Lua Biaso! “Hebat! Lua biaso! Sabana salut den!” “Sia nan hebat?” “Jaksa di kampuang Uwo!” “Baa kok hebat? “Bisa dek nyo manahan wakia bupati. Urang nomor duo di pamarentahan situ. Salamo ko indak ado nan barani manahan kapalo daerah atau wakia nan sadang mamacik doh. Malah, bakeh bupati atau bakeh walikota indak juo talok manahannyo doh.” Itulah dialog antaro Angah Piyan jo Udin Kuriak pagi kapatang di lapau Uwo Pulin. Dialog bantuak itu bamulo dari barita nan bajudul ‘Wabup Agam Ditahan, Lalu Sakit’. Dalam barita tu dikatoan Wabup tu ditahan karano lah dijadian tasangko dalam kasus dugaan korupsi di Dinas pe-u tigo taun nan lapeh. Maklum, sabalun manjadi Wabup, apak tu dulu pernah manjadi kapalo dinas pe-u di kampuang Uwo Pulin. “Kalau wak den nan manjadi gubenur atau presiden, den agiah pangargaan ka jaksa situ mah,” kato Angah. “Eyayay......saandainyo wak den nan jadi komandan pak jaksa tu, lah den naiak-an pangkaiknyo mah,” baleh Udin. “Beda wak stek mah!” Potong Kari Garejoh. “Beda baa?” Tanyo Angah. “Lantaran iko kajadian lua biaso, saandainyo wak den nan manjadi atasan pak jaksa tu, lah salasai disidangkan kasus pak Wabup tu, den pindahan pulo jaksa tu ka daerah-daerah nan kasusnyo tabanam se. Umpamonyo ka kampuang rang rumah Tan Baro atau ka kampuang Mak Pono. Bia nak nyo garinda pulo kasus-kasus nan tabanam tu,” kecek Kari manjalehan. “Baa kok bantuak itu?” Tanyo Mak Pono nan namonyo disabuik-sabuik. “Karano sampai kini bakeh angku palo di kampuang Mamak atau di kampuang rang rumah Tan Baro masih galak-galak manih juo. Nan paliang paralu bakeh angku palo di kampuang rang rumah Tan Baro,” jawek Kari baliak.“Mukasuik Kari?” Tanyo Angah pulo. “Urang-urang nan talantuang jo kasus di situ kan lah ditahan. Malah bakeh pak sekdanyo juo lah dipareso. Analisanyo, anak buah kan karajo saparentah komandan. Komandannyo kan angku palo, makonyo angku palo musti batangguangjawek,” kecek Kari manjalehan. Angah indak bisa mangecek lai. Apo nan dikatoan konco palangkinnyo tu bisa ditarimo aka. Cuma masalahnyo, dalam masalah hukum tantu indak cuma sakadar main analisa, tapi harus ado bukti-buktinyo. “Mudah-mudahan apo nan tajadi di Agam tu bisa manjadi contoh dek jaksa lainnyo. Kalau kapalo daerah atau wakinyo nan sadang bakuaso bisa ditahan, baa kok bakehnyo indak bisa? Apo bana hebatnyo nan lah bakeh-bakeh tu? Samo wak nanti se lah makan tangan jaksa-jaksa lain tu,” Tan Baro nan dari tadi anok se, walau disabuik-sabuik namonyo, akianyo basuaro juo. “Tamasuak nan kini manjadi tahanan kota yo Tan!” Potong Udin. “Sia nan manjadi tahanan kota?” Tanyo Uncu Labai. “Ha....ha....maso Uncu ndak tau. Lah eboh koran sapakan ko mangatoan ado surang pajabaik nan dapek status tahanan kota karano kasus dugaan korupsi. Mudah-mudahan kasusnyo tu capek ado itam putiahnyo. Kok batali bisa diirik, batampuak bisa dijinjiang,” kato Udin sambia galak manih. (eSPe St.Soeleman)
Sent from my BlackBerry® powered by Sinyal Kuat INDOSAT -- . * Posting yg berasal dari Palanta RantauNet, dipublikasikan di tempat lain wajib mencantumkan sumber: ~dari Palanta R@ntauNet http://groups.google.com/group/RantauNet/~ * Isi email, menjadi tanggung jawab pengirim email. =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://forum.rantaunet.org/showthread.php?tid=1 - Tulis Nama, Umur & Lokasi disetiap posting - Hapus footer & seluruh bagian tdk perlu dlm melakukan reply - Untuk topik/subjek baru buat email baru, tdk mereply email lama & mengganti subjeknya. =========================================================== Berhenti, bergabung kembali, mengubah konfigurasi/setting keanggotaan di: http://groups.google.com/group/RantauNet/
