanyak tu?” baleh Jila. “O, itu sababnyo urang sumbayang jumat di musajik?” “Iyo ustad. Iyo. Iyo. Lah santiang ustad Atang kini mah!” “Kok iyo indak ado urang sumbayang jumat di surau, baa mangko tibo se pangana nak babaliak ka surau? Lah jaleh urang indak ado sumbayang jumat di surau, baa mangko musti babaliak ka surau? Baa kok indak pulang ka musajik?” tanyo Atang. “Aneh juo pertanyaan waang tu mah. Apo mukasuik waang tu?” “Aratino bana, babaliak ka surau samo jo awak indak paralu bana ka musajik. Indak paralu bana sumbayang jumat lai. Lamo-lamo, indak paralu bana awak sumbayang lai.” “E, hantu! Pikiran waang tu lah kasansaman tumah! Soal sumbayang, itu curito lain. Soal surau, itu bukan soal sumbayang. Waang harus dapek mambedakan nan ma nan persoalan ibadat, nan ma nan persoalan surau.” “Jadi? Babaliak ka surau mukasuik sabananyo apo? Kalau surau bukan lai tampek sumbayang, untuak jadi apo? Ka jadi asrama urang gaek-gaek nan kamati bisuak?” “E, Tang. Den kecek an sakali lai. Soal surau, itu konsekwensi politis dari program babaliak ka nagari. Kalau waden indak salah danga, babaliak ka nagari berarti babaliak ka surau. Kan baitu kecek datuak-datuak. Jadi, jadi, jadi,” “Jadi apo? Jadi rumah tampek sarang buruang layang-layang. Bantuak nan di Lintau ten!” “Tang. Cubolah waang bapikie elok-elok. Surau tu paralu dilestarikan. Sabab, itu paninggalan niniak muyang kito. Samo jo rumah gadang. Soal surau tu lai dapek bafungsi baliak atau indak, indak paralu awak permasalahkan. Nan jaleh awak babaliak ka surau! Awak paliharo surau tu.” “Paliharo surau elok-elok, soal baguno atau indak, indak jadi soal. Surau tu kajadi tando bahaso saisuak awak lai baraja ugamo. Baitu kan? Itu aratino bana, surau tu lah awak jadian berhala. Awak puja-puji, tapi indak bamanfaat untuak awak lai doh. Aratino bana, urang Minang kini lah sapakat untuk mambuek berhala baru? Namo berhala tu, surau!” “To samakin santiang se caro waang bapikie kini mah Tang! Samakin bahamo muncuang waang kini komah! Di surau ma waang tasapo? Waang kan lai indak sakik lidah do kan?” tanyo Jila sambia mamiciak pipi si Atang nan alah mulai kandua. *** Sent from my BlackBerry® powered by Sinyal Kuat INDOSAT
-- . * Posting yg berasal dari Palanta RantauNet, dipublikasikan di tempat lain wajib mencantumkan sumber: ~dari Palanta R@ntauNet http://groups.google.com/group/RantauNet/~ * Isi email, menjadi tanggung jawab pengirim email. =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://forum.rantaunet.org/showthread.php?tid=1 - Tulis Nama, Umur & Lokasi disetiap posting - Hapus footer & seluruh bagian tdk perlu dlm melakukan reply - Untuk topik/subjek baru buat email baru, tdk mereply email lama & mengganti subjeknya. =========================================================== Berhenti, bergabung kembali, mengubah konfigurasi/setting keanggotaan di: http://groups.google.com/group/RantauNet/
