Ruaaarrrr biazzaaaaa, Sanakmbo ZulTan!!!!!
Kalau sajo ado acara di Megapolitan (nan maadokan sarupo 10 poin nan dipalewakan Sanakmbo ZulTan) nan malibaikkan saluruah potensi urang awak di Jakarta, sabana dahsyat hasianyo. "Sabana super", bak kato 'Bagindo' Mario Teguh. Tantu labiah maledak lai jikok tokoh masa laloe sarupo Azwar Anas, Emil Salim, Awaloeddin Djamin, Tarmizi Taher, Abdul Latief, Fahmi Idris, dll, dst diajak untuak talibaik sabagai Panitia Panasihat. Tajuak nan bombastis indak ka baa dibuek untuak iko. Misalnyo "Minangkabau Expo 2011 : Mambangkik Batang Tarandam". Kalau sajo ide Sanak Zultan disarahkan sapanuahnyo bake urang awak nan alah lihai mangarajokan EO kolosal, ambo yakin Jakarta bisa malatuih.......!!!! Dan, sabagian hasil dari "Minangkabau Expo 2011" ko, bisa awak sarahkan ka kampuang halaman untuak manyeka dan mamporban luko-luko G30S-2009 nan sampai hari ko sabana banyak nan masih tangango. Kalau ado komunitas r@ntau-net nan namuah mandanga languahan dan sasaknyo angok dalam mancari pitih sarimih duo rimih untuak mambangun baliak wilayah Minangkabau nan kanai G30S-2009, cibolah batanyo ka kamunakan kito Rizki Sikumbang di Piaman (+6281363078890). Alah ampiang duo tahun kamanakan kito ko bajuang sacaro door to door, atau office to office manamui "Si Padang" nan agak sukses di bumi parantauan. Ee ehh...., kadipanga an, dari tigo miliar rupiah nan dibutuahkan KPRRS : "Gerakan 1000 Surau di Minangkabau" indak sampaitigo puluah juta rupiah nan masuak. Ka baa nyano awak? Baliak ka pangka sasuai jo subject di ateh. Apokoh ado kiro-kiro manusia minangkabau nan tapanggia mawujudkan impian Sanakmbo ZulTan ko? Sabananyo, sangaik banyak potensi "Si Padang" di bumi Jabodetabek nan alun tagali, alun tagili, dan alun tagiloi ka pamasaran nan serba multi media kini. Ambo siang tadi (14/9 : 10.37 WIB) alah ditalepon dek Mak Datuak Bagindo "Al Maninjauwi" (maaf, namo tarakhir tambahan dari ambo. Sakali lai maaf, Pak Datuak...!). Dari mangecek sakitar anam minik via HP tu, dapek ambo simpulkan, sabagian acara nan ka dipalewakan di JCC adolah sabana apo adonyo. Halangan utamo ---carito klasik dari zaman doeloe--- adolah ongkoih ka maadoannyo. Misalnyo, acara "dialog interaktif" dan kadiadokan di JCC, Jumaik (16/9 : 13.30 WIB). Panitia taantuak Sia kiro-kiro nan paliang pas untuak diduduakan ---dialog inter aktif salingka ABS-SBK---ciek meja jo Pak Saaf, yo? Sabananyo "panitia kilek" lai kamancibo maadokan sacaro wuah...Istilah urang modrennyo mungkin super kolosal (pendek kato : lai sabaun pulo jo "impian" Sanakmbo ZulTan di bawah). Tapi...., tasandek di segi ongkoihnyo. Akhienyo....., maliek pakar adaik Minangkabau nan tanamo dari kampuang halaman indak bisa doh diajak ka Jakarta (tiket GA P/P, Hotel babintang di Jakarta agak 2 malam, dan saketek pambali timbakau, nan alun sempat disadiokan). Karano "panitia kilek"baprinsip show must go on, dicokoklah pakar nan lai tanamo pulo dari Tanah Abang, Jakarta. Mudah-mudahan sajo dialog interaktif salingka "ABS-BSK di Minangkabau Kini" nan kadipalewakan bisuak (Jumaik 16/9) bisa mambukak aka pikiran awak untuak disampaikan ka tigo tungku sajarangan di Sumatra Barat nantiknyo. Kalau masih juo awak dimabuak dek adu cipeh bapolemik di forum alam maya ko, ambo raso indak ka ado doh nan jalan a nan (taniaik) kadikarajokan. Bialah jalan sajo dulu a nan bisa dikarajokan Dunsanak awak nan kabatulan punyo ukatu dan tanago untuak itu. Bake awak nan kabatulan kabagian sabagai "panonton urang main bola" atau nan kabagian "saroman anilisis sipak bola