*ABIH CAKAK TAKANA SILEK* * *
Abih cakak takana silek Itu umpamo nan tapek Dibaco sifat jo tabi’ek Pola pikia nan singkek Disitu kito acok sasek Mambaco nan tasurek Indak paham nan tasirek Apo lai nan balipek Ado apo dibaliak peyek Dalam kaleang dalam belek Babeda gantang jo sukek Lain teko lain cerek Jan kito sumbarang angkek Main tundo main Derek Tahoyak sarang pinyangek Kupiah gadang ndak tamuek Takana di ambo maso ketek Katiko masih bsrawa pendek Ado pasan urang gaek Sampai kini masih malakek Usah hiduik cando koncek Bilo takana lansuang malompek Pikiakan nan ka jadi kecek Jan katokan apo nan ingek Sakali malangkah sasek Alamat jalan baterek terek Urang lah tibo di tampek Awak masih ma etek etek Akhianyo badan talambek Nan di cari indak dapek Kok dapek tingga sakarek Atau mungkin lah kurang ciek Kaki layuah tungkai lah panek Kadang badan lah mandi karingek Di urang lah dapek ampek Tibo di awak tingga sangenek Disiko timbua caci jo upek Kalua niat nan jaek Mancari batuang tajungkek Dima urang ka tagolek Lah banyak sudi jo siasek Lah banyak kaceh jo cacek Banci sarato ebek Kasalahan urang nan babongkek Kalua somboang jo bondek Congkak sarato jongkek Suaro lah bunyi tokek Bak cando guruah di hadang kilek Kada urang bakorek korek Bisua urang ba colak colek Ndak ado lai bateh jo ambek Lah lungga dulu nan sandek Timbua dandam jo kasumek Silaturrahmi nan bakarek Indak di sakik lakek ubek Dek hati lah tasumbek Ndak ado lai kato nan bulek Saiyo indak samupakaek Bak kayu lungga pangabek Lah putuih konco nan arek Dari lantai, tirih mambosek Galodo manyonsoang darek Ba uleh mangko ka pendek Dek salah sulam salah samek Dulu bak gulai jo katupek Umpamo gado gado jo lotek Kini bak jas jo tangkelek Sulik dipakai sarangkek Manuruik ambo bapandapek Sabalun apo pun ka dibuek Harus jeli dan jelimek Sarato pandai bakulimek Ibarat rumah ka batingkek Nan pondasi harus padek Langkok surek manyurek Jan kito kanai ewek Piliah tukang nan gabek Iyo di garih lakek paek Jan tukang nan celek Tibo ma arik acok tagelek Kadang awak bak cando bebek Dek ulah mancaliak tabek Ma hambua ciek malompek ampek Lupo jalo jo jarek Kadang sumbarang panjek Dek manampak buah labek Samantang bantuaknyo bulek Lah basangko batang lansek Batang dadok nan badokek Lah tandeh paruik jo pusek Kulik licin lah jadi kasek Nan mancuang kinilah pesek Santano iko lah dapek Bak cando makan jo pangek Hari dingin nasi angek Lado padeh gulai pakek Ibarat parangko jo surek Manyatu dek baparakek Bara bana ka manyobek Antah kok tandeh dek ngangek. *Y.Jambak, 07062011* *[email protected]* -- . * Posting yg berasal dari Palanta RantauNet, dipublikasikan di tempat lain wajib mencantumkan sumber: ~dari Palanta R@ntauNet http://groups.google.com/group/RantauNet/~ * Isi email, menjadi tanggung jawab pengirim email. =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://forum.rantaunet.org/showthread.php?tid=1 - Tulis Nama, Umur & Lokasi disetiap posting - Hapus footer & seluruh bagian tdk perlu dlm melakukan reply - Untuk topik/subjek baru buat email baru, tdk mereply email lama & mengganti subjeknya. =========================================================== Berhenti, bergabung kembali, mengubah konfigurasi/setting keanggotaan di: http://groups.google.com/group/RantauNet/
