*Assalamua'laikum Wr.br....* * *
*Mancogok pasan mamak ka tujuah* *Ambo kirimkan dari jauah* *Kok lai kaganti suluah* *Panarang narangi bajalan subuah* * * *Umpamo ibarat pincuran buluah* *Baniat nak jadi pambuluah* *Ma aliakan ayie ka baruah* *Kok lai tasiram tanaman tumbuah* * * *Kok indak pambasuah basuah* *Pahilangkan nan kumuah kumuah* *Kok lai janiah nan karuah karuah* *Ibarat ubek paruruah* * * *Atau kok lai ka jadi tabuah* *Di cubo cubo mangguguah* *Manjagokan urang nan bakaruah* *Jan talambek sumbayang subuah* * * *Andaikan indak bapangaruah* *Urang mandanga acuah tak acuah* *Indak manganai jo manyintuah* *Kada di ubek tukak nan tumbuah* * * *Ibarat manumbuak kurang caruah* *Bareh saganggam atahnyo sambuah* *Bukan karano alu nan layuah* *Padi tu bana nan batangguah* * * *Tapi nan badan baniat sungguah* *Walau kabara hujan guruah* *Layir cabiak dayuang kok rapuah* *Ombak gilo badai mamupuah* * * *Patah kapak batungkek paruah * *Nan sampan tatap di kayuah* *Ma antakan titipan capek balabuah* *Disinan ta ubek hati nan lintuah* * * *Jikok di agak i sungguah sungguah* *Anak kamanakan banyak nan rusuah* *Bak cando kanai angin puyuah* *Lah hilang tampek ka bataduah* * * *Rumah rampak suraulah runtuah* *Kayu nan rimbun lah kanai tutuah* *Hari kalam ka hilangan suluah* *Nan tingga aduah jo languah* * * *Iko dek ulah kurang asuah* *Ibarat tali kurang piyuah* *Tukang apa kurang sapuah* *Akhianyo bak ayam ndak basusuah……….. * * * *PASAN MAMAK VII (kado ULTAH utk Dilla H.D) * Lah anam gurindam batulih Tatuju untuak kamanakan Jikok disimak jo titih Sarek carito pangalaman Pangalaman adolah guru Baitu rang bijak mangatokan Dek sabab karano itu Mamak cubo manyampaikan Malabihi kok ancak ancak Mangurangi tantu sio sio Mudah mudahan kamanakan bijak Manyikapi tutua mamak nangko Lah panjang carito mamak sabuik Baa parangai anak gadih Nan ka jadi tuntunan hiduik Jan isuak babuah tangih Masih ado nan ta icia Nan patuik pulo dikampuangkan Baa pulo caro bapikia Adat awak lah ma ajakan Jalan salangkah madok suruik Kato sapatah dipikiakan Jan asa sumbarang sabuik Ingek i ka manyeso badan Bakato paliharo lidah Bajalan paliharo kaki Dek ulah kato sapatah Banyak dandam di bao mati Pikiakan nan ka disabuik Jan sabuikkan nan tapikia Sampaikan jo lamah lambuik Urang mandanga indak tagisia Bakato dulu baru mangecek Itulah kunci pergaulan Tau di kato nan ampek Gurindam adat lah manjalehkan Partamo kato mandaki Baa mangecek jo urang tuo Tamasuak mangecek jo laki Indak mangicuah jo baduto Indak panyolang jo pambantah Urang tuo paibo hati Lunakkan gigi pado lidah Itu tando anak babudi Buliah sajo malawan guru Asa lai jo dalianyo Tapi bukan ma adu tinju Atau somboang manapuak dado Malawan mamak jo pituah Tapi di ateh kabanaran Bukan ilah bantah mambantah Durako kamanakan rang imbaukan Kaduo kato mandata Mangecek jo kawan samo gadang Sambia bagarah di palanta Kato bana kasampai surang Bara bana bakaruak arang Walau ka sampai basirah muko Hati gadang barabu kambang Nan dandam jarang tasuo Katigo kato malereang Mangecek jo ipa dengan besan Panuah ereang jo gendeang Sarek bahaso jo kiasan Indak mangecek tembak tupai Tapi carito ba sisampiang Niat lalu mukasuik sampai Hati mandanga indak sumbiang Ka ampek kato manurun Kato nan panuah kasiah sayang Disampaikan jo caro santun Indak mahariak mambulalang Kok manyuruah ma lunak lunak Mintak toloang jo lamah lambuik Jarang suruah ka nyo tulak Jauah dakek pastinyo turuik Lah ampek ragam batutua kato Nan patuik ditiru di amalkan Mamak tambahkan duo kato Anam jadinyo dipakaikan Kato partamo batapati Kato kudian kato bacari Jikok disilau makna jo arti Mulia i ikara tapek i janji Nak luruih rantangkan tali Nak mulia tapek i janji Nak gadang tinggikan budi Nak haluih baso jo basi Oooi gadih kamanakan kanduang Panjawek warih pusako lamo Tutua mamak sadang tangguang Katukuaknyo saketek sajo Kato nan ampek lah batarimo Lah anam mamak cukuikkan Kaba carito ampek pulo Nan indak patuik disampaikan Partamu carito kaba buruang Antah buruang apo namonyo Carito nan indak tantu ujuang Dicari pangka indak basuo Pado bana, banyak dutonyo Isinyo antah lah antah Sajangka jadi sa eto Banyak carito tukuak jo tambah Kaduo curito kaba angin Barito di bao urang lalu Nan dicaritokan lah tabang cigin Salah jo bana indak nan tau Ka tigo kaba curito sabananyo Kaba sahiah urang sabuikkan Tapi isinyo mungkin rahasio Nan indak patuik dikabakan Banyak kaba pakaro kaba Tamasuak kaba carito lamo Ado nan patuik jadi ota Ado tatap jadi rahasio Ka ampek *kaba *nan banyak *Kaba* barito dalam Koran *Kaba* tinju jo *kaba* cakak Sampai jo *kaba… kaba* bunuhan. *Kaba* tarakhir *kaba* sampaikan *Kaba**,*,,, baliak *kaba,*,, nagari Tapi baalah ka ma *ngaba *kan Mamak sadang *kaba* laran kini. *(Bersambung)* * 27062011* *Yanto Jambak (Yan Mj Basa)* *Radio Pusako Minang Am 972 Tgr. * -- . * Posting yg berasal dari Palanta RantauNet, dipublikasikan di tempat lain wajib mencantumkan sumber: ~dari Palanta R@ntauNet http://groups.google.com/group/RantauNet/~ * Isi email, menjadi tanggung jawab pengirim email. =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://forum.rantaunet.org/showthread.php?tid=1 - Tulis Nama, Umur & Lokasi disetiap posting - Hapus footer & seluruh bagian tdk perlu dlm melakukan reply - Untuk topik/subjek baru buat email baru, tdk mereply email lama & mengganti subjeknya. =========================================================== Berhenti, bergabung kembali, mengubah konfigurasi/setting keanggotaan di: http://groups.google.com/group/RantauNet/