di layar TV" (nan labiah pandai dari Guru Sipak Bola nan malatiahnyo) rancak bana salurkanlah pamikiran cemerlang tu jo proposal jaleh. Tolonglah buek "capak-capak baruaknyo". Kama dana kadimintak, bara kiro-kiro ongkoih even kolosal "Minang Maimbau" ko, dan bara pulo kiro-kiro nilai tambahnyo buek pamabangunan konkret daerah nan kini sadang dikapaloi dek Mak Datuak Iwan "PKS" Prayitno. Kalau sajo jaleh alur dan aliran goal nan ka dituju, ambo raso alun talambek doh buek masyarakaik Minangkabau di parantauan (nan konon kato ahli statistik, jumlah "Si Padang" di bumi parantauan samo jumlahnyo jo urang awak di Sumbar, yaitu 4,3 juta jiwa). Marilah awak saliang bapaluakan malangkahkan kaki untuak mambuktikan ka urang lua bahaso urang awak tu indak saburuak nan dikatoakn sosiolog doh : "Banyak nan cadiak tapi indak panah bisa basatu". Astaghfirullah al azim. Salam dan maaf................., mm*** Lk-2; >50tk; Bks ________________________________ From: ZulTan <[email protected]> To: RN <[email protected]> Sent: Wednesday, September 14, 2011 5:19 PM Subject: Re: [R@ntau-Net] Sumatera Barat Expo @ JCC Dari uraian nan tabaco tantang kurenah nan ko, iyo ndak ado nilai juanyo doh, terlalu standar untuak sebuah event etnik. Ma urang ka datang? Apo bedanyo jo suku lain, mungkin ndak ado doh. Jan urang datang dek jargon maibo "KALAU NDAK AWAK SIA LO LAI?" Dialog ka dialog, iko bukan budaya awak. Urang awak kalau lah dibao ka nuansa formal lah mati anginnyo. Ilang kincina-kincianyo. Diawak ota rami-rami nan katuju. Cubo ditampilkan keaslian Minang tu: 1. Papatah-petitih sajak maminang sampai marapulai-anak daro basandiang. 2. Saluang, bansi, talempong, rabab, randai, silek, Gamaiak, dll. 3. Tari Pasambahan, Tari Payuang, Tari Piriang, Tari Indang. 4. Sadiokan 50 meja untuak tandiang domino hadiah oto (pendaftaran Rp. 1 juta/pasang), Honda, Sepeda Fixie. 5. Main KIM samalam suntuk, tiok balanjo Rp. 50.000 dapek kupon sakali main dan kelipatannyo. 6. Boyong artis-artis Minang nan ado di Padang. (Ndak paralu Christine Hakim, atau si Ratih gai nan bairik-irik). 7. Macam-macam kuliner klasik (kalio jariang, itiak lado mudo, dendeng batokok, bubua kampiun, dadiah, bika, batiah, kipang, pensi) 8. Kerajinan tangan: bordir, sulaman, Songket Silungkang, Tanun Pandai Sikek, Perak Koto Gadang, dll. 9. Kaset-kaset Minang, Elly Kasim, Tia Ramon, Sutan Parpatiah) 10. Maota jo 3 mantari: Gamawan Fauzi, Patrialis Akbar, Tifatul. Panangah: Irwan Prayitno. Kabakan sadonyo tu melalui lintas media (TV, Radio, Majalah, SK, internet, komunitas milis, brosur) + pamflet di tiok suduik pasa Tanah Abang. Cari media nan di pimpin si Padang, minta partisipasinyo manayangkan iklan atau mamuek press release. Hubungi Angku Liyeh di TV One. Inshaallah ndak paralu maibo lai, "Mek lah datang wak, kok ndak awak sia lo lai." Salam, ZulTan, L, 50, Bogor -- . * Posting yg berasal dari Palanta RantauNet, dipublikasikan di tempat lain wajib mencantumkan sumber: ~dari Palanta R@ntauNet http://groups.google.com/group/RantauNet/~ * Isi email, menjadi tanggung jawab pengirim email. =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://forum.rantaunet.org/showthread.php?tid=1 - Tulis Nama, Umur & Lokasi disetiap posting - Hapus footer & seluruh bagian tdk perlu dlm melakukan reply - Untuk topik/subjek baru buat email baru, tdk mereply email lama & mengganti subjeknya. =========================================================== Berhenti, bergabung kembali, mengubah konfigurasi/setting keanggotaan di: http://groups.google.com/group/RantauNet/
